Social media leh Mizoram inthlan

Social media han tih hian keini tan chuan Facebook, YouTube leh Whatsapp hi a ni mai a, Twitter-te hi chu Mizo nawlpui hian kan khawih lova, kan tuipui bawk hek lo. Whatsapp, YouTube leh Facebook hian Mizoram inthlan hi eng ang takin nge a nghawng tih hi mithiamte zir chianah ka khek deuva, helam hawi thuziak a awm mai loh avangin mimawl thlirna aṭangin kum 2014 leh 2019 Mizoram Lok Sabha inthlan result hi i han chip nawi dawn ang hmiang. 

Kum 2019 Lok Sabha inthlan danglamna chu social media-in voter tam tak hi a nghawng niin an sawi a, chu chu awih leh awih lo kan awm ang a, a tehna leh finfiahna a awm theih tawh si loh avangin mahni ngaihdan ang angin kan awmna veng leh khuaah kan ti ti bawrh bawrh a, a result aṭanga a lan dan chuan kan social media sawi vel hian awmzia a la nei tak tak lova hriatna a lian hle. 

Kum 2014 inthlan kha kan thlir kir chuan mi tam takin Pu CL Ruala leh Pu Robert Romawia kha kan sawi ang a, Pu M Lalmanzual chu kan sawi lo ang. A chhan chu a thawm a reh bakah a campaign ve mang lova, inthlan dawn lai tak phei kha chuan Mizoramah pawh awm lovin a zin bo ta vang vang niin an sawi a ni. Pu Manzuala khan tlin tumna a nei lova, tlin inrinna pawh a nei lova, a campaign mang lova, sum a seng mang lo a, a vote hmuh zat chu 11,890 niin chu chu 2.74% a ni. 

Kum 2019 inthlana social media hmang thiam leh hlawk pui nia an sawi chu Pu Lalhriatrenga Chhangte leh Pu TBC Lalvenchhunga te an ni. Ṭhenkhat phei chuan, "Social media awm lo se heng candidate pahnihte hian vote pawh an hmu mang lovang, an thiamnate social media lamah pholangin an vote hmuh dan en hian MNF lo hlir vote an laksak hi Pu Lalnghinglova Hmar tlak chhan a ni," an ti hial a ni. 

Amaherawhchu, an vote hmuh zat hi chik ta ila, Pu TBC-a hian vote 13,211 hmuin chu chu 2.67% a ni a, Pu Manzuala campaign mang lo vote percentage aiin a hniam zawk. Facebook hmang taima Pu Hriata chuan vote 12,467 hmuin hei hi 2.54% a ni. Social media hmang ṭangkai kan tih candidate pahnihte hian kum 2014-a social media lama campaign nasat chu sawi loh vote thlak dawna ram danga zin bo Pu Manzuala vote percentage an la phak lo a ni. 

Social media-in nghawng nei lian chu ni se Tuichawng bialah khan Pu Tetea, Pu TBC-a, Pu Hriata-te khan vote an hmu ve ang. He Chakma bialah hian MNF leh BJP chiahin vote an hmu ang a ni a, a bial pumin social media a thawk lo. Bial dang zawnga inthlauhna aiin he biala inthlauhna hi a sang filawr ṭhak a, bial dang inthlauhna chu a khuh bo zo vek ni. Social media lama che ṭha leh hun hmang thiamte aiin Pu Rosanga leh Nirupam Chakma an sang fe a ni he bialah hian. 

Thlirna mawlmang tak anga lang, mahse fact & figute ṭan chhan nei ve tlat a ni.