'CYMA-in kawngpui vei zel se' tih kha

Vanglaini  Vol - XXXVI no. 31, Feb­ruary  ni 10,  2021-a editorial a rawn lang 'CYMA-in kawngpui vei zel se'  tih kha ka rilru ang pu mi ka chhar ta, an tih ang maiin ka rilru lama ka lo pai ve ka aawi chhuah thiam chiah loh a nia ka rawn tui hnih ve lo thei lo a ni.

CYMA-in kawng­pui siam an en dik thu a rawn ziak a, chumi kal zel ah chuan CYMA in an thil hmuh chu a lungchhiatthlak thu an sawi tih an rawn ziak bawk a, chumi kal zelah chuan, "Thil reng reng hi a diklohna hmuh a nih tawh hnuah chuan a dik lohna siam ṭhat dan zawn hi kan tih tur ni awm tak a ni a. Chutihlaia PWD changtu minister-te nen sawiho leh a ni hian a diklohna siam ṭhat lam aiin a diklohna in hrilhfiahna lam a hawi lek lek a; kawngpui kan neih ṭhat lohzia leh a siam danah a lungawithlak lohzia hmuh a nih tawh hnua a tidik lotute hrem tur zawnga kal mai lo a, a hmaa CYMA leh PWD thawhhona thuthlung awm tawh sa hrula inremna siam thar leh hi chu a kawng a kual thui deuh dawn niin a lang," tiin a rawn ziak.

CYMA khan kawngpui siam dan dik lo kha an hmu chhuak a, contractor hming hawh mai maiin an thawk tih pawh an hmu chhuak a, kha kha sorkar hian a hrem dawn em? Contractor hming hawh hi dan in a phal loh a nih laiin kan rama infrastructure pawimawh ber pakhat kawngpui siam naah pawh mi hming hawh chawp mai maiin hna an lo thawk reng a, chu chu CYMA in an hmuh chhuah tawh ber chuan tawp nghal hmakin an hrem zui ngei turah kan ngai a, CM nen an sawiho leh avang hian hremna lek kawh chu a la hla deuh lo mawṭ tih hi ka zawhna chu a ni.

CYMA hian kan kawngpui chhe bik lutuk hi an vei a nih chuan a siam dan chhe tak bakah hian a siamtu tur ni lovin mi hming hawh chawp a an thawh hi ti tawp nghal hmak se, hei hi chu PWD nen sawi ho pawh a ngai tawh lo, dan dik lo thil an hmu chhuak tawha CYMA hian hlauh nei lovin dikna nen kawngpui siam ṭhat hma hauh hian kawngpui siam dan kalphung dik lo (contractor hming hawh) hi siam ṭha ngei ngei rawh se.