Kawng sira inzuar Ṭheuh Ṭheuh

Tun hnaia Aizawl khawpuia titi siamtu pakhat chu kawng sira inzuar tam zawkte hnawh bo an nih laiin hmun pakhata inziarte chu MNF lama 'thunei tak' pakhatin a chhan tlat a. Chu vang chuan Aizawl DC thupekin pawisak a hlawh thei lova, Aizawl Municipal Corporation (MNF sorkarna tho) chuan DC thupek sûtna awm si lovin inzawrh phalna an lo pe ve a, he khawpuiah hian thuneitu pahnih an awm ta a, chung zawng zawng chungah chuan Mizo Hnam Runa ṭhu politician pakhat thu a ding luah mai a, hei hi Mizoram chu a ni. 

Chanchinbu lama kan lo hmuh dan chuan Aizawl tennis Court sir velah serthlum zuar ana wm a, heng mite hi Aizawl DC-in kawngpui kama inzuar tawh lo tura a tih hnuah pawh an la inzuar thei bik a ni. Heng serthlum zuarte hi thingtlanga awm hah taka serthlum chingtute an ni bik lova, Aizawl lama mi, khawpui mi sumdawng an ni. Khawpui mi sumdawng pawh ni lo, mahni thlai thar zuarte meuh pawh Aizawla bazar lun lai kawng sira an inzawrh phalsak a ni ngai lova, dan anga hnawh darh an nih laia serthlum khar chhawngtu sumdawngten duat an hlawh bik hi dan ngaih pawimawh lohna a ni. 

Tichuan chanchinbu lama a lan dan chuan Aizawl DC thupek sût si lovin kengkawh thei lovin kan District thuneitu leh a thawh puite chu an awm ta a ni. Dan aia lal kan neih chuan kan kal sual tihna a ni. Dan hian sorkar leh sorkar lo a thliar tur a ni lo. Party hrang hrang pawh dan chuan ang khatin a hrut rual tur a ni. Heng serthlum zuarte hi a 'subject' an ni tawh lova, a subject chu Aizawl DC thupek CrPC 144 aia thuneitu an awm ta hi a ni. 

Kawngpui kama inzawrh hi an phal dawn a nih chuan mahni thlai tharte hi in zawrh phal zawk rawh se. Hah takin an thawk a, lo an vat a, hlo an thlova, rim takin an feh a, an thlai thar chhuah zawrhna tur an neih loh avangin mi hnenah an hralh chhawng ta a. Heng khar chhawng te hian mipuiah an hralh leh a, a chang chuan a thartu aiin a khar chhawngtute hi an hlawk zawk a ni. 

Kawng sira ṭhu kan duhsak dawn a nih chuan mi thei thar chhuah sa lo khar chhawngtu sumdawngte ni lovin mahni thlai thartute ngei hi duhsak tur a ni a, hei hi 'lal ber ber' pawh hian lo hria se a ṭha khawp mai.