MIZOFED 24hrs vs Tuikual

MIZOFED Petrol Pump tia kan hriat mai ṭhin, Treasury square a awm chu mipui tana remchan zawk nan darkar 24 chhung dawr theiha hawn turin Cooperation Minister Pu C. Lalrinsanga chuan hmanni mai khan a hawng a ni.  

Hetianga tlaivara he petrol pump hawn a nih chhan nia lang chu mipuite tana remchan zawkna a nih beisei vang a nih hmel a, MIZOFED Ltd. lam hian hetianga remchanna an siam hi mipui tan chuan a lawmawm ang. 

Hetihlai hian helai veng neitu Tuikual Veng hian an veng chhungah eng dawr mah zan rei thleng thlenga in hawn an phal lo ve thung a. Hei hi tun hma aṭanga an lo kal pui tawh ṭhin a ni a, hetianga veng chhung an vil a, an duty a, dawr inhawng rei deuh te pawh an khar tir fo tawh hnu hian MIZOFED Ltd. hian zan lamah petrol pump hi tlaivara hawn an tum ta tho a ni. 

Mizo mipuite kan tam ve tawh angin kan inngai a ni maithei a, mahse mipui nuai 10 chuang awrh chauh awmna kan nih avangin zing lam dar 2am/ 3am thleng thleng petrol mamawh chu kan awm tam lo ang. Rikrum thilah zan rei hnua petrol mamawhtu chu mi pahnih thum an awm thei ngei a, mahse zan tlaivar ṭhlaka dawr hawn a, customer an awm emaw awm lo emaw duty tlaivar hi a ṭul kher lo e.  

Mamawh zual mi 2/3 an lo awm a nih chuan pump-ah hian kaihthawh theih turin duty mi pahnih vel te riah tir mai ni se, tichuan rikrum thil leh laklawh thila petrol lak ngaite chuan kai thoin petrol la mai rawh se. Tuikual veng hian hun rei tak ata tawh an veng chhungah zan rei thleng thlenga dawr inhawn a phal lo a. Tun hnaia mipuiin an lawm em em ei tur zuar, Food Truck te pawh an inkhar tir niin facebook ah kan lo hmu a. Veng chhung in kaihhruaina dan te pawh a zahawm ve. 

Tuikual veng NGO te duty dan kalphung kan bawh chhiat sak ringawt mai tur pawh hi hriatthiam a har tlat. Tin, pump boy te hi Mizo kristian an ni a, inkhawm chhung chauh an inkhar dawn a, Sunday ah tihluihna hmanga hnathawh tir an ni tur pawh hi dan kalh a ni hial lo maw? Mahni sakhua zalen taka biak hi India mi te mimal zalenna a ni ve asin. 

Right to equality kan sawi ṭhin a, tunah petrol pump-a duty te chu Sunday ah pawh duty tir an ni dawn ta a, chawlhkar khata ni khat em pawh chawlh nei loa duty hi a dik lo bawk. Staff te an in duty chhawk a nih pawhin Sunday a duty bik nih hi a hreawm ngawt ang le. Hetiang ruahmanna hi ṭha deuh anga lang, midang rahbeh tumna te pawh a ang tlat mai.  

Tin, hetianga a veng neitu lam hmai pawh zah lova Sunday te nen lama kan inhawng zan khua tawh dawn a nih rau rau chuan, kan lirthei tichhetu a black a petrol zuar ṭhinte leh tuialhthei khawih chingpen te pawh hi tireh law law se. A dik zawngin power hi hmang teh ang u.