MIRETHEI LAM HAWI PROJECT

Mizoram buai a lo reh tak hnu hian hmasawnna lamah kan ṭhang nasa ta hle mai a,a lawmawm hle mai. India ram hmasawn zel rualin kan ṭhang ve zel a, chutih laiin hmasawn zelna tur pawh kan la ngah hle ang. Kan State hian hmasawnna tham thawh chhuah leh thar chhuah nei vak lo mah ila , India khua leh tui kan nih angin Central sawrkar aṭangin a bika ṭanpuina dawng ṭhinte zing ami kan nih avanga kan sum dawn hi a tlem lo hle a ni. 

Mi hausa pui pui hi an tam ve tawhin, In leh loah phei chuan khawvel ram hausa zawkte chenna In ni mai awm tak thlengin hmuh tur a awm ve tawh a ni.Hetih lai hian hmun kilkhawr zawkah leh Aizawl khawpuiah ngei pawh hian khawsak harsa tak tak hi kan la awm ṭeuh erawh hi chu a veiawm hle mai.

Kan mamawh: Kan ram dinhmun sawi dawn chuan kan sakhaw lam sawi tel a ngai deuh zel a, a chhan ni a lang chu kan sakhaw zirtirna mila kan nun loh ṭhin em vang hi a ni ang. Kristian ramah chuan kan hmasawnna pawh hi a theih chin chinah Lal Isua chanchin ṭha nen inmil  hmasawnna ni thei se, chutiang lam ni lo hmasawnna chu kan duh lo ngam tur ni ang. 

Tuna kan dinhmun dik tak ni a lang chu ram rorelna leh mimal ang pawhin "Duhamnain kan khat"tih hi a ni lawi si. Rethei leh hausa group hi inkar zau tak hian kan awm ṭan  a ni deuh der tawh a, rethei chawi kan lam aiin hausate hausak belhna lamah kan tlan chak ta mah mah niin a lang. Retheite lam hawi tak tak Project siama inkhai chhuah lam ngaihtuah hi kan mamawh tak niin a lang. Chutiang atana pawimawh ber pakhat chu Agriculture, Horticulture leh Rural Development Sectorah hian tun aia nasa zawka ṭan lak a pawimawh awm e.

Mizo mipui zaa sawm­sarih dawn hi kut hnathawk niin an sawi ṭhin a, chung hote lam hawia ruahmanna siam chu kan sawrkar hian ngaih pawimawh berah nei se a duhawm hle mai.Khawvelah hian intluktlanna tak tak hi awm thei lo mahse,Kristian ram kan nih vang tal pawh hian hausate hausak zelna lam ai chuan, retheite din chhuahna lam hawi project hi kan ram mamawh tak a ni zawk.

Contractor leh supplier tam lutuk hi: Tute sawr­karah pawh Ruling Party mi nih vanga contract leh supply hna thawh tum tlat, contractor leh supplier ni si lo hi an awm a, tihbo a hun. Minister ni si contractor rilru pu tlat tihte pawh a awm kha - hnain a chhiat phah a, supply items-in a chhiat phah bawk a, kut tling lova sum lakluhna kawng zau taka hawnna mai a ni thei. 

Kan ram hruaitute hian lal leh tumna avanga Party mi leh sa in duhsak an ching lutuk hian mi harsa zawkte khai chhuahna lam a hlamchhiah phah niin a lang. Politics hi eizawnnana hman tum tlat Politician kan neih reng chhung chuan retheite tan din chhuahna kawng a inhawng ngai lovang a, rukru an pung tual tual ang tih pawh a hlauhawm a ni. Ram hruaitute hian rilru fim tak pu a ṭan lak a ṭul hle mai a, retheite khai chhuahna lam hawia hma an lak vat loh chuan mirethei kan pung zel ang tih hlauhawm tak a ni tawh. 

Tuna kan ram dinhmun mekah hian engemaw chen chu ding rihin, rethei khai chhuahna lamah hian nasa zawkin hma la ta ngat i la hmasawnna a kai rual deuh ang a, chu chu kan Kristianna nen pawh a inhmeh hle ang. Ring lo miten hmasawn an tumna lama engmah pawisak nei lova an ham bawrh bawrh ang hi chu keini chuan i hnar ngam ang u hmiang. 

Central aṭanga kan sum hmuh hi dik taka hman ni ngat se harsa lutuk tur kan ni lovin a lang. Inrenchem lama hma lak hi sum enkawl thiam nihna kawng pawimawh tak pakhat a ni. Chanchin ṭha mil ni lo thil dang kan buaipui nasat poh leh kan khawtlang nunin a tuar zel ang tih hi a rinawm, Pathian hi amite chungah hian a thikthu pawh a chhe ṭhin si a. Chanchin ṭha chuan mirethei lam a hawi a, mirethei chanai chhuhsaktu chu a hmuingil ngai lovang a, hlepruk ching mi chu a hamṭha reng lovang.