Kei leh tun MP inthlan

Khawnge kan dam thleng ang em, kan la fit ang em, kan la tui reng ang em, Pathianin rem min tih pui leh ang em tih pawh hriat ni suh... The 17th Lok Sabha Election 2019, India's General Election, World's Largest Election ni bawk, phur em em leh theihpatawpa ka'n lo in borti ve em em na chu a final hrih nan i han thlir let leh lawk teh ang. Lung lam lam a ti leng mai dawn alawm le! Kei leh MP inthlan: Statistical observations tiin kan dah thei bawk ang chu. 

1. Tun ṭum MP inthlan kha ka piana hnulama political election hrim hrima ka vawi khat telna a ni. VC election tak ngial pawh la hmachhawn map lo leh eng party-ah mah la tel ve ngai hauh lovin vote pawh vawi khat chiah la thlak ve-in direct lutuk tak maiin MP election ka'n hmachhawn ve rup a nih kha. Kan RO lahin ...Pu Hriat, hei Polling Agent appointment na tur form a nia tiin lehkha tel khawm chhah lutuk tak mai min han chhawp hnawr mai a. Mizoram pumah Polling Booth 1000 chuang a awm tih kha chu ka hre ru ve khiah a. Ka pu, Polling Agent chu ....a neih loh theih em, neih loh in phal em ka ti let thung a. Phal e ...a tih avang chuan.... Polling Agent pakhat mah nei lovin kan tlingtla ta reng a ni. Tun ṭumah chiah hian a ni Polling Agent leh Election Agent danglamna ka hriat hran ve ni. Kawng lehlamah chuan phur ve hle e ti lo chuan ‘blind’ rem rem tak ka ni. 

2. Election campaign lah a pui lo nangiang. T shirt kan siam ve a, kan symbol tur anga kan ngaih Mombati 2 picture kan chhu kai ve va na a, chutah kan Symbol chu ECI-in Motor Ke (Tyres) 4 in min rawn thlak sak leh bawk si. Pamphlets leh sticker tam tham ve tak chutiang bawk chuan kan lo siam sual hman bawk a. Kan sum sen ve na 90% deuh thaw chuan mumal takin awmzia a nei ta lo kha a nia. Motor pakhatin kan veivak deuh ber a, District Headquarters-ah Press Meet kan nei ve hlawm a, zin kawngah phur takin kan pamphlets kan sem ve ngei a...tih loh chu campaign thang huam dan kan nei ve ta lo. Zin kawnga thingpui dawr kan chawlhna te chu kan Block President kan nih tir hmiah hmiah zel mai a ni. Duh thalin MP LAD fund an hman duhna tur lo ngaihtuah a, lo ziak chhuak lawk chiam turin kan hrilh nghal deuh zel bawk. Kan nuih duh bik loh avangin kan fiamthu a ni tih an hre mai bik lo fo. 

3. April ni 11, 2019 chuan kan inthlang ta ngei a. India ram pum inthlan a ni bawk a, chhawng 7 teh meuhin kan inthlang a. Election result rawn chhuah fel, ni 23 May chhung chuan thla khat leh a chanve dawn lai a tla hman tihna a ni. Mizoram Parliamentary Constituency 1 kan neih ve chhunah chuan vote nei zat aṭangin 63% bawr vote a tla a, chu chu vote 4,99,621 tla tihna a ni. Mizoram bik leh National average-ah pawh MP inthlan atan chuan vote tla ṭha thawkhat anga ngaih a ni. Kei pawhin vote 12,675 lai hmu vein, chu chu vote tla zawng zawnga mi 2.53% zelin min vote ve tihna a ni. Khami nia vote thlak tura kal zawng zawng mi 1000 i tawh a, mi 25 zel khan Hriata Chhangte chu an MP atan an vote ve tihna a ni. He percentile hi eng ang hisap pawhin ka ngaisangin, ka lawmpui ve em em a ni. 

4. Result hi han biah chiang ila, Mizoram bikah khan vote thlak nan EVM (Election Voting Machine) 1189 kan hmang a. Polling booth tam berah thingtlang lamah chuan chung polling booth te kha EVM 1 nen zel an inchhawp laiin khaw lian leh Aizawl khawpui-ah chuan polling booth/ station 1 ah EVM 3/4 lai te pawh an inchhawp bawk. EVM 1189 ah hian average-in kei chuan EVM 1 zelah vote 10.66 (vote 10 awrh) hmu ang ka ni a. Mizoram pumpui chhungah EVM 1 ah chiah vote 100 aia tam hmuhna ka nei a. Chu chu, kan veng bik, New Serchhip bazaar venga EVM, New Serchhip-I niin chutah chuan vote 162 ka hmu lawih thung. Kan ṭhenawm khawveng te'n tih tak meuha an veng pa min vote avangin ka lawm tak meuh meuh a ni. N Serchhip pa nih an ti nuam hle mai. Kum 1980 bawra kan venga Sunday tlaia zu rui phur lam vel ṭhin hovin... New Serchhip nuam lutuk suh ....an tih ṭhin kha vawiin ni thlengin ka la pawm e. 

5. Mizorama Assembly Constituency 40 ah Constituency 9 ah chiah vote 500 aia tam hmuhna ka nei leh a. Heng 9 a 8 hi Aizawl khawpui chhunga mi te an ni hlawm. A dang pakhat erawh chu ka pianna khua Serchhip Constituency a ni. Serchhip khawpuiin an khaw tlangval theihpatawp chhuahin party inbeihna nasa tak kara min vote huk avangin “Thank You Serchhip” ka ti lo thei lo. Tin, vanneihthlak taka duhthusama thil thleng leh chu maw.... tuna Aizawla ka chenna, Kulikawn hian ka MP in candidate ve chu mak deuh maiin min tuipui pek a. Mizoram puma Constituency khata ka vote hmuh sanna ber chu Aizawl South II niin Kulikawn hovin an makpa min duhsak luatah vote 869 ngawt ka hmuh daih chu maw le! Aizawl South II result en ringawt phei hi chuan Hriata Chhangte hi Extreme Independent candidate a ni tih pawh hriat mang loh khawpin, pa bright lo deuh tan phei chuan ka vote hmuh dan en ringawt se, Aizawl South II ah chuan Pu Hriata Chhangte hi e law, ruling Party candidate an ti hu hu....ngei ang.... "Dear Kulikawn, a huge huge thank you." Aizawl veng hlun ber nge nge...in bon e. Tin, ka lawmna leh em em chu ka vote hmuh chanve deuh thaw, ka vote hmuh aṭanga 47.41% hi heng Assembly Contituency 9 aṭanga ka vote hmuhte zu han nia maw le! My beloved Aizawl, i love you too, u r no less than their Paris or New York... Thank you for your huge support. 

6. Thil awm ang reng ve em em leh chu... heng EVM 1189 ah hian vote khat mah hmuh lohna NIL or Zero vote hmuhna EVM 90 ka nei pek a. Midang zawng zawngte'n min vote duh bau loh lai pawha kei chu Hriata Chhangte ngat lo chu ti lui tlat mi pakhat luhlul lui tlat awmna, EVM a serial no 4 hmet lui ve tlat awmna 122 a awm leh bawk. Heng mi pakhat, mi luhlul, mite ngaihdan ang lo tak pawha mahni dik tih leh duh zawnga mal tlat ngat ngam ho hi ka tan chuan in va hlu teh reng em. Keima Vanram kai tur list siamna bu-ah chuan in hmingte hi Gold Plated Letter a ziah luh vek in ni, a remchan dan ang angin mimal takin ka la rawn zawng chhuak vek ang che u. 

Inthlan leh hma ngeiin.... (Khawngaihin in hming leh in polling booth hming ka whatsapp number 8902058606 ah hian min rawn pek theih chuan ka lawm ngawt ang. In hnenah thinlung taka lawmthu sawi ka duh). Thil nuihzathlak, lawmawm ka tih angreng deuh bawk erawh chu heng Polling Booth vote khatmah (zero vote) emaw vote khat lek ka hmuhna hi booth tereuh te te, hmun kilkhawr tak taka awm te an ni hlawm a, a tam ber chu Mizo dik tak awm lohna niin Chakma/ Bru ho tamna khua/ booth te an ni hlawm. Entir nan, Tuichawng bialah ringawt sawn vote 1 emaw 0 ka hmuhna hi an bial chhunga EVM 62 ah 40 ngawt zu nia. Chakma unaute hi tih leh dawn chuan in nel tir deuh dan ngaihtuah a ngai hle dawn a ni. 

7. Ka nuih zat bawk si ka lak nat ve em em loh theih lohna khua/ booth a awm. Chu khua/ booth ah chuan vote 81 a tla a, vote khat mah ka hmu lo hlauh va. Chutih rual chuan NOTA ah mi 1 in vote a thlak thung. He khua hi ka hman hmasak berah va tlawh chhuah a, ‘khawtlang ruai’ te va ṭheh sak hial ka duh. A vang chu kha NOTA a vote/ chhu khuttu khan ...eng vang teh chai chuan nge Hriata Chhangte chu NOTA aia a vote zawk loh tih hi ka hrechiang chak em a ni. 

Min vote tute 12,675 hnenah lawmthu ka sawi rual rualin, in mi duhsakna leh nawr kal leh zelna vote hi hlu ka tia, in chungah lawmthu ka sawi tawk zo ngai dawn lo. Chhan hrang hrang avanga min vote ve ta lo hote pawh min ti phurtu, min ti ṭang zualtu in nih avangin leh Hriata Chhangte chu MP atan chuan a ṭha, mahse Party a based si lova, a tling zo dawn chuang si lo...min ti hote khan.... Party based tur ṭha deuh min kawhhmuh teh u khai. Nih loh chuan keima zawn zawna ka zawn zawngin in ṭek leh nasa hle si palh ang e. Engkim avangin Pathian chunga lawmthu sawi chungin kan thawk theih ve ṭawk ṭawk chhung chu....hawh u Kristiante Pathian, Mizoram leh Hnam tan theihtawp chhuah zel hi i ning lovang u aw... Jehova Jire.