Mipui mangang koh chhuah SRS

Tunlai hian SRS demna a nasa hle a, na tak taka SRS chungchang sawi an awm bawk. A thli beng zawng ni a ngai, lamṭang an ngah dawn nia hria thu belh deuh nei a ri deuh hluai an awm bawk a ni.  Hei hian boruak a vaw alh niin a hriat. Thil hi kil khat aṭang chauha thlir chi a ni lo ang. A chhan chu SRS te hi Mizo mipui mangangin a koh chhuah an nihna lai hi a awm tlat a ni. 

Mizoram hi ruihhlo kal­kawng a ni a, a kawngah na na na chuan a bua a lo awm a, a bua awm ringawt pawh hi Mizo mipui tlemte timangang tham a ni. Mizoram zimteah hian a tlem berah drug addict hi mi 6000 chuang fe chu kan kawlin a rinawm a, SRS te hian ruihhlo hi um tawm lo sela chuan a let engemawzat laiin an pung thei ngei ang; hei hi mipui nawlpui ngaihdan pawh a nih a rinawm. 

Ruihhlo buaipuiin kan ṭha­laite khawlaiah an tei suau suau hian mipui a ti mangang a, tunge an koh tak? Tuna SRS te dem em emtute hi a kotu zingah an tel ve maithei. Engnge kan au hla... "YMA khawihah nge... YMA-in ruihhlo a do ngam lo em ni? tih a ni. Khawiahnge Excise leh Police te, ti an awm ngai lo. I vengte hek suh, tih ṭhan hnan tlat leh intihhmuh ching Mizo zingah ruihhlo hi dan hmanga um bo chi rual a ni lo. Tumah hian ṭhenawmte ruihhlo zuar Excise leh Police hnena thlen duh kan awm lo. Vengte hekah kan inngai tlat zel. Ruihhlo chungchangah hian sawrkar uisathiamten theih tawp han chhuah ve mah sela dan kharkhip hnuaiah an che hlei thei lo. Ruihhlo zuar an han man ve a, ruihhlo zuarte hi chuti maia jail a khung beh theih an ni lo, ṭhenkhat ti ti-ah phei chuan jail-ah ni hnih khat an awm a, bail-in an chhuak a, an haw kawngah ruihhlo hi an zuar zui leh mai, an ti ṭhin. Tak tak a nihna chen a awm hial mai thei. 

YMA hian an kuang lo an lo nawr palh a, an huang lo an lo dai palh a nih pawhin... an kuang lo nawr a, an huang lo daitirtu chu Mizo mipui mangang au aw a ni. Sawrkarin ruihhlo a do hneh lo lutuk hi a ni, kan ti thei bawk ang. Tin, SRS te hi police te anga training nei thlap an nih loh avangin ṭhenkhat hi chu an discipline-ah ṭhat tawk lohna an nei ang tih rinawm. Mizoram mipuite hian ruihhlo-in a chim ral kan duh lo a nih chuan SRS member-te hi hriatthiamna chin kan neih a ṭha-in a rinawm a, engemaw hleka ṭawng a taka ṭawng chhe tak tak leh tlem belhchhaha kan bei vak mai ṭhin hi chu a fuh ber lo ang. 

Ruihhlo doa thapui thawha bei turin Excise & Nacotic Dept. han dawr teh... sipai an indaih lohzia an lo hrilh ang che a, ruihhlo do tur chuan sipai lak belh an ngaihzia an lo hrilh ngei ang che. Ruihhlo zuar tei suau suauten an hel reng mai kan ṭhalai/ kan fate avanga mangan tawh lai laia state sum bawm ruak kara hna lak chawp, damdawi thawk muang tak leh thlamuanawm lo tak a ni ngei ang. A thlamuan thlak lo a ni. 

Police Department han ṭah awh teh... ruihhlo do a thapui thawh turin mihring an nei lo. Hemi piah lamah hian Police leh Excise zingah ruihhlo thliin a nuai, an ruihna khawp nei daih bik lo an lo awm a, heng mite hi ruihhlo zuarte tan CID ṭha tak an ni mai. Excise duty tur hre thei em em ruihhlo zuar leh zu zuar lian hi an awm phah ta thluah asin. 

A dem duh chuan SRS te hi lo dem zel rawh se. CYMA ruihhlo do team SRS te hi awm lo se la kan buai khawp ang. SRS hi India constitution hnuaia dan anga din an ni lo a, dan ang diak diaka che tur phei chuan beisei chi an ni lo. Khua leh tui ṭhate tithlabar zawnga khawsa tura beisei pawh an ni chuang lo; anmahni pawhin an tum a ni lo turah ngai ila. 

Engpawhnisela, CYMA-in SRS a din chhan hi ruihhlo avanga Mizo nu leh pate mangang au aw a ni. Kan rama ruihhlo do rem tur chuan SRS te hi tun aia an chak a ngai. SRS te hnathawh hre chiang Excise and Narcotic Dept. a thawktute leh kan police tam tak pawh hian an tana thawh harsa thawktute hi zahna chibai an buk ru ang tih a rinawm a ni.