HARH A HUN E

Mizoram hian foreign ram pahnih leh ṭhenawm state dang pathum a ri a. Hnam a zawnga hnam ze nghet lo, nghet lo riau e ti lo chuan a ṭha lo lamah chuan nghet leh riau lawi si, ngaihsam em em leh tlem em em bawk si kan nih avang hian kan inven uluk a ngai bik a ni. 

Kum 2018 May thla aṭanga kum 2019 June thla inkarah, Vairengte check gate aṭangin mi 1,15,443 hnenah  I.L.P pek a ni a, heti taka tam I.L.P petute hi vai an ni lo a, Mizo ve tho an ni. Eng hnam pawh hian an ram chhunga hna awmah hian thawh duh loh bik te, thawh peih loh bikte an lo nei ve vek mai. Eng hnam mah hi mahni ram chhung veka hnathawk an awm bik lo, hnam tin hi hnathawk turin ram tinah kan inkal thelh nuk a nih hi. 

Kan thawh peih loh zawng leh thawh theih loh zawng thawk tur hian vai kan mamawh a, amaherawhchu, kum khat chhunga mi 1,15,443 teh meuh mai hi chu kan mamawh tawk bak an ni. Permit nei lo hi check peih phawt chuan man tur a za tel an awm nitin a rinawm. Permit nei loa Mizorama luh hi an harsat miah lo a, an hreh lo bawk, dan lova an luh theihna atana lo puitute pawh Mizo tho an nih a rinawm.

Hetih mek lai hian Mizoramah dan lova khaw din, khaw 26 tehmeuh mai a awm a, a tam zawk chu hnam dang chenna khua a nih a rinawm. Tak tak nimaw - chhim lamah chuan Burma raltlante hian vote an neih thu leh V/C intlanah te vote thlak a, chuh ve hial an tum tih thawm te pawh a awm. Heng raltlante hian vote nei thei tur chuan electoral roll-ah an hming a chuan a ngai a, electoral roll-a thuntute chu hnam dang ni loin, Mizo bawk an nih a rinawm. 

Hnamdang an rawn lut hum hum a, Vairengte check gate leh luhka dang aṭanga dan ang leh dan lo anga rawn lutte nen phei chuan ṭhahnem tak an nih a rinawm. Hetiang renga Mizo te hi hnamdang rawn lut chungchanga kan fir lo a nih chuan kum 60 a vei leh meuh chuan, kan kohhran khawmpui lian leh bazar hmun lun laiah te thih chilh bomb a puak zeuh zeuh lo ang tih a sawi theih loh. 

Kan mamawh tawk bak vai rawn lut tur lo dang ila, kum khatah thla 2 chhung emaw tal chu I.L.P pek chhuah loh thla te nei ila. Mizoram hi kan chhehvel aṭanga rawn ral tlan apiangte'n, awm hlenna atana hman an tum ziah tawh lohna turin fir takin kal ve tawh ang u. 

Vai chah lut a, ral tlan khawi ngamtute hi Mizo tho kan ni - harh a hun e.