Pute u ṭang ru...

Assembly Session neih mek hi in lam aṭangin ka lo thlir ṭhin ve a, kan pute chungah hian ka lungawi mawlh lo. Kan ram rorelna hmun puia kan aiawha rorel tura kan thlan chhuah kan MLA te u ṭan han la teh u, House zahawm tak hi party infak mawi tumna hmun leh mahni bial chhung ringawt ngaihtuahna hmun a ni lo asin.

Kan rulling MLA te u hei hi ka chah duh che u, kan ram rorelna hmun zahawm tak hi ram tana sawt puina awm hauh lo tur pute tlawnna ang chi emaw, party dang sel tumna ran zawhna atan mai mai Assembly House hi kan phal lo. Mi tam tak session ngaihven deuh deuh hi kan tam tawh a nia, in chevel hi kan thlir reng a nia.

In zawhna zawh duh dante kha mipuite hian kan thlir reng asin. In zawhna tam zawk hi chu House-a zawh atan chuan a ho kan va ti em..... Ram hnuk, ram tana pawimawh sawiho a, ram hmasawnna tur rel turin kan beisei che u. Opposition-te thil tih dik lo emaw, thil awihawm loh an lo sawi ṭhin sawi chhuah mai mai tur in ni em? Ram tana ro rel tur, ram hmasawnna ngaihtuah tu tur in ni.

Opposition lam pawh hi taima deuhte u, in zawhna zawh ṭhinte kha han enlet ula, ho inti ve tho lo maw? Rulling party khalh ngil tur kan oppostion-te'n ram hnuk khawih loh House chungah meuh in zawh a, in sawi a nih chuan engtin nge kan ramin hma a sawn ang. Rulling party-te dik tawk lohna zawng ula, chu chu House chhungah huaisen takin au chhuah pui ang che u. Chu chu ram mipuite'n kan beisei a ni a, ram hmasawnna tur pawh a ni.

Tin, zawhna pawi­mawh tak tak a hnung lama a awm laia, zawhna ho tak tak in zawt kual vak ṭhin hi mipuiin kan lo ui ngawih ngawih asin. Rulling lamin zawhna khirh deuh a chhuah hman lohna atana thei tawp an lo chhuah anih pawhin, opposition lam talin ngawih chuh teh u. 

MLA zawng zawngte chu bial mipuite thlan tlin in ni teh meuh mai, mahse kan ram rorelna inpui ber hi chu mahni bial chhung chanchin ringawt zawhna atan hman tum suh u, ram hmasawnna tur atana rorelna hmun tur a ni. In zawhna ṭhenkhat hi chu a ngaihdam theih e, mahse in zawhna tam zawk hi chu a ho lulai ṭhin deuh. House chhungah hian bial in hmangaih thar ta thut nge, a va han ho ṭhin em in zawhna tam tak hi chu. House chhungah zawt lo hian in ngai pawimawh tak tak a nih chuan bawhzui mai rawh u. Kan House zahawm tak hi a lo zahawm zual zel theihna atan he House-a ṭhu phate u han ṭang sauh sauh teh u khai.

A tawp nan, kan ram rorelna hmuna kan ram rorel tura kan thlan chhuahte ṭhukhawm hi ngaihven deuh deuh awm thar mah se, mipuiin nawlpuiin an ngaihven lo sawt hle. Hei hi a chhan chu mipuite tan ro in rel lo a, mipuite kaihhnawih tur thil in sawi chhuah tlem em vang a nih a rinawm. Keini mirethei ber pawh thleng phak tur ro han rel ula, ngaihven lo thei loin min siam teh u. Chuti a nih loh chuan he House zahawm tak rorel lai hi mipuiin kan ngaihven lo zual zel ang tih a hlauhawm a ni.