CAB kan hlau tak tak lo?

Citizenship Ammendment Bill chungchang hi ngun taka chhiar a, mithiam hrang hrangte thuziak aṭanga en hi chuan inthlan dawna a chhan tak hriat mumal loha ‘Hnam Hnatlang’ kan tih ai khan a issue hi pawimawh zawkin a nghawng pawh a na zawk a. Ka beisei angin mithiamte hian an bawhzui lovin an sawi tam lova, CAB hi a tawp taah kan ngaih chuan kan tisual let der dawn a ni. 

Hnam Hnatlang kha chhut let ta ila mipui khan kan la thutakin kan vei tak tak a, mahse eng chiah kha nge kan hnatlan chhan kha tih leh kan hlawhtling ta nge hlawhtling ta lo? 

Khatihlaia ‘Sha­shank Out’ kan tih kha sorkar hnathawk pakhat ve mai a ni a, a thil tih kan duh loh em em pawh kha kan Home Secretary Pu Lalnunmawia Chuaungo thil tih dan a ngaimawh thu Election Commission of India lamah a thleng vang a ni a, ‘Hnam thil tak tak a ni lo,’ ka tih chuan min dem mai thei a, kha kha CAB angin hnam thil tak tak a ni lo tlat a ni. 

Mizote hi thil ngaihtuah chiang lo tak kan ni an tih teh fo hi he CAB-ah hian a lang chhuak niin ka hria. Tlema ngaihtuah peih deuhte lah hi political career ngaihtuah rana NGO-a awmte an ni deuh mai a, mipui nawlpui hian CAB hlauhawmzia leh nakina kan ram leh hnam bakah sakhua thlenga a nghawng theih dan hi kan mithiam zingah ziak an awm mang lova. Politics lam hawi deuha ziak loh phei chu pali panga bak hmuh tur a awm lo kha thil pawi tak a ni. 

CAB hi tunah hian a thi lova, a hahchawl angin kan sawi thei ang. Chutianga kan sawi theih chhan chu BJP President Amit Shah khan, “Lok Sabha-ah kan sorkar chuan CAB hi kan kalpui dawn,” tiin Assam-ah a sawi leh ngat a ni. 

Lok Sabha-ah BJP hi an tlin chuan CAB hi kan nei dawn tihna a ni. Mizoram aṭangin kan dang thei dawn lo. CAB hi kan duh lo tak tak a, kan hlau tak tak a nih chuan Mizorama NGO-te hian, “Lok Sabha-ah CAB duhtu BJP candidate vote loh tur,” tia au hmiah hmiah a hun tawh lo maw? 

Lok Sabha-a BJP an tlin tawh hnu chuan MKHC tana ṭawngṭai pawh a thawk nep sawt dawn a, Lok Sabha inthlan hma hian CAB duhtu kan ramah an din kan phal loh thu hi kalpui ila, chu chuan CAB kan huat leh huat loh a tilang thei dawn a ni. 

Tunah hi chuan NGO hruaitu 100 bawr vel bak hian CAB hi kan vei tak tak lo a ang khawp mai.