Zirtirtu lak politics vote bank

"Thingtlang zirtirtu turin a khaw mi zel mi 900 chuang an lak vaih chuan thingtlanga pa rawn chu MNF mi vek an ni kumkhua tawh dawn a, thingtlang kilkhawr ber berah zirtirtu aia sang sorkar hnathawk an awm ngai mang si lova, an khaw pa rawn chu MNF lak zirtirtu an ni dawn. 

Hei hi hun rei tak chhung MNF vote bank ve pakhat tur a ni," tih hi WhatsApp group pakhatah Aizawl pa rawn ve deuh mai hian a rawn post a. An comment a ngaihnawm bakah mi tam tak ngaihtuah phak loh thil ril zet mai a rawn phawrh avangin Mizoram mipui hriata mi ngaihdan khawnkhawm hi a ṭulin a ṭul niin ka hriat ve tlat avangin thiam ang tawk tawkin ka rawn tui hnih ve dawn a ni - hei hi politics inbeihna lam a ni lovang, sawifiahna chauh a ni ang. 

MNF sorkar a lo piang a, a thil tih tum langsar hmasa ber pakhat chu MPSC kaltlang loa zirtirtu 946 lak a ni nghal tawp mai. 

Sorkar hnathawk latu turin MPSC a awm a, anni hi an rin ngam loh thu kan la hre ngai lova, mah se MNF chuan zirtirtu 946 zet mai an lak tur chu MPSC kal tlang tir an tum lo nghal a, chu mai ni lovin zirtirtu ni tur atana tehna an hman ‘MTET pass kher’ tih pawh tehna atan an hmang dawn lo. 

Ṭawngkam thiam tak takin eng ang pawhin, vawi engzata tam pawh sawi fiah mah se a fiah zo lova, dan ang lova zirtirtu lak tumna hian a phenah thil an phum a ni ang tih rinhlelhna hi ṭhangthar lehkhathiam zingah chuan a tuh tho tho. MTET hi pass phawt loh chuan sorkar zirtirtu a nih theih lova, dil pawh a dil theih loh a nih hmel. 

Hmana MNF hun hmasaa NET nei chinin a dil theih Hrangbana College zirtirtu lak naa NET nei lovin an dila an tling zui a, mi thiltithei leh langsar fate leh chhungte an lo ni ṭhup kha rilruah a lo lang nghal a ni. Tuna MNF tum ber chu "A khaw mi ngei," lak a ni. "A thiam ngei, a tling ngei," tihin an teh lova, a khaw mi lak an tum. Chu chu vote bank an rawn sawi nen khian a inzawm ta tlat a ni. Khaw khata pawisa nei (thingtlangah zirtirtu hi a awm thei leh hausa an ni) chu MNF dah zirtirtu, MPSC kal tlang lova MNF-in a lak an ni dawn. 

Zirtirtute chu an kohhran lawinaah Kohhran Upa an ni deuh fur zel a, chu chu MNF lak zirtirtu an ni ang a, YMA leh khawtlang hruaitu leh pa rawn an ni zel ang, hei hi vote bank politics pakhat a ni thei tih khi ka pawm ta tawlh tawlh mai.