Assam Rifles hi tu sawn chhuah tur nge?

Kumin Chapchar Kuta Mizoram Chief Minister tharin Assam Rifles-te Lam­mual hmun aṭanga Zemabawk ram Zokhawsang lama sawn chhuah tur thu a puan khan MNF chuan, "MNF sorkar nge nge," tiin social media tinah an tlang than tir a. AR sawn chhuaktu ang hrimin Pu Zorama an chawimawi a, AR sawn chhuah kha MNF sorkar chak vang tiin an sawi chhawng duh hial bawk kha a ni a. 

Tuna an hun tiama an chhuah leh tak si lovah hian MNF sorkar chak loh vanga sawi mai hi thil awm tak a nihlaiin ka hriatthiam ve dan tawkin sipai insawn chhuak tur hi i han sawi ve dawn ang hmiang. Assam Rifles-te Lammual hmun aṭanga Zokhawsang lama an insawn chhuahna tur hi media lama kan hmuh dan chuan Ministry of Home Affairs (MHA) chuan February 19, 2019 khan office memorandum-ah a lo tichhuak tawh a. Assam Rifles Battalion headquarters chu May 31, 2019 hmaa Zokhawsanga insawn tura tih an nih thu a tarlang. Hei hian chiang taka a lan tir chu AR-te hian insawn chhuahna tur hmun hma an nei fel vek tawh tih a ni a, chu chu MNF sorkar hnathawh chak em em vang lam ni lovin a hma aṭanga MHA leh Mizoram sorkar inrem tawhna bawhzuina a ni zawk. 

MNF-te hi an sorkar hun lo in her chhuak leh Assam Rifles insawn chhuahna tur hmun­hma peih fel a in nang tihna a ni. Tunah hian Congress bawk kha lo sorkar leh ta se, MHA lamin insawn chhuahna tlaka Zokhawsang hi an hmuh a, Mizoram sorkar leh MHA inremna anga thil an kal pui tawh chuan AR hi chu an insawn tir tho vang. 

Helaia sorkarna chelhtu party thil tih lam a ni lova, MHA lam thil tih a ni. Mipui, thil hre lo zawk hruai sual thei tura political party lamin thil zawng zawnga hmingṭhat (credit lak) an tum ṭhin hi chu mipui zah lohna leh thil hre lo zawk mipuite bum duhna a ang ka ti ṭhin. MNF leh F lo, Congress leh ress lo zawng zawng hian AR insawn chhuah hun hi kan nghakhlel a, chhuak se kan duh tlang a ni. Chhuak thuai thuai se kan ti a, tu pa Chief Minister nih vang leh tu party sorkar vang lam a ni tawh lo. 

Assam Rifles hi an chhuak dawn a nih chuan a chhuah tirtu tur chu MHA a ni. MHA-in Zo­khawsang panna kawng, electricity, tui supply leh quarters leh office building hi peih fela a pawm hun hunah an chhuak ang. Chief Minister hi tu pa pawh ni se an chhuah hun turah chuan an chhuah phei a ngai tawh tho tho zawk a ni.