ARUNACHAL PRADESHBUAINA LEH MIZORAM HMABAK

Tunhnai maiah kan ṭhenawm state Arunachal Pradesh-ah chuan buaina nasa tak a chhuak a, mi ṭhenkhatin nunna an chán hial a nih kha. He buaina lo irhchhuah chhan chu Non-Tribal-te hnenah an ram chhunga inbenbel phalna Permanent Residential Certificate pek tumna dân an rorelna dawhkàna an pharh vang a ni. An Deputy Chief Minister chènna in leh Environment & Forest Minister shopping complex an hâlsak mai bakah motor eng emawzat an hâl chhe bawk. Hetiang hian Tribal status chungchangah leh inbenbe lngheh theihna chanvo pèk tumnaah pawh an thîkthu a chhe takzet tawh a, an ram neih chhun chu an keipui sa hauh mék a ni. 

Citizenship Amendment Bill-in NE States te thinlung a hliam mék laiin Tribal ni lo te hnena an rama inbenbel phalna dân an pharh ngam mai hi ngaihtuah chian chuan tihawm lo tak pawh a ni ngei ang.Amaherawhchu, hnam hrang hrang inchiahpiah an nih tawh vangte, an state chhungah Non-Tribal eng emawzatte an inbenbel chhoh nasat tawh vang pawhin hotute lamin nawrna nasa tak hi an do zo lo pawh a ni thei. Ṭhenawm state Meghalaya te pawh an harh chhuah meuh chuan hnam dang kutah an lo tlulût fel der tawh a, Tripura pawh an bâng chuang lo; Manipur pawh sawi thui ngái loah ruat ang. 

Hetiang buaina hi kan ṭhenawm ramten an tawng baw mék tawh a, kan inhumhimna kulhpui ni mék ILP neih ngiatin Meghalaya leh Manipur te pawhin kawng an dang rap rap ṭhin a, mahse hlawhtlin ni erawh an hmu lo chu a nih hi. Keini Mizote ngèi pawh hi lungmuanga ṭhu mai mai thei kan nih lohzia kan hriat chian a ngai takzet. Min hual veltu hnamdangte hi ILP-in min hung chung hian chhiar sèn loh an lo lut ruih ruih mék a, Rail-in Sairang a lo thlen hunah phei chuan kan invéng séng lo ang tih pawh sawi a har khawp mai. 

Chhim lamah ni se Chakma kan véng zo tawh lo a, kan ram rorelnaah thûk takin ring an rawlh lut mék bawk a, thlang lam aṭangin hnam tènau in bû an lo khuar chho mék zel bawk. Hetiang em ema ramri ngaihsak lohna ram hi khawvel ramdangah hian awm ve tak ang maw? Kan chanvo min lo chuh pui chho mék zel a, hnam dang leh ram dang mi tia kan chhàl mékte ngèi chuan kan Zoram hi sah hèk tumin beihpui an thlâk ta a nih hi! Hnam zuamawm tak kan lo ni zo ta em ni le? 

Kan dan te hian min chhanhim reng em? Mizoramah hian Non-Tribal tan in leh lo, hmun ram a neih theih loh tiin kan sawi mai ṭhin. Amaherawhchu, hei hi ngaihtuah chian ngâi tak a ni. The Mizo Distict (Transfer of Land) Act, 1963 Section 3-ah hian heti hian a inziak. “No land under the District Council (Mizoram) shall be mortgaged, leased, bartered, gifted or otherwise transferred by a tribal to a non-tribal, or by a non-tribal to another non-tribal except with the previous permission of the Executive Committee (government). 

He section hi han bih chiang ila, non-tribal te hnena ram hralh emaw, hawhtir emaw, dahkham emaw hi sorkar phalna leh hriatpuina lo chuan phal loh a ni tih kan hre thei ang. Amaherawhchu, sorkar phalna lâk chuan hralh, dahkham leh hawhtir theih a ni leh thung si. Khap bur chu a ni lo tlat a ni. Hetih lai hian RBI-in a pawmpui Bank te, Financial Institution, etc., hnena dahkham erawh phal a ni thung. 

Hetiang hi kan dinhmun a nih lai hian kan ramah hian khawtual mi ṭhenkhatte chuan pawisa hmuhna a nih dawn phawt chuan tiin kan hming hawhtirin sumdawnna kan din chhoh sak a, a hlawkna tlêmte kan lo tèl sak lai hian building ropui tak takte hi a neitu chu hnamdang, a hmingputu erawh Mizo hi an ni fur tawh a ni. Sum leh hamṭhatna kan hmuhna a nih dawn phawt chuan he kan ram leh hnam hi hralh kan pawisa tawh miah lo a, in luah chungchangah pawh kan hnampuite aiin hnamdang kan duhsak zawk tlatna te hian hnamdang tan kawng kan hawnsak zel tih kan hrethiam pha kher lo ang. 

Sumdawnna kawngah pawh thûk takin kan ram hi an thunun chho mék tawh. Vai mistiri ṭhenkhatte hian motor lian, truck pathum pali vel an nei fer fur tawh a, kan ram ngèiah registration an ti nghal a, Mizo in sâten hnam dang Vái kutah dahin duh tawkin balu, brick, cement leh rod supply chungchangah pawh Mizote hi min rawk mék a ni. He’ng hnamdangte erawh hi chuan anmahni hnampuite hi an induhsak zel a, hlawkna insem tlángin Mizote hi min rawk heuh heuh mai chu a nih hi. Zâwi zâwiin an in bengbel chho zel a, zung an kaih nghet zel a, he rama châm hlen hi an tum zel a nih hi maw. 

Hnam boralna hi kum hnih thum leka lo thleng thut a ni lo a, hnam dangte lo in bengbel chho hi bûngin zung a kaih ang deuh hi a ni a, a zung a in zar pharh zau zel a, a nghet tial tial ang mai hian tuna kan rama hnamdang min lo chîmtute hian zâwi zâwia lo in béngbel chho zelin, an hnampui tan kawng an hawn sak zel a. Eizawnna kawng an in dap pui zel a, Mizorama cham hlen dan ngawt bengsikin an ngaihtuah ṭhin.

Kan ram chhim lama ram dang mi in bengbelte pawh hian zung an kaih nghet tawh hle a, kar phawng leh turin mipuiin engtiang pawhin nawr mah ila a sâwt tawh lo chu a nih hi. Kan ram sah hek tumin thapui an thawh mék a, keini awmhmunah kan lo phái hnah hriam a, tapchhak zawlah kan lo inseh ruh ngam ve ṭawk a nih hi. He Zoram venghim a, lo sahhualtu kan pi leh pute hnung hi kan zui zo lo chu a ni e. Eng pawh lo thleng se la, kan phun lungawi ve mai zel a, kan aiawha kan thlan lal kan hruaitute chuan hmalak a hnehin ngawih an chuh hlauh thung! 

Ni e, kan ṭhenawm state te angin kan thîkthu tichhe ngam ve lo mah ila, he ram leh hnam hi hetiang zela kan phalrai zel a nih chuan kan tuchhuante chuan ár hmâi tiat lekah lo in bengbel ve in Mizoram hi history angin an lo la zir ve mahna le. Kan hruaitute lal hrawtna leh an thuneih hun chhung tâwitè a inchhek arbawm an thlakhlelh viau lai hian he Zoram ṭhalaite moral erawhin chhiat lam a pan zel a. Thawkrimte hlawhchhamna ram, thlan tui far te beidawnna ramah hian kan ram hi hralh hreh na rêng nei lo mi awkhrawl leh pamham lo chhuak ruih ruih mahse in dem tur kan awm lo ang. 

State dang te dungthûlin kan rorelna dawhkan aṭang ngèi hian Zofate rawh ralna tur meipui hi hnam dangte hian an lo la chhep ve lo ang tih a hlauhawm hlel love.