BJP President Amit Shah thusawi leh Mizoram politics

Fenruary 13, 2019 khan Mizoram Kohhran mite, tlawmngai pawlte leh political party hrang hrang chuan The Citizenship (Amendment) Bill, 2016 (CAB) chu Rajya Sabha-a put luh a nih tak loh avangin lawmthu an sawi a, hnehna ni anga an lawm bakah Kohhran ṭawngṭai chhanna angin an sawi hlawm a; mahse February 17 a lo thleng a, ni li lek hnuah BJP President Amit Shah chuan Mizo mipuite leh Hmarchhak bial mipuite runluih ang maiin, "Kum 2019-a Lok Sabha-ah kan chak chuan kan sorkarin CAB hi kan tharthawh leh ang," tiin a sawi. 

BJP hotupa Amit Shah thusawina hi new Delhi emaw, Gujarat lam daih chu ni se Northeast lam tan pawh a tawrh a la ziaawm deuh dawn a, a sawina hmun hi Lakhimpur, Assam a ni. BJP hian hmar chhak mipuite hi engahmah min ngai lo tih a nemnghet. Media hrang hrang report leh an sawi zauna (analysis) han chhiar phei chuan BJP leh Amit Shah hian India hmar chhakte duh loh em em CAB hi tihtlang ngei ngei an tum tih hi chiang takin a lang tawh a, he thu hi Assam-ah an sawi chhuak leh sak a, Hmarchhak mipuite min tham lohna a ni tih hai rual a ni lo.

BJP hi MLA inthlan dawna ṭanpuitu atan an duh a nih pawhin MNF hian tunah chuan BJP hi an mihran a ngai. He party hian CAB hi a titlang lui dawn a nih chuan Mizoram BJP pawhin ban an inhuam thu an sawi tawh a, tunah hian tihtlang ngei an tum thu BJP President Amit Shah chuan a puang ta. Mizoram BJP hi engtin nge a awm zel dawn? 

MNF hian NDA leh NEDA-ah BJP hi a la thlawp tlat a, hman ni lawka CAB a lapse takah khan Pu Zoramthanga thawh rah ang hialin an sawi chhuak a, a nih tak tak leh tak tak loh chu chanchinbu leh internet chhiar ṭhin chuan an hre vek a, engpawhnise MNF hian Lok Sabha inthlanah BJP an thlawpna hi an inhnukdawk lo a nih chuan CAB an support tihna a ni. Hei hi thup theih a ni lo. "Lok Sabha inthlanah kan chak chuan CAB kan tharthawh ang," titu party an thawhpui chuan CAB an thlawp tihna a ni. 

Amit Shah thusawi hnu­ah Mizoram aṭanga CAB thlawptu party hian candidate an siam leh a nih chuan NGO Coordination Committee hian a dodal ngam tur a ni. 

CAB duh loh vangin total bandh kan nei tawh a, mipui punkhawm leh thuchhuahte pawh siam a ni tawh a, tunah hian Northeast-ah ngei Amit Shah chu lo ṭawng chhuakin CAB kalpui an tum thu a rawn sawi a, he BJP president thlawp zawng hian Mizoramah MP candidate hi an awm ngam tur a ni lovang. Tin, kan NGO lam pawhin nakina, "CAB duh lohna total bandh" tihte ngaihtuah leh ṭul lo turin CAB thlawptu party nih hi Lok Sabha-ah na na na hi chuan an khap a ngai a, Mizote duh loh CAB thar thawh leh tumtu BJP hi thu rual pui tawh loh tur a ni. 

Keini ang hre tam lo, ram vei ve si chu chhungrilah hian rilru a hah tawh a, BJP hian CAB hi lo tharthawh leh ta se, kan Central YMA President leh MZP President thusawi ang khan hnam dangin Mizote min chimralna tur kawng hawngtu a ni dawn tihna a ni a, kan ramah dan angin hnam dang an duh tawkin an awm thei tawh dawn a, chu chu a pawi hmaa kan hmeh mih a ngai a ni.

Amit Shah thusawi, CAB tharthawh tumna avang hian he pa party leh a thawhpui nih loh hi Mizote chuan kan tum tur a ni. Mizoram mipuite hian CAB hi kan duh loh chuan, CAB tih tlang ngei tumtute hi kan thawh pui tur a ni lo. 

He ramah hian zungzam an nei ve tur a ni lova, ṭang­rualin kan hnawl ngam tur a ni. He thilah hian Politics-a party-party tih a hun lova, CAB duhtu party leh a thlawptu hi Lok Sabha inthlan­ah hian an awm tur a ni lo; party lam pawhin CAB thlawptu hi chu kan thawhpui tawh tur a ni lo.