KHA NULA KHA...

Ni e, kha nula, kum 19 mi lek kha a hmelṭhat avanga lar a ni lova, a hausak em avanga lainat hlawh ni lovin ram tana huaisen taka a nunna a hlan avanga lainat hlawh a ni.

February 28, 2021 a nikhat thilthua mi 18 an kahhlum hnuah March 3, 2021 kha Myanmar sipaiten pawisawi lo an kahhlum tam ber ni niin mi 38 zet an kaphlum a, chung an kahhlum zingah chuan Che Sin hi a tel. UN Human Rights Group chhinchhiah danin heti hian February 1- March 3, 2021 chhungin mi 54 te nunna an chhahsak tawh.

March 3 khan Myanmar khawpui hrang hrangah sipai leh police an pawngtal. Mandalay Street 84 leh 30 a pungkhawmte sipaiin an pawngkahnaah nula kum 19 mi Che Sin hi a lu-ah kah niin a hmunah a boral nghal. A bul lawka awm tlangval pakhat chu a Awmah kah ni bawkin ani pawh hi a hmunah a boral ve nghal.

Mandalay Region-a awm Myingyan-ah phei chuan mipa naupang kum 14  lek chu kahhlum a ni a, a Lu-ah tak an kah avangin a let tawp a, a thlavang hauha hnuhsawn tumtute chu sipaite chuan kap zuiin mi 12 vel an kap hliam.

Sagaing Region chhunga awm Monywa khawpuiah pawh mi 5 an kaphlum. Nunna chan zinga nula pakhat nula kum 25 mi Kyawt Nandar Aung chu a Lu-ah kah fuh niin ka pawh chhawn lovin a hmunah a boral.

Kyawt Nandar Aung-i te unau 3 hi sipai laka lungawi­lohna lantirnaah an la tel deuh char char a, kahhlum a nih lai pawh hian a nau nen an awm dun nghe nghe. A unaunu chuan ṭap chungin, “Kum naupangtea min liamsan hi tuar thiam a har hle a ni. Ka unaunu hi a huaisen hle a, ram tana a nunna a hlan hi ka chhuang tak zet a ni,” tiin an unau thum zinga pakhatin nunna chan phah tawh mahse nungdama awm an unaunu nen zalenna an hmuh hma loh chuan sipai sawrkar laka lungawilohna lantirnaah, an unaunu boral ta hnungzuuin an tel chhunzawm zel dawn tih a sawi.

March 2, 2021 Tahan - Kalaymyo kawngzawhnaa sipai hovin a Awma an kah Tv. Zin Myo Maung-a chu nizan (March 3, 2021) khan a hliam tuar lovin a boral. Kum 18 mi Zin Myo Maung hi University zirlai a ni nghe nghe. A Awma an kah hnu hian Tube 2 vuahin thawktir hram hram a ni nain ziaawm lam a pan theih loh avangin Mandalay Damdawi In panpui a ni. Mahse, silai muin a Chuap a khawih chhiat nasat avangin mihring a chang zo ta lo. Kawng lakah a boral. 

February 28-a sipaiin  Yangon-a an kahhlum tak tlangval kum 26 mi chuan a nu hman atan a Lukham hnuaiah Kyat 5,000 a lo dah diam a, a vuinaa a nu ṭah hla chuan mipui a vel nasa hle.

March 3, 2021  Mandalay-a an kahhlum nula kum 19 mi chanchin chuan sawi zui a hlawh a, mak tih leh lainat a hlawh. Sipaiin khawngaihna nei hauh lova, a lu-a an kah avanga nunna chan ta hi nula Che Sin niin Angel tia koh ṭhin a ni. Fanu mal a ni nghe nghe. 

Victory Education Centre, Mandalay aṭanga inzirchhuak niin Aye Aye Myint, Beauty Saloon leh lam zirna school DA-Star Dance Club neitu a ni. Mandalay Taekwando championship-ah a ber nihna lo hauh tawhin taekwondo trainer a ni mek. Kawngzawhnaah nunna a chan dawn tih hre lawk niawm taka a che chuan mi mak tih a hlawh. Che Sin hian a chhuah hma hian a boral hnuah a taksa peng hrang hrang te chu a mamawhtute tan a hlan dawn tih Facebook-a ama wall-ah a tarlang lawk.

‘Engkim a ṭha leh vek mai ang’ (Everything Will Be OK) tih chuanna T-Shirt a ha a, a chhe ber a thlen thut pawha enkawl a awlsam zawk na’n tiin a Blood Group (B+) chuanna Card a awrh. 

A hmatawnga a dinpuite zingah hian vanduaina an tawh palh thut pawha an nihna chiang taka hriat a nih theih na’na an hming, an veng leh blood group chuanna an iptea ak an awm nual. Che Sin erawhin langsar takin a awrh a, a thuziak awrh chu a danglam hle bawk.

Kum 19 mi chuan, “Ka lo vanduai palh a, pianphunga rualbanlo dinhmuna ding zui tur ka nih chuan ka nunna chhan tumin bei lo hram ang che u. Chutiang dinhmuna ka lo ding a nih chuan  ka lo hlan lawk tawh angin ka taksa peng ṭha lai lai chu midangte in lo pe dawn a ni,” tih inziak a awrh tel bik. Amah hi Martial Artist a nih avangin hmeichhe dangte ang lo takin a huaisen hle a, sipai sawrkar laka lung­awilohna an lantirnaah pawh hian a hmatawngah a awm. A hmatawnga awmte chu pung­khawmte venhim na’na hmalam chuh an nih ṭhin avangin thlalatute mitah an langsar ṭhin. Nula tuaitir, huaisen taka a che vel chuan thlalatute mit a la zual.

Che Sin-i kah fuh a nih hma lawka a bula awm Myat Thu chuan kum 19 mi nen hian a hmatawngah an awm tih sawiin, “Sipaiin Tear Gas-a min vawm avangin men a harsat bakah kan hmai a sa a, a tihreh na’n kan bul lawka tui pipe chu ka tlawh bung a, a hma lama awmte chuan kan hmai kan phih. Silai an hmehpuah khan ka la ding a, Che Sin hian, ‘Kha fimkhur ta che, silai muin a fuh mai ang che,” min ti. 

Sipaite hian Tear Gas an rawn kap phawt a, a hnuah silaimu pangngaiin min rawn phuh zui leh nghal a, a vanduai ta a ni,” a ti. In aṭanga a chhuah dawn hian a pa hnenah a haw tlai tur thu a hrilh a, a sawi lawk ang ngeiin a haw tlai. Ram zalen an nih theih na’na  fehchhuak, eng ralthuam mah keng lo chu a Lu-ah kahsak niin bawihsawm ni mahse a hliam chu mihring tawrh zawh rual a ni lo. Hun lo taka a liam a ṭul ta a ni. A pa hnena a haw tlai chhan hrilh tur a awm ta lo. 

Che Sin-i ruang an vuiliam ni hian Myanmar khawpui lian zual 2 - Yangon leh Man­dalay bakah hmun hrang hrangah a thlavang hauhin mipui an pungkhawm a, ram zalen nih an duh thu an tlangpui. Sipaite chuan Yangon leh Monywa-ah mipui pungkhawmte chu tear gas-in an vawm chiam a, dimbaksak lovin an hnawtdarh zui a ni.

Sipai hotute chuan chuti maia hneh chi an ni lo tih entirna’n Che Sin an vui tuk hian Mandalay khawpuiah hniam te teah Jet Fighter 5 an thlawh kualtir a, awmze nei taka mipuite vauvin an chakzia an entir a ni. A ruang hi ruang phurh­na tawlailir, a dum leh rang­ka­chak rawng, pangpar tinrenga cheimawiah phurh niin kawngkam hmun tinah pasalṭha a nih thu tarlanna thuziak leh a thlalak keng te chuan an lo hmuak. 2Wheeler a zat chhiarsen lohin an zui a, zah takin thlanmual lam panpui a ni. 

Mipui pungkhawmte chuan rimawi chhepchher kimin, rorelna thlak duhna, hlain an sa rual a, “Khawvel tawp thlengin kan nghilh lo’ng che’ tiin, angel-te lennaa leng turin Angel-i chu an thlah liam ta a ni. Engtik niah emaw chuan Myanmar hi ram zalen a ni leh ngei ang a, Che Sin erawhin a sual chhuah an zalen hun chu a hmu ve dawn ta lo a ni.