DAWT DAWT SAWI...

Kum a thar a, kum hlui a liam ta! Kumin atan Chapchar Kut pawh kan hmabak leh ta. Chapchar kutah nula tlangval an chai a, mual an mawi ṭhin te hi a hmuhnawm. Keini ang rual tan chuan nula tlangval han che vel chu an huhang a na bawk a, ralkhatah kan lo rui tawk der ṭhin mai! 

Kum hluiah, khawchhak thliin min nuai a. Triau tract, Khiangawia, Yellow Boots, Adalat tih te pawh awmhmun aṭangin kan lo hre bel ve a. Engdang sawi lovin min rawn hnawl tih thu te hian ṭhalai nunah thu a sawi. Khiangawia movie ti movie-tu Bawngvuani, Tangkeuva te chevel leh ṭawngkam te chu kan ṭhalaiten an hre bel a. He film-a mi pawimawh tak changtu Pi Hnawli tia kan hriat te pawhin mual min liam san tawh a. Social network lamah Sapṭawnga lawmthu sawina te, friend list te, like-tu an ngah thu te thlengin kan lo hre ve a. Yellow Boots movie-ah motor accident chungchang te, roreltute thu rel dik tawk lo te, nufa inkar, sumdawng company sum leh pai vir vel dan te a lang a. Kan ṭhalai te chuan Korean sumdawnna ṭawngkam Chairman/ President tih te chu kan ṭawng emaw ti khawpin an nal hman. Savdhan (India Fights back) kan thlir ṭhin te hi India ram mi chengte nun, dawt leh thutak inpawlh, mahni in hai vurna nun chan a tam mai. Dawt, dawt sawi nun chan hi en peih a, thlir peih a thu a ni mai. 

Heng zinga khung theih, Vanglaini chanchinbu ni 9.12.2016 ah Thu leh Hla huangah Thu Ruk (Literary Theft) kan hmu a. He Thu Ruk ziaktu Mafaa Hauhnar pawhin mual min liam san ta. A sawi ang plagarialism hi thu thar a ni lo va. Khawvelah hian dawt, dawt sawi chingte avang hian mi thinlung a lo na fo tawh ṭhin. Roots, African thlahtu chhuina lehkhabu, Alex Haley an ngaihnawm taka a ziakte chu ama irawmchhuak a lo ni lo va. Mi thu a ruk, dawt dawt a sawi a lo ni an ti a. Chuvang chuan, kum 1977 khan Margaret Waker-i chuan ama thawnthu ziak Jubilee, aṭanga Haley hian la chhawng a ni a ti a. Harold Courlander pawhin a lehkhabu The African, 1967 kuma a chhuah aṭanga lo kharchhhawng a ni a ti ve bawk a. 

Hei vang hian thubuai hla buaiah an la a, court-a inkhing kha a tawpah court pawnah an inremsiam a, Haley an US dollar 650,000 lai, Courlander a pe a (Amazing Tales from times gone by, Reader’s Digest, page 95,2006). Hetiang Thu Ruk hi thil awl tak a ni awm e, zaithiam Beatles group-a mi Geroge Harrison pawh a hla “My Sweet Lord” hi “He’s So Fine” hla entawn nia sawi a ni a. Court-ah an sawi ve zak zak mai.

 

Academics, Computer games, Jour­nalism, Arts, Politics, Wikipedia leh a dangah te pawh kharchhawn a tam mai. The Da Vinci Code, Dan Brown-a lehkhabu sawi hlawh tak te pawh hi sawi hlawh tak a ni. Hetianga khar chhawngho hian dawt dawt an sawi tihna a nih chu! 

Hetianga court pawnah emaw, court thleng lova inremsiamna, inbiakremna ang chi hi India ram thuremna chi khat Lok Adalat thu laimu a ni a. A Sap ṭawngin alternative dispute redressal an tih zinga mi a ni. Chu mi zulzui chu tun laia lar em em, Adalat TV serial kan hmuh ang hi a ni. Savdhan, (India Fights back) cable TV-a kan hmuh tam zawk hian criminal thubuai an sawi tam ber a. Lem chan a nih avangin court kalphung ang teuh deuh ber tura duan a ni. He mi hrul tho hi Khiangawia te, Yellow Booths te pawh a ni. Dawt, thu dik sawia sawi, thamna, tualthahna te, inphiar rukna te, inngaihhaia inthah palhna te leh vervekna chi tinreng te a lang a. Dawt, thu dika chantir tumna, thu dik dawta chantir tumna in heng TV Serial te hi an khat a. Hring nun a sawi fiah khawp mai. 

Hetiang han hmuh leh hriat hian Thu leh Hla Kungpui, William Shakespear-a mitthlaah a lo lang a. Hring nun hi lemchanna tual a ti a ni awm e. A Drama “Hamlet”, Mizo ṭawnga min lehlin saktu Pu J.F. Laldailova’n a ti mathlawn lovin, “I kalna ramah chuan van Angel rualin thlakhawngin lo hmuak che rawh se” tia min duhsaktu neih loh mah hlauh nak alaia, dawt dawt sawi chingte hian khawvel an ti famkim! (Horatio: William Shakespeare”s Hamlet, Letlingtu J.F. Laldailova, Fifth reprint 1983, page 121). 

Chapchar Kuta kan ṭhalaite incheina famkim nena an inthuam a, mual an mawi ang thovin, hetiang dawt dawt sawi chingte hian khawvel an mawi a ni! Mahse, dawt te chu sawi loh theih loh, mihring pianken, Siamtuin mihring a siam dan a ni miau a. Chuvangin, mi te rilru tina zawng te, mi te tihmingchhe zawng te, mi te tihnufum zawng tea dawt sawi a, khawi khawiah emaw vah pui a, thu tak sawia sawi hmiah hmiah mai chingte nen hian lemchannna tualah kan leng za a lo ni. 

Lehkha ziaktute chauh hi dawt dawt sawi an ni bik lo va. Politician-te chauh pawh an ni lo. Dawt dawt sawi chingte hian mi dangte an puh chhiat a, midangte nih lohna pui an puh a, anmahni dinchan tum vanga dawt an va sawia mi an defame chiam te hian a tuartu tan chuan chauh pui tham a ni. A sawitu dinchanna ni mahse. Chutiang chu keini pawhin kan tawk ve ṭhin a. Midang chungchang sawi lovin, sap ṭawnga better-half han sawi ila. 

A sawrkar hna thawhpui, a chunga mi te leh hnuaia mi te, lam hnai leh hlaa mi te hian an han defame nasa thei khawp a. Sawrkara a nihna remchanga laa tu tu te nen emaw in thurual a, sum leh paia hnungthak inhiah tawn nite hian an chhuah ṭhin a. Chutianga dawt dawta puh ṭhintute chu Kohhrana rawngbawltute, professional degree nei, Gazetted officer inti chin ngatte pawh an ni. Dawt hi thu tak sawiin an sawi hmiah hmiah a, tu tu te emaw chuan an thusawi chu awih pawh an awih. Keini “Ukil te chu dawt sawia ei zawng mai mai” an tih te aiin dawt an sawi tam zawkin ka hria! 

A chhan chu, chhungkawpa, chhung­kaw khaipa inti ve riang ruang tan chuan thutak leh dawt chu hriat loh rual a ni lo. Chhungkaw thla tin sum lak luh leh chhuak tlangpui, pawisa khawl zah te chu, tunlai ṭawng takin, mahni chhungkuaah na na na chuan a ‘transparent’. Mahni chhungkaw inrelbawlna ve te te chu tu min hriatpui vek loh pawh ni se, keini aia chiang a awm theih loh. Chuti chung chuan, kan chunga mi te dawt dawt sawi te chuan harsatna min thlen. E khai, insum ang. Dawt dawt sawi hmangte zingah kan tel ve ta der mai a! 

Mahse, kan chenna khawvel hmun zauah hian hetianga dawt, dawt sawi chingte hi he khawvel aṭanga hnawh bo theih an ni chuang lo. Chu chu a ni dawt dawt sawi ka hrilhfiah thiam dan chu!