Indo Pacific Venture 2019 (IPV2019) ah ka tel ve a

Indo Pacific Venture 2019 Leadership, Cohort, Mumbai-a May 27-31, 2019 chhunga Hotel Taj Presidency a neihah North East aiawh ang deuhin min rawn telh ve hlauh mai a, ṭangkaipui kan lo awm mial beiseiin ka rawn sawi chhawng dawn a ni. Pathianin rem a tih chuan August thla hian Jakarta-ah 3rd phase neih leh tur a ni a, tel ve leh theih ngei ka beisei. Ram tana rual awt reng renga rilru seng ve ṭhin kha rualawt leh zualin ka rawn haw a ni ber. 

Nepal, Vietnam, Malaysia, Bangla­desh, Indonesia leh India aṭangtein kan kalkhawm a. Common purpose trainer te’n leadership lam hawi training min pein company hrang hrang aiawhte’n an company chanchin leh vantlang tana an hnathawhte an rawn sawi a, inpawh tlang taka sawihona manhla tak neih ṭhin a ni. Hei bakah hian Mumbai a company ṭhangduang tak takte tlawh kualin an CEO-te nen inkawm hona neih ṭhin a ni a, CEO hrang hrangte hnenah Mizoram tan thil ṭha eng emaw rawn ti ve ngei turin ka ngen ve zel. 

Ka bengverh tak pakhat chu Dr. Mona Mehta, Mumbai a College lecturer pakhat chuan, "Mumbai-ah hian sawrkar enkawl college-a zir man hi a to lo a, Mizo zirlaite hi rawn kal se," a tih kha a ni. Inhlawh chawp tur tan pawh Mumbai-ah College a zir theih ngei dawn niin a lang a, exposure mamawh em em Mizote tan thil ṭha tak tur niin ka hria. Sawi tur tam tak zinga rilru luah tlut tluttu pakhat chu, “Mi an pangngai zawh poh leh an bulah hian kan ngaihdan sawi chhuah vete a tlangnelin a timawm lo,” tih hi ni. He huna dan zawm tur an duan pakhat chu, "Tu pawhin rawtna emaw ngaihdan eng emaw a neihin 'a theih loh ang,' ti emaw, a sawihnawm zawnga lo dawnsawn awih a ni lo," tih a ni. 

Tu ngaihdan pawh ṭha taka lo dawn sawn phawt tur tih a ni tawp mai. Eng mi pawh ni ila, kan rethei emaw kan hausa emaw, kan zir sang emaw sang lo emaw, keimahni ṭheuha kan ngaihdan zalen taka kan sawi ngamna hmun hi nuam kan ti ber a, chutiang hmunah chuan kan theihna sang ber pawh kan hlan nge nge ṭhin. Chutiang ang khawtlang, chhungkua leh hnathawhna hmun chu kan din tam poh leh kan state hian mi phûr leh chhawrtlak a ngah ang a, ngaihdan (idea) ṭha tak tak neite’n he ram tan hian an tawnhriat ṭhate an rawn pawrh chhuak thei dawn a ni. 

Hnathawh inang lo tak tak, IAS, company officer, college lecturer, company CSR incharge, tlanglawn mi (mountaineer), lawyer leh NGO worker-te kan ni a. Khawvel huapa leadership training pe ṭhin Common Purpose India hotu Pi Munira-i'n tawn hriat ngah tih hriat takin thu awmze nei tak tak hmangin training min pe a, tu pawh mai kha kan ngaihdan sawina hun zalen tak pek reng kan ni. Rilru inpawh tlang taka ram leh state hranga chengte titi hona chuan chhungril lam inpawhna thuk tak a siam a, a ṭul huna in pui tawn tura induhsak tawnnate pawh a tipung nasa hle. 

Company kan tlawh zinga ka rilru khawihtu pahnihte chu Crompton Grieve leh Schindler Group India-te an ni. Crompton Grieve hi electric bulb leh street light ang chi siam chhuaktu an ni a, an LED bulb siam chhuah avang hian kum khatah India hian 9118 megawattsa a save (vawng him) niin an sawi a. LED bulb hi kum khat chhungin 35 crore vel an replace (thlak thleng) a, energy an save hi Rs. 18,218/- crore ang hu niin an chhut bakah, bacteria leh germs (hmuar) tireh thei bulb an siam chhuak bawk. 

Schindler Group Indiate hi elevators (step tawlh thei, building chhawnga chho zawnga tawlh chho thei chi lift ang chi hi) siamtu an ni a, an thil siam chhuahah mihring tana him leh hman nuam thei ang ber tur chi an ngaihtuah nasa. Anil Ambani ina a hman te, Bombay Airport-a an hman mekte hi Schindler ho siam a ni a, an hlawhtlinna bulpui ber chu company a thawkte thawhhona ṭha em em mai leh an CEO Ashok Ramachandran, kum naupang têin an company-a thawkho a cho phur thiam vang a ni ber. 

An bula awm a nuam a, intithei (chapo) leh induh angin an awm lo a, zawhna eng pawh kan zawhte ṭha takin min chhang thei zel. Ka ngaihtuah chu keini state-ahte hian company product hrang hrang kan la lut nasa a, a siamtu company te rilru tur awm ang kan chhui thui ngai lem lo a, bulb leh elevator siam chhuaktute’n an siamchhuah dan kim chang tak inhawng taka min han hrilh chu kan state pawh hian zir tur kan ngah hlein ka hria. Kan thil chawk luh reng rengte hi chik zawka kan zir a, a siam chhuaktu company-te pawh kan chhui zui uluk hle a ngaiin ka hria. 

Ni nga chhung hian zing thawh hlim aṭanga mut hun thlengin awl awm loin hun kan hmang a, kan hnathawh dan te, kan thil tawna kan ngaihdante kan sawi a, tumah kan innuihzat lo a, tu ngaihdan mah dodal phal a ni lo a, ngaihdan mawl a awm thei lo. IIT Mumbai aṭanga zir chhuak nula la naupang tak, satellite team ‘Pratham’ ISRO-in a kah chhuah tak siamtua an team leader, mi harsa zawkte mei chhem dan tur khawl siam chhuak tura inhmang mek Manvi Dhawan thusawi, "Project reng reng hi khawl lam fel loh (technical failure) vanga pamṭul a ni ngai lo, thawktu team thawhhona ṭhat loh vang leh mipuite rilru zir chian lohna/ mipuite support hmuh ṭhat lohna vanga hlawhchham a ni zawk ṭhin," a tihte chu khel ho tham fe a ni. Pu Kedar Sohoni, “Mumbai khawpui hi Waste Free Society a ni tur a ni,” tia Green Communities Foundation dintu chuan thu mawi em em mai a sawi a, “Eng hna pawh thawk ila; hlawhtlinpui tur chuan ‘Pulse of the People’ (mipui mar) kan deh a, kan hmelhriat chian hle a ngai; chu ti lo chuan project hlawhtlinpui hi thil theih loh ang tluk a ni” a tihte chuan ngaihtuahna a luah thuk takzet. 

Kan state-ah hian mipui nuai 12 vel kan cheng mek a, a leilung zauh zawng lah 21,081 Sq. Km chauh a ni a, hmasawnna kawnga kan ke pen sawt lo viau mai hi mipui mar uluk taka dek chungin hmasawnna project te hi kan kalpui ṭhin lo a ni mai lo maw? 

Prof. Bhaskar Bhatt, Indian School of Design & Education (ISDE) a mi chuan, “Design kan tih hi art nen a inang lo a, art-ah chuan a siamtu khan a lunglen zawng a siam chhuak thiang a, design-ah erawh chuan a design-tu khan a duh zawng leh tui zawng design loin mipui mamawh engnge ni ang, tiin thil thar mipui ṭhatna tur a design ṭhin,” tiin a sawi. He design school designer-te hian an tui zawng lam ni loin mipui mamawh tura an rin thil thar an design tluk tluk mai a ni. Kan state-ah pawh hian entrepreneurs lam a ni emaw, ram hruaina leh sawrkar hmalakna (project/ programme) a ni emaw, kan rilruin a kawh ber hi mipuite tana chhawr nahawm ber tur a nih hunah chuan kawng tin rengin hma kan sawn ngei ang. 

Company ṭhang duang tak takte hmasawn chhan ber zinga mi (ka hmuh dan) chu non-hierarchical structure (hna hniam leh hna sang vuantute inkar kak awm lo) an kalpui zel mai hi a ni. Company CEO te hi hlawh tamin pawimawh hle mah se inphah hnuai an hreh lo a, an hnuaia thawkte’n engtin nge an company tan an theihna sang ber an hlan ang, tih an zawng ber. Tute mai pawh hi neitu thinlung pu takin an thawk suau suau a ni ber mai. Kan state-ah pawh hian kan ei bar zawnna kawng ṭheuhah tun aia neitu rilru kan put thuk theih nan chanvo sang chelhtute an rawn luan hniam ngam a ngai a, a theih ang kawng kawnga inpeizawn leh inpui tawn tura ruahmanna duan kan mamawh hle. 

Hmalam kan panna tura kan ngaih pawimawh ṭul ta chu tunlai thiamna technology ṭangkaipui zawnga hman thiam hi a ni ta ber awm e. He huna lo telte leh kan company tlawhte reng reng hian technology hi an hmang ṭangkai em em mai a, Artificial Intelligence (AI) ang te hi kan ṭhatpui ve theih dan tur hi a tam em emin a lang. Loneitute’n lo neih dan ṭha zawk, thar hlawk zawk leh hralhna awmze nei zawk an neih theih nante computer thiamna hman ṭangkai hi kan hlamchhiah theih miah loh thil a ni. Aizawl traffic jam tihziaawm nan te, khawpui thianghlimna (sanitation) lama hmalakna angahte pawh hian computer thiamna hman ṭangkai hi a pawimawh takzet. Computer thiamna hmangin kan ram (Mizoram) hi khawvel nen inthlun zawmna ṭha zawk kan duan a ṭul a, khawvel ram dang leh India ram state dangte’n tunlai thiamna (technology/ computer/ internet) hmanga hmasawnna kailawn ṭhatpui tham khawpa an hausakpui lai hian kei ni hi kan ṭhan a ṭhuin ka hria. "Keini state-te chu state dang leh ram dangte nen tehkhin chi kan ni lo, kan awmna a thlafêm em alawm," tia a harsatna lam en loin, khawvel dai dar turin tarmit thar i bun teh ang u. Organizer link bihzui duh tan www.commonpurpose.orgGlobal Leadership Training Organization