Mizoram ṭhanmawh bawk chu...

Mizote hi kan mak khawp mai, kan changkang viau a, kan hawi zau hle emaw kan tih hnu pawh hian kan hnathawhna field lo lamah kan inrawlh nasa mah mah a. Kan chhungkua, kan fateah ni loin mi fa sual enkawl ṭhat tum lamah te hian kan tui viau zu nia! 

Politician-in zawm chuang hlei loin Pastor emaw an inti a, Pathian thu an sawi piap piap mai. Lawyer-in zirlai hruaitu nih an tum a, zirtirtuin zirlai aiin Kohhran leh khawtlang an buaipui zawk bawk. Sorkar hnathawkin an hna aiin kohhranah an thawk nasa a, mitthi ral leh huai huai te hi an ta neih chawt nia! 

Pastor-in politics an sawi nasa ta viau bawk nia. Gas buk dik a awm lo a, buhfai bag buk tling a awm lo a, petrol pawlh dal hi Mizorama kan hmu phak tawk a nia a, Assam vai ho an lungawi loh chang phei chuan kan inchuh luih luih ṭhin! 

Vairam khawpui deuh deuhah tun hnaiah ka zin a, an ṭhalaiten hna kan thawk sup sup mai; keini chu kan khaw­laiah kan ṭhalaite hnathawk loin an leng suau suau thung. Kan khawlaiah ṭhalai la naupang te te ruih nei niawmin an bu luk luk a, zan lamah lah mahni ina haw nachang pawh hre loin an tei suau suau bawk. 

Ram leh hnam humhalh nana ṭha ber chu rinawm tak leh taima takin mahni hna ṭheuh hi thawk ila. Tun aia nasa hian hna thawk ila, kan beisei ang hna ṭha ber ber kan hmu fuh rih lo a nih pawhin tuna i hna neih ang leh i thawh theih ang tawk kha thawk phawt mai teh. Vai thawh tur awm lo khawpin Mizorama kan hna thawh tur neih ang ang hi hna thawh tur hre lo ṭhalaite hian thawk suau suau mai ila, ti chuan ram leh hnam chu kan humhalh chiang khawp ang. 

Mi kan tehna chu a hnathawhah a rinawm em, a taima em, a hnaah a thawkrim em tih hi ni zawk se. Tunah chuan Kohhranah eng nihna nge a chelh, NGO ah eng nge a nihna tih hi kan tehna a ni a. A hmei a pain lem kan chang luih luih a, a chang thiam thiam mi zahawm an ni ta mai niin a lang. Takna nun nei loin lemchan nun kan ngaisang a, lem kan in chan thiam siak mai mai a ni. 

William Shake­speare khan, "He khawvel hi lemchanna tualzawl a ni" a lo tih kha a dik tulh tulh mai Zofate nunah pawh hian. Hawh u, mahni hna ṭheuh taima leh rinawm takin i thawk ang u. Mi corrupt te pawh hi ngaisang ringawt tawh lo ang a, dik taka sum lalut te hi hausa lem lo mahse entawn zawk ang u. Corruption hi sum eirukna chauh a ni lo. I hnathawhna hmuna hnathawk tur i nih laia hmun danga i awm daih kha time corruption a ni e.