Serchhip biala party 3 thil tum

Mizoram politics thil ngaihven ber chu "Kum 2018 MLA thlan bial pahniha tling thei awm chhun Pu Lalduhoma hi by election an hian a tling leh thei ang em?" tih a ni tawp mai. Pu Duhoma hi a tling leh a nih chuan Mizo zinga kum thum chhunga MLA atana vawi thum thlan hmasak ber a ni dâwn a, mahse a tlin loh chuan hman ni lawka tling hneh em em si kha 'Ex MLA' a ni ringawt tawh dâwn a ni.

Pu Duhoma hi MLA aṭangin MNF MLA ten an hek a, Speaker chuan a bân ta tawl mai a, Mizo pa leh Mizo pa inhek leh in bân hi thil thiang lo ang maia ngaih a nih laiin MLA nih leh nih loh dâwn chuan inhek mai mai chu an lo hreh lova, Kohhran inkhawma Chairman thei chin ngat pawh hektu zingah an awm nual a ni. 

Pu Duhoma hi "ZPM office-ah thu a sawi a, ZPM party hmingin mi a läwm lut a, inthlan dâwn khan ZPM party an la ni lova Independent-in an ding a ni" tiin an hek a ni. Pu Duhoma an hek chhan hi chu Assembly House lama Chief Minister a lip se vang niin an sawi a, tak tak a nih leh nih loh chu keini ang duang hriat ve phak chi a ni lo. Serchhip by-election lama party 3 thil tum lam hi i lo thlir zawk ang u:

MNF - MNF tán chuan tun hi tlin loh chuan kum 2023 MLA inthlanah beiseina a awm tawh dâwn lo tih a chiang a, sorkar lai pawha by-election tlin zawh loh hi thil zahthlak a ni ang. Hei vang hian Serchhip biala MNF candidate leh an sorkar hnu pawha ama bial ang maia Serchhip lama kal reng mai Pu Lalramzauva (Chief Minister Adviser) chu an candidate ta miah lo. Tlin ngei ngei an duh avangin an rawng huai an ser a, Pu Vanlalzawma an rawn theh chhuak ta a ni. 

Ex MP leh Ex MLA Pu Zawma hian Serchhip lama din hi a châk lova, chet chhiat palh chuan politics lama in phum bo hlen theihna a ni tih hre chungin tun hmaa amah duhsak tawhtu MNF party tán tiin a pawm ta a ni. Pu Zawma hi a tlin chuan MNF Vice President a nih avangin Cabinet Minister hial a nih theih a rinawm a, chuti ni se tunge an bân tâk ang? Pu Zawma hi tling lo se kum 2018-a MNF sorkar kumah pawh mahni bial hum zo lova tla tawh, kum 2021 by-election ah pawh tling lo nawn tán 2023 ah candidate beisei ngam a harsa tawh ang. Thih thaa a ṭan a ngai a ni. 

Congress: Pu Lal­thanhawla bial hlun a ni a, Serchhip khaw mi Pu PC Laltlansanga an dah hian Pu Hawla a upat tawh avangin Pu Tlana hian kum 2023 inthlanah MLA nih a tumna turin he bial hi a lo han enthlà lawk tihna a ni. Tunah chuan tlinna chance an nei lo tih an hria. Congress tán chuan ZPM an tlin loh ngei ngei a ngai, MNF chu tling mahse pawi an ti lo. Pu Duhoma hi a tlin leh chuan AMC ah Congress an che chhe bawk sia party lian tehnaah pathumna fal tak an ni dâwn tih an hria a. Congress hian Pu Duhoma an bei char char dâwn a ni. 

ZPM: ZPM tán chuan Pu Duhoma a tlin theihna tura theihna zawng zawng nena beih a ṭul a, a tlin vaih chuan 2023 inthlan chu 90% in a chiang tawh a ni mai. Pu Duhoma hi tling lo palh pawh ni se a vote hmuh tam dan azirin ZPM len tawh dan a teh theih ang. 

ZPM hian minal taka Pu Duhoma an tlin tir duhna piah lamah an party vawrh theihna chance hi an hlah loh a ngai ang a, an tlin loh palh pawhin chhuanlam chu an nei ṭha dâwn tho a ni.