Ram hruaitu chu

Khawvel Demo­cracy ramah chuan ram hruaitute chu duhsakna leh zahawmna nasa takin sawrkarin a chei bawl a, Minister-te ngat phei chu mipuite aṭangin duhsak te, lawmpuina te, zahnate an dawng reng a. Eng vangin nge dinhmun ṭha leh zahawmna pek an nih kan tih chuan dinhmun ṭha aṭangin ṭhahnem ngai leh dik takin hmalam pana ram tan hna an thawh theihna tur atan a nih bakah awhna rilru lakah an fihlim theihna tur pawh a ni. 

Vote hmanga thlan tlin an nihna chuan democracy ropuizia leh a hlawhtlinna an rawn tarlang ṭhin. Zahawm leh nuamsa taka cheibawl ni mahse mite hmaah chuan tlawm taka nun dan zir thiam chu an tih tur a ni ngei ang. Mi chi hrang hrangten an harsatna an thlen theihna hmun a nih hian ram hruaitu chu a hming a lo ṭha ṭhin a ni. 

Ram hruaitu chuan mipuite hnenah dikna chanchin ṭha hi an hrilh tur chu a ni. Rinawm taka an thiltih tawhte mipuite hnenah puanzar a nih hian ram an hmangaihna an lo sawi tawh te chu, chu chuan a rawn nemnghet ṭhin. Thianghlim taka rawng an bawl hian miten an hna chelh chu an phu rengah an ngai a, inthlan leh hunah pawh thlan tlin an lo ni leh mai ṭhin. 

Ram hruaitu, mi­dangte chanvo ngai pawimawh hmasa ṭhin chu a thawm ri a mawi a, mi rilru a hneh ṭhin. Awhna leh itna avanga lo thleng Eden huana eirukna thubuai chu kan Lalpa in min chin fel sak tawh a. Khawvel pumah eirukna hi scandal lian ber a la nih avangin hetiang laka fihlim thei ram hruaitu chu a fakawm a ni. 

Chhungkhat lainate aiin ral khata mite chu an tam zawk daih a, chungho chuan an lo thlir reng a, an duh hunah an thlang tling a, an duh hunah an paih leh mai ṭhin a ni. Ram hruaitu hna chu ram hruai a nih avangin a khirhin a hahthlak a, hahdam leh nuamsa taka ram hruai hna kalpui a nih chuan ram chu a lo tluchhe mai ṭhin.

Ram hruaitu chuan dik tak leh taima taka ram a hruai chuan a bial chhung miten hma an sawnin an lo hlim tlang ṭhin. Duhsakna vote avanga thlan tlin a ni tih hre rengtu chuan thiam takin a nun a hmang a, a thiltihte chu a dinhmun sawh ngheh nan a hmang thiam zel ṭhin. Mifing finna leh remhre hriatna tiboraltu chu Lalpa a ni a, Lalpa ṭih erawh chu finna a ni.