AMC ELECTION RESULT - REVIEW VE THUAK ANG

Election kalhmang review-na dik lo, mipui rilru hruai kawi thei ang chi a awm fo. Mimal hmuh dan i'n sawi ve teh ang. Believe it or Not tih a nih kha maw! 

MP, MLA, Municipal leh Panchayaty Raj/ VC/ LC Elec­tion ahte hian Political Party te tan mipui vote tam deuh hmuh a, vote percentage sang deuh hmu chung bawkin candidate tlemte chauh tlin theih a ni. Entirnan- 2018 Aizawl bik bial 11 chhunga Congress, MNF leh ZPM inchuhna result kha ZPM 6, MNF 5, Congress Nil a ni. 2013 Elec­tion neiha Aizawl khawpuia Congress MLA 7 nei khan 2018 Election-ah a hloh vek a. MNF MLA 3 neiin MLA 5 a nei chho a. ZPM MLA Election vawi khat chuhna-in MLA 6 a nei nghal thung a. Mimal tin vote belhkhawm, mipui duhthlanna vote kalhmang hi hriat lawka hmuh thiam a harsa takzet. 

2018 MLA Election, Aizawl MLA bial 11 chhung­ah khan MNF Party hian vote 72091 a hmu a. ZPM khan votes 65980, Congress-in vote 50999 a hmu bawk a. Constituency tin vote awm a inzat lo a, MNF MLA tling panga (5) te vote hmuh kha a sang filawr a, pahnihnain an thlau a. ZPM MLA 6 te tlinna vote hmuh kha an sang filawr ve lo a. Party tin Bial 11 vote belhkhawmah ZPM hian MNF vote hmuh kha votes 6100 bawr khan a pha lo daih zawk a. Aizawl mipui vote hmu tam leh percen­tage sang zawk MNF khan MLA a nei tlem zawk thung! Aiawh member neih ngah tuma elec­tion inchuhna kha a pawi­mawh ber chu a ni.

Mizoram state-in Political election kan neih MP election leh MLA election campaign kalhmang leh hnathawh pawi­mawhna pawh a hrang hle. Local Body Election - Municipality leh VC/ LC pawh a elec­tion auhla leh mawh­phurh­na thlengin a dang daih. Aizawl khawpui Assembly Constituency bial 11 area aiin Municipal Ward 19 Area a zim a, vote pawh a tlem zawk a, Electoral Roll pawh a hrang. Chutiang zelin MLA chu Dan siamtu, Municipality Councillor chu Dan hmanga khawpui enkawla Exe­cutive hna chelhtu tur an ni. MLA Election leh Muni­cipality Election mipui vote kalhmang hi ngaih kawp a, percentage zawnga khaikhinna neih hian awmzia a nei thui em aw? 

AMC election kan neih tawhah Party te vote hmuh dinhmun hriatthiam a harsa. Kum 2010 khan Congress leh ZNP ṭang dun, MNF leh MPC ṭang duna in beih a ni. Party mal Congress, ZNP, MNF, MPC votes hmuh zat thliar hran theih a ni lo. Kum 2015 Municipal election pawh khan Congress leh MPC ṭan dun a ni, Cong 7 + 1 MPC, ZNP & BJP Nil, MNF 11 (simple majority) MNF Party vote zat chauh kha a thliarhran theih a ni. 

Tun Municipal Election, MNF Rulling nihna hnuaiah MPC leh ZNP ten MNF Party kan pui an ti a, MNF candidate 19 te vote hmuh zawng zawng kha MNF Party vote liau liau bik vekah MPC leh ZNP ten kan ngai vek thei em aw? Lo ngai vek pawh nise, MNF Party hian Opposition an nihlai 2015 Election-a Councillor 11 an neih ang zat chiah tho, rulling kum 3-na tun AMC Election ah Councillor 11 bawk an nei leh a. MNF hian hma a sawn lem lo tih a lang. 

Congress Party hian term liam ta-ah Councillor 7 a nei a, chumi aṭang chuan tunah Councillor 5 hlohin Congress bial hnih (Councillor 2) a humhim a. Chu result-ah chuan Congress Party hian hma a sawn han tih tur a ni nge, a tlahniam le aw? Engtinnge 2018 MLA Elec­tion vote hmuh aṭangin percen­tage a pun theih tlat bik le? 

MLA Election leh AMC Election vote hmuh kan khaikhin talh dawn chuan - 2018 MLA Election, Aizawl bial 11 chhunga MNF MLA candidate te vote hmuh belhkhawm 72091, tun AMC Election, MNF candidate-te vote hmuh belhkhawm 51190, tlakhniamna vote 20901. ZPM MLA candidate te votes hmuh - 65980, AMC votes hmuh 44685, tlakhniamna votes 21297, Congress MLA candidate te votes hmuh 50999, AMC votes hmuh 30354, tlakhniamna 20640. Tichuan, Ward 19 Election result ah MNF 11, ZPM 6, Congress 2 a niin, ZPM hian AMC vawi khat chuhna-ah Councillor 6 a nei thei nghal a nih bawk chu... 

Heta lang pakhat chu, AMC- Party 3 te Votes hmuh hi 2018 MLA Election an vote hmuh aṭangin sing hnih chuang hretin a tlahniam vek a, tu Party vote hmuh mah a pung lo. Engnge he inthlan pahnih vote hmuh percentage khaikhin hian kawhhmuh tum a neih le? 

Ti zawng pawh hian - AMC Wards 19 chhunga MNF candidate zawng zawng votes hmuh belh­khawm hi ZPM votes hmuh belhkhawm hian 6407 zetin a phak lo a, ZPM votes hmuh hi Congress votes hmuh belhkhawm hian 14124 zetin a phak lo ve leh chhawng a ni. Tin, Postal Ballot votes kha Security Police vote leh civil servants vote engzat nge tih hriat a chakawm ve mai mai. 

Rinthu - Party 3 hian an thiam dana theihtawp chhuaha campaign an beihna aṭangin, councillor an tlin zat result hi an beisei aiin a hniam vek ka ring.