RAM CHUANG ZAU TIH KHA

Vanglaini ni 21-2-2019 chhuak phek khatnaah khan kan Chief Minister thusawi han ziakin, Mizoramah boruak mela teha Square Kilometer 21,000 ram ruak ala awm a. 

Hei hian pang a neih theih vek avangin, ram ruak a nih theih chin chu Square kilometre 30,000 vel niin, hei hi chhungkaw tinin ṭin 40 vela insem theih a nih thu a sawi kha han chhuah niin ka lo chhiar a. Hetiang a nih chuan ram chuang kan la ngah hmel hlein a lang a, han ngaih mai chuan a la thlamuan thlak hle kan ti thei awm e. 

Mahse a nihna tak han chhut chian chuan kan CM sawi ang hi kan nih hmel tlat lo. Khawi khuaah pawh han kal ila, ram chuang neih mai tur han zawng ta ngat ila chu kan hmu mai chuan a rinawm lo. Ram ruak leh ram chuang hi Mizo luah khua leh ramah chuan a van hmel hle! Ram la neih ngai mang loh awm tak tak, ramhnuai deuh lai te pawh hi mi ram a lo ni leh zel ṭhin si. 

Tuna kan CM-in Bamboo Mission kalpui a tum pawh hi mi tam tak chuan ṭha tiin, kalpui pawh han tum dawn sateh mah sela, tuna an dinhmun angah hi chuan ram nei sa tan lo chuan chil putin an thlir liam ringawt maiin a rinawm. Ram ruak emaw kan tih tam tak hi chu han bel chiang ila, mi ram a lo ni leh zel a, V/C Pass an lo nei deuh zel bawk si.

Tuna ram la nei ve lote tan chuan ram neih hi thil harsa tak a ni. Kan hotupa berin a sawi pawh hi han ngaih mai chuan a dik hmel fu a, mahse han luh chilh tak tak ralah chuan ram ruak hi a awm hmel vak tlat lo a ni. 

Hetiang a nih avang hian kan sorkar hian thingtlang khua a ram nei tam takte hi han verify sela, thlai chin nana hman loh, a thu phunga ram neih mai mai, V/C-in kum engemaw ti kal liam taa an lo pekte hi han nuai bo vek sela a ṭha hle ang. 

Tunah tak hi chuan mau put dawn emaw thing lukham tur put dawn emaw mai mai pawhin mi ram ami kan sat leh ringawt zel zawng a nih hi! Ṭhenkhat a fing verther deuhte leh duham deuhte phei chuan mi pakhatin ram hmun li/ nga-ah, enkawl mang hleih lohvin an nei fer fur mai zawng a nih hi. 

Kan sorkar hian a Bamboo Mission a kalpui hma hian ram hi chingfel hmasa phawt sela a ṭha hle ang. 

A leh a lamah thung chuan tun kan sorkar thar zet chu a thil tumah a chiang kan ti dawn nge ni, kan Aizawl khawpui laili lai taka Assam Rifles Headquarters awm lurh mai pawh Zokhawsanga sawn chhuahna turin sorkar laipui aṭangin order a lo chhuak ta ut mai. 

Kan sikul ṭan hun lah thingtlang ei­zawngtute mil takin dar 9-ah an han sawn leh ta nghal nen. Chhungkaw buai deuh leh fanau chaw kaw puara ei lote lo vei em em tute chuan lawm avangin beng thleng thlengin an ke an khai thei mai dawn alawm le! 

Hetiang a nih lai hian thingtlang pa, ram nei ve lote hmakhua hi kan sorkar hian han ngaihtuah pui vat sela. An bamboo project, ‘Golden Project’ ti hiala sawi thiamten an sawi ṭhinah ngei hian chanvo an neih ve theihna tur hi han ngaihtuah pui vat sela tih hi thingtlang ram nei ve lote ṭawngṭaina a ni ta e.