TRAFFIC JAM

Aizawl khawpuiaTraffic jam hi a veiawm bawk a niang chanchinbuah rawtna hrang hrang chhiar tur a awm chamchi ta mai. Motor intlanchhawk dan ruahmannate a’n awm a, a taka hman ṭan mumal pawh awm hma hmain nasa takin kan sawisel a, court lam hial kan lo thlen chawpchilh ta a ni a, a buaithlak hle mai. Helai thu hi thuneituten urhsun taka ngaihtuaha mut-mawh hnar-mawha neih a, chinfel thuai thuai a nih loh chuan he thil avang hian nasa zawkin hun kan hloh phah zel dawn a ni. 

Khawi ilovah pawh kal dawn ila traffic jam-a kan khawtlai dan tur hisap tel loh theih loh a niin a chin hriat tak tak theih a ni bawk si lova, a buaithlak hle zawng a nih hi. Hetiang hi kan khawpui neihchhun leh pui ber dinhmun a nih avangin a siamṭhat dan awm thei ang anga hma lak hi thuneitu leh mawhphurtu chuan bawhzui vat vat zel hi kalpui dan tur ni thei se, tihdan kawng hnih khat leka siam fel leh siam ṭhat mai theih chi pawh a ni hauh lovang. Chuvang chuan hetianga mi ṭhahnemngaiten rawtna leh thurawn hrang hrang an siamte hi lo zir chianga ruahmanna siam zui theitu tur Committee lian tawk siam a nih loh chuan Department mal emaw hmalakna ang chi hi chu tun dinhmunah hi chuan a chak tawk thei tawh lo vang tih hi ngaihtuah a pawimawh a ni. 

1. Bus service siam ṭhat: Aizawla City Bus hi a enkawltu Aizawl City Bus Owner Association (ACBOA) ni awmin ka hria a, anni hian stand pakhatah minute khat leh a chanve (1.5mins) aia rei din an phal lo niin ka lo hria a, mahse, a lo endiktu stand hrang hrangah an neih si loh avang te pawh a ni ang, an zawm ṭha lo va. Stand pawimawh ṭhenkhatah chuan office ban hunlai hian bus ¾ ding khawm hmuh tur pawh a awm ṭhin. Tuna bus kal rei zawng hi kea kal ai pawha a sawt loh zawk chang a awm hial thin. Hetiang hi kan City Bus service dan a nih avangin mi tam takin kal velna atan an hmang duh lo a ni. 

Chutih rualin bus terminal Ngaizel, Kulikawn leh Zemabawkah hian bus ding mai mai ṭhahnem tak an awm reng lawi bawk si a. Heng zawng zawng ngaihtuah hian city bus tam zawk tlan rengin a stand-ah rei tak nghah ngai lovin awm se. Lawn leh chhuk velah naupang leh tar chak lo pawh an lawn ve zung zung theih nan a luhna laite hi rah chhan te pawh awm ṭha se, kawngkhar hnunglama lutin hma lamah chhuk mai ṭhin ni se; minute tinah lo thleng awmin nikhatah bus service zawng zawngin vawi 4 vei tawn hman tur hian a ruahman theih ngei ang a. Chutah chuan a hmangtu mipuiin kan ṭangkaipuiin bus-a vahvel hi kan intihhmuh chum chum ang a, a bus neitute pawhin an hlawk phah ngei ang. Hetih hun aṭang hi chuan Taxi (4 wheeler & 2 wheeler) kan mamawh tlem sawt bawk ang a, chu chuan kan kawngpuia lirthei che vel nasa takin a ti tlahniam dawn a nih chu. 

2. Lirthei over-taking (in lehpelh) khap: Aizawl khawpui chhunga thil hmuhnawm lo leh khamawm deuh pakhat chu 4-wheeler inpel tura kawng sir lam pana an insiam rem mek laia an inkara 2-wheeler rawn inzep zung zung mai 

ṭhin hi niin ka hria. Hei hi accident leh intihpalh awm fo chhan pawh a ni ngei ang. Lirthei khalhtu tam tak chu hetiang avanga mood ṭha lo tak a siam bawk ṭhin. Heng pumpelh nan hian Aizawl kawngpui lunlai Ṭhuampui leh Kulikawn inkarah hian over-taking hi khap ni ta se. Hei hi awmdan a nih chuan accident a tlemin a khalhtute pawh rilru zangkhai zawkin 4-wheeler che vel pawh nasa takin a chak thei tawh dawn a. Chu chuan 2-wheeler kan lei belh zel chhan - traffic jam-ah pawh tlan tlang zung zung thei khan ṭangkaina a neih tawh loh chuan traffic chu a lo tlahniam tial tial dawn tihna a ni ang. Mahni car-a vak chhuak ṭhin tam tak pawhin bus-a veivah an thlang tawh zawk ang a, chu chuan traffic jam khawmawm tak hi a ti ziaawmin, nakinah phei chuan a la ti bo thei dawn a ni. 

3. Assam Rifles rem leh mimal ramah a tam thei ang ber parking hmun siam: Kan khawpui hmun remchangah lirthei parking hi a tam thei ang ber siam nise, chung atan chuan Assam Rifles an chhuah veleh Bazar Bungkawn aṭanga luh theih, Vankhama building ep lama luh theih tur te, AR ground aṭanga luh theih tur te, D.C. office aṭang te, Agriculture office aṭang tea luh remchangah leh Sainik Rest-house bul, Khatla aṭanga luh theihah parking siam ni se, heng bakah Chanmari leh Zarkawt lam aṭanga hman theih tur a dang buatsaih ni se. Chungah chuan khawpui lun laia lirthei park ṭhin zawng zawng hi a dah fel vek theih ngei ang. 

4. Kulikawn - Ṭhuampui inkarah road-site parking tih loh: Kan khawpui laili leh hmunpui ber berah kawngsira lirthei inhung ṭhup reng mai hi kan khawlai min ti nuam lotu leh kawng ticheptu a ni. Droping zone pawh awm mumal thei lo khawpin hmun an luah reng mai hi a fel lo. Chuvangin, sawrkarin parking ṭha a siam a, kan hman theih hun hunah hei hi tihtawp chi a ni. 

Heng rawtna 4 te hi kan tih puitlin theih chuan sawrkarin hmalak a tum mek kawng chhawng, fly-over 3 leh Parking House Support Scheme (PAHOSS) te tel lo pawh hian tuna kan traffic jam hi chu a ziaawm phah thei ang; heng nen phei hi chuan kan tu leh fate leh an thlahte thleng pawha khawpui nuam leh hadam zawk, rilru thlamuang taka kan vah vel theihna khawpuiah Aizawl hi kan chan leh thei ngei ang tih a rinawm.