Mizoram Budget a tlahniam 2019 Budget pha lo!

Pawisa hlutna a tlakhniam a, thil man to in ram economy a nghawng dan leh a hlauhawm dan chhût nana tehfung mithiamten an hman ber chu 'inflation rate' hi a ni. Inflation rate a san chuan ram economy tan a hlauhawm a, a hniam chuan pawisa hlutna a sang a, ram economy tan a ṭha tiin an sawi ṭhin. 

Tun budget session-a an pharh tak Mizoram Eco­nomic Survey 2019-20 aṭanga kan hmuh chu kum 2019-20 (as on December, 2019) atana Mizoram inflation rate leh a thar ber ni bawk chu 7.12% a ni. Nikum 2019-20 Mizoram State Budget cheng vaibelchhe 10692.30 kha kumin 2020-21 ah chuan a hlutna chu cheng vaibelchhe 11,453.59 a ni tawh tihna a nih chu. Hetih lai hian kum 2020-21 Mizoram state budget chu cheng vaibelchhe 10715 chauh a ni thung. Pawisa hlutna inangah kumin budget-in nikum 2019 Mizoram budget a phâk lohna chu cheng vaibelchhe 738.59 teh meuh mai a ni. 

Mizoram Chief Minister Pu Zo­ramthanga chuan, "Kan budget hi Central-in a dah dan chuan 'tuikhurpui, tuikhawh lut zur zur lehlama liam zur zur bawk duhtawka chawi tur awm" tia a sawi laiin kum liam ta 2019 budget pumpui aṭanga sum indaihlohna, sum pûka hnawh khah ngai, 'Fiscal Deficit' Mizoramin kan neih zât chu cheng vaibelchhe 2215.09 lai a ni leh lawi si. 

Hetiang taka Mizoram sum leh pai dinhmun a chhiat avanga buaina kan tawh mêk laiin kan state hotupa ber CM Pu Zoramthanga'n ṭawngkam thlahdah taka a la chhak chhuak duh fo mai leh MNF kaihhruai Mizoram sawrkarin ro an relna kawngah inrenchemna tel hauh lova an khawsak ṭhin avangin Mizo­ram mipui tan a beidawn thlakin a lung­chhiat thlak takzet a ni.