MASTER’S CHAMBER

Chanchin ngaihnawm lo tak takin kan ram a tuam reng mai. Mizorama thil thleng ve lo tura ngaih a thleng fova. Ruang chhar a titu hriat loh awm ta zel zul mai te, fain a pa a sat hlum tih te lah vawi khat mai a ni tawh lo, pasalin a nupui a thata buaraah khungin khamah a paih, a fa nausen mipa dang a umsan, zankhat thilthua chhungkaw pakhat thah mang ṭhak tih chanchin te’n Mizoram a tuam fo ta mai hi a va  mak em! 

Zurui invit tih te, tleirawl rual insual buai te phei chu thilmak a ni tawh lo hial mai. Hmeichhiat mipat kawngah phei chuan, an sawi ang hi kan nih tak tak chuan Scandinavian ram ṭhenkhat, heti lama nasaa an sawi ram te ai pawhin kan nep chuang lo’ng e! Tun hnaia khawtlang venghim tura mi tlawmngai inpe te beih a ni tih thawm thang phei hi chu a den a na hle mai. 

Heti ang hi kan nih mek lai hian a ṭhen tan kan ram hi a nuam tual tual chiang mai. Ram hruaitu rual chaweikhawmah menu a changkang tual tual a, kan nupui te’n thil tui leh nalh an hre changkang tulh tulh a. ‘Chumi teho chuan chawhlui an kil khawm’, tih a ni deuh reng mai. Ram hruaitu rual tan phei chuan mahni ina chawei hun pawh nei mumal lo khawpin, tlai tin deuhthaw chawei chhuahna tur a awm chu a nih tak ber hi. Office khata a hotu rual chawhlui, staff chawhlui a ni deuh reng tawh mai. Kohhran lam pawh kan bang chuang lo, committee chawhlui, eng eng emaw ching fel chawhlui, a tam mai. Ziak dawnin ila ziah zawh mai sen a ni lo ang. 

Ram leh Sawrkar Department hrang hrang hotu leh, sakhaw hotu te ngei pawh hian kan chamber-ah mi fel rual leh thil hre rual kan inkawmkhawm a, kan ban phak loh thil ropui tak tak chanchin titi paha boruaka insang kan sak a, chaw tuihnai tinreng kan eikhawm mek lai hian kan In a kang mek tih hi kan hria em aw? Master’s chamber a ruai hlim taka kan kil mek lai leh, bill ṭhahnem tak kan ah hawn mek lai hian kan ram Mizoram leh Mizo hnam hian eng nge a chan ve tih hi kan ngaihtuah ngai em le? 

A ram pum huapin, a veng huapin ram hmangaihtute’n hnatlangin han bei ngial mahse, danin thuneihna a pek loh an nihna chenah hei, a kaw tawp kan thleng dawn a ang ta tlat mai. Mithiam, mahni thu duh, nihnaa tuihal, chanvo chang khawpa vantlangin an ngaihsan ni lem si lo, misual lama tang tur eng emaw zat kan nei teuh tawh bawksi te hian kan dinhmun hlauhawmna a tizual hle. 

Misual te hi mimawl an nih lai kha chu a ziaawm khawp mai, tunah zawng a fing hlei hlei, a hre hlei hlei kan nih tak hi maw le! Hmana ka pu Kapzauva of Bethlehem Vengthlang te’n, Bvt dawrkawna kan zan leng min um dawr dawr a, min beng nawk nawka kan sim mai ang kha tunlai mi hi an ni tawh lo. Tuna mite hi hmana mite kha an ni tawh tlat lo hi a manganthlak lai chu a ni awm e. A venhimna lam leh Sawrkar, politics system ṭhang si lo hian sual chauh a ṭhang mai ang tih a hlauhawm ta e! 

Aw nang venghimtu lal kha, i chhiah­hlawh te’n zingkarah i zing tho ni lo vin, i duty haw thingpui pe che sela. Nang ram hruaitu ropui, i chamber aṭang khan bill lem lek lo vin dikna rorelna lal tiang lek zawk ang che. Nang sakhaw puithiam zahawm, i beram te kha a thau thau thlang a, an sa ei ena en ringawt lovin i chamber rawn thleng pha lo khawpa damlo leh chak lo tuam dam turin kawtthlerah leh daiah chhuak zawk rawh! 

Development lam khawihtu leh ram chunga thuneitute u, dawhkan aṭanga estimate siam te, dawhkan aṭanga ramri kham te simin, in chamber chhuahsanin a hmunah kal rawh u. In estimate dik lo avangin ram sum bawm a phai rawk rawk a, ram in pek thuah avangin ṭhenawm khawveng an insual buai a nih hi! Nang tidamtu ropui, i duty na damdawiin aṭanga an rawn phone chein i master chamber aṭanga tihdan tur hrilh mai lovin, i car nalh tawk kha tinung la, nunna chhan turin tlan rawh! 

Kan naupan deuh laiin a thu awmze hre mang hlei lo khan he sap hla hi kan sa ve ngang ngang ṭhin, “And in the master’s chamber, they gathered for the feast; They stubbed with their steely knives; But they just can’t kill the beast,” tih hla te hi. Hengho te hian sual bul leh sual rorelna hmun awmdan leh nihphung te hi an lo sawi fiah thiam viau a nih hi ka ti ta! 

Bolshevik revolution chanchin sawitu te’n an sawi lar em em Tsarist autocracy chanchin te pawh hi ngaihtuah chhuah atan a ṭha hle mai. Vodka no dawma nuam tawl ching hruaituho, chhungkhat laina hnaivai bak chu midang ring ngam miah lo hruaitu  hruaina hnuaiah ram a dam lo va, Russia ramin buaina namen lo a tawk a ni. 

Ram hruaitu duhawm tak tak te, dan kengkawhtu te, ram venghimtu police rual te, sakhaw rawngbawltu puithiam rual te, doctor rual leh sawrkar mi pawi­mawh zawng zawng te, kan master chamber leh kan in ropui aṭanga chhuak a, kan ram kan hnam chhan tura pen chhuah a hun ta tak tak niin a lang e!