Ramri hi kan vei tak tak lovin ka hria

Mizoram leh Assam-in ramriah buaina kan nei an ti a, Assam sorkar Forest Department chuan Mizoram chhung ngeiah office an rawn sa a, sipai cinema hall hlui cheiṭhain an luah nghal a ni. 

Hei hi Mizoram sorkar chuan Mi­zoram chhung tia a pawm chhung daih, Vairengte khaw dai mai a ni a, tun thlengin an la chhuak lo a, Aizawla zirlai pawlten an buaipui loh chuan heng hi kan ngaimawh lo a ni. Mizoram sorkar Minister te ṭhu­khawm khan kan ramria an pawm chu khutah khutah a ni a. Bengal Eastern Fontier Regulation 1875 chu Mizoram leh Assam ramri atan an pawm a ni, a thu chiahin an pawm a ni. A chhan chu he ramri an pawm hma tawha Assam Forest department ten office tura an chei ṭhat pawh tun thlengin kan la ṭhiah tir lo a ni. 

Tharum hmanga in beih chu a ṭha ka ti bik lova, mah se kutthlak ngeiin cinema hall hlui chu an khawsakna turin an rawn chei ṭha tawh a, chu chu a taka kutthlak ngeia kan ṭhiah loh chuan ramriah kan tlawm a ni a, tui taka mut a har tlat a ni. 

MZP pawh hi kawng zawhah hian an tawp tur a ni lo ka ti ve tlat a ni. A chhan chu ramri chungchanga rorum zawk tura ka lo ngaih ṭhin chu YMA a ni a, mah se YMA chu an ngawi tlat si a ni. CYMA hruaitu zingah hian sorkar hnathawk an tam ṭhin avangin ramri hi chu sorkar phal bakin an sawi ngam lo a nih tawh hmel a ni. 

Mizoram Sorkar hian Bengal Eastern Fontier Regulation 1875 hi ramri angah a thuin a pawm a nih chuan a takin a bawhzui tur a ni. Chuti a nih chuan Inner Line Reserve Forest Area Sq. Mile 509-a zau, Assam Forest Department-in a enkawl hi Mizoram chhung a ni tihna a ni. "Kan pawm" tih ringawta an thil pawm humhalh tura thawh chhuah leh si loh chu nuihzatthlak mai a ni. 

Thil ka hriatthiam theih miah loh pakhat leh chu MNF leh India sorkar inremna, Memorundum of Settlement an ziahah khan ramri kha North East Reorganisation Act, 1971 an pawm ta tlat mai a, kha kha tuna MNF sorkarin ramri atana a thua an 'pawm' aiin a zim ta daih a ni. 

Sawi tur a tam lutuk, mithiam leh hre zau zawk sawi zuiah ka khek mai ang. Ramri hi i buai­pui chhunzawm zel ang u tiin ka Mizo puite ka sawm a ni.