In kan sa huai mah mah a ni

Mizoram khawpui Aizawla awm duh vek kan ni ti ila a sual tam awm lo e. Kan neih sum tak tak sengin inhmun rualrem lo tak tak kan lei a, a ngheh leh ngheh loh lam mithiam rawn lem loin kan sa pawp zel a. A thlang lam aṭang min mai thei a ni em tih kan ngaihtuah lem lo niin a lang. Kan sa pawp a, kan luah tawp zel mai zawng a nih hi. 

Tunhnaiah chawlh­kar khat vel ruahtui a tla a, kum­dang ai chuan a tam lutuk lo leh nghal. Chuti chung chuan leimin a tam em em a, heng leimin tam tak hi khuarel chhiatna ni loin, mihring siam chawp chhiatna (man-made disaster) a tih theih hial ang. 

Tun hnaiah pawh hetiang chi hi a thleng tam hle mai, a bikin veng hrang hrangah hetiang chhiatna hi thleng thut thei dinhmunah a la ding hlawm bawk a ni. In kan sa a, a chhak leh thlang a him em tih pawh ngaihtuah loin kan luah mai a. Kan thli-te chu tuihawk luankawr ṭhaah luang loin tuihawk kawngbo-ah a chang a, a duhna hmun hmunah kua a hreuh a, chu chuan leimin nasa tak a siam ta ṭhin a ni. Mi fimkhur loh zar zo pawh chhungkaw tam tak an awm a ni. 

Tuna Bawngkawn leimin hi kum kal ta lamah pawh nasa takin a min tawh a, mahse a chhak lamah in rit pui pui an sa zawm reng a, chhungkaw tam takin harsatna an tawk a ni. Concrete building pawh ṭhiah ngai hialin a awm ta nghe nghe a, a pawi hle a ni. A hlauhawm tak tak hma khan mithiam rawn phawt ta se a fuh tur hi a ni a, an lo rawn ngei a nih pawhin an mi rawn chuan a hisap piah lam pawh a ni thei bawk. 

Hmanni Durtlang Leitan-a BSUP buil­ding ṭha zet mai a chhak lama lung/ lei tawlhin a hnawlte kha a pawi a, nunna hlu tak chan an awm bakah mi engemawzatin hliam an tawrh phah bawk a nih kha. Hman kum lawkah khatianga pialtlep laih chah vang bawk khan Laipuitlangah chhiatna nasa tak a thleng tawh a nih kha. Khami hre reng khan BSUP building an sakna hmunte kha mithiam tak tak chuan hriat ve awm tak niin a lang. 

Laipuitlang chhiat­na aṭangin mithiam zawkte pawh an harh tlat lo. Building an han sa ngawtte kha ngaihtuahna a thui lo tih chu mi tam tak ngaihdan a ni ngei ang. Pialtlep tan bun thlanga building sak kha sawisel a hlawh hle a nih kha. Chuta chhapah chhiatna nasa tak a thlen phah leh nghal bawk si a. 

Chuvangin, in reng reng inhmun rem lo leh kham bakbarek-a sak loh hram hram hi kan himna tur a ni. Kan siam chawp chhiatna vanga nunna kan chan zel hma hian i fimkhur tlang ang u.