Budget Session ṭan ang aw…

A chhungah kan ṭhu ve pha si lo a, pawn lam aṭangin i'n thlir teh ang. MLA hamṭhat laia thawktu hrek hi?

Demand no. 1 Le­gis­lative Assembly budget aṭangin ṭan ang. MLA te hian induhsak an tum nasa tih chiang taka langin nikuma loan-a cheng nuai 70 an pekchhuah chu kuminah hian cheng nuai 170 an ruahman lawih mai! 

MLA te hamṭhatna a pung hle dawn nia a lan laiin thawktute an hrek nasa dawn. MR an ban ṭhen nasa dawn ni ngei turin nikuma wages-a cheng nuai 97.90 hmang khan kumin hian cheng nuai 10 ngawta tlem zawkin cheng nuai 87.90 chauh an ruahman sak tlat. 

Nikuma medical treatment atana cheng nuai 203.50 lai an hmannaah cheng nuai 173.50 chauh an dah a. Office expense pawh an hrek nasa dawn; nikuma cheng nuai 580 lai office enkawlnaa hmang khan hemi atan hian cheng nuai 210 chauh an nei a. Thil thar lei lam pawh nasa taka hrek dawnin nikuma supplies and materials-a cheng nuai 81.60 an hman laiin kuminah chuan cheng nuai 25 chiah an ruahman a ni. 

Engatinge MLA te hamṭhatna nasa taka pekbelh a, thawktute an hrek chiam mai dawn le? Governor hrekin Minister kan vulh dawn Governor budget (Demand no.2) kan en chuan nikumah zin nan cheng nuai 179.26 a hman laiin cheng nuai 45.00 chauh ruahman sak a ni. Office expense-a nikuma cheng nuai 89.85 a hman laiin cheng nuai 50 chauh ruahman sak a ni. 

A staff ban ṭhen tur an awm niawm takin nikuma hlawh atana cheng nuai 584.20 awm kha cheng nuai 572.10 chauh a awm a. Damloh khap ṭhen sak tur niawm takin medical treatment-a nikuma cheng nuai 16.57 hmannaah cheng nuai 10.90 chauh a awm - Gover­nor hi kan hrek na dawn kher mai. 

Council of Minister budget (Demand no. 3) kan en chuan nikuma hlawha cheng nuai 203.18 chauh hmannaah cheng nuai 269.97 ruahman niin an hlawh a pung thur thur dawn niawm tak a ni. Medical treatment-a nikuma cheng nuai 20.85 sennaah cheng nuai 7.35 ruahman a ni a, office expense-ah pawh nikuma cheng nuai 85.50 hmannaah cheng nuai 77 ruahman a ni. Heng hi a tlem zawk rualin nikuma rua­hman nen a la inzat tho. Other charges-ah erawh nikuma cheng nuai 73 ruahman leh hmannaah inhrek hret tum niawm takin kumin hian cheng nuai 70 ruahman a ni. Governor ai chuan Minister nih a nuam dawn a ni lo maw?