Kan nek puar pawp ang chu!

State ralmuang bera inchhal kan ni bawk a, dan hnuaiah dan palzuttute nen zalen takin an leng ho a. Dan hian Mizote hi min ti dawihzep hle tih hi a chiang hle bawk. A chhan pakhat chu dan kan hre lo, tin kan hriat chhun pawh hman dan kan thiam lo. 

Kan ngaihtuah zui atana ka duh zawk chu, kan ram leh hnam himna tur hian eng tia hmalak nge ṭha ang tih hi a ni. Tun hnaiah YLA chuan an huam chhung­ah Takam (Chakma) chhiarpui an nei rup mai. Hei hi Mizote tih awm tak a ni tawh reng a, kan thlawp hle vek bawk a ni. Hmanah khan CYMA, MZP leh MSU hian hma an lak a, an buzawl va phindarh a, kan buaina hi va chinfel dim diam tawh kha kan beisei leh duh dan a ni. 

Mahse tun thleng hian kan buzawl zawk hi kan chhuahsan hlei thei lo a ni ber. Min phuartu leh pal ngam loh, kan ke pen daltu a awm a ni mahna le? Tunah YLA an pen chhuak ta! He tia kan aiawha pasalṭhaten hma an hruai tawh ber chuan an hnung zui hi Mizo zawng zawng tih tur a ni. Feh chhuak a tha thawh thei lo pawhin kan hnam chhan nan kan ṭawngṭai pui thei. Mahni theih kawng kawngah kan thawh suau suau a hun takzet. 

Dan kan lo nek fan deuh a nih pawhin kan dan hremi, ram hmangaihtute hian min lo hliahkhuh sela, chu chu ram leh hnam chhan nana an hnathawh hlu tak a ni ve mai. Chu tih rual erawh chuan a him lo zawnga chet erawh pumpelh tum a mawi ang. 

He tia kan YLA lam an rammut tak rup na hian Mizo hnam thinlung muhil hi kai tho sela, kan politician-te khachih tlat tawh hi tidam hram sela kan va ti em. He tia a ngai anga kan awm reng tho si chuan kan hmalakna kal mek hian awmzia a nei lo mai ni loin, a harh lo tur zawk an rawn harh ang a, a ram neitu zawk hi kan chep tial tial mai ang tih a hlauhawm khawp mai. 

Keini ang i kawng an zawh hut hut ve lova, a zualko na tur dikah an zualko chat chat mai si, keini lah ni sen sa hnuaiha thlan tla thang huamin kawng kan zawh a! Thinchhe hle si hi ram leh hnam tan kan thinrim rei leh ngam ṭhin si lo. Hetia a ngaihna hriaten hma an lak lai hian a tawp thleng law law ang u. 

Takam sawi apianga political party hruaitute beng a ngawng tlat zel hi a pawi hle. Dan ang thlap chuan an tihsual hi hruk reh a har tawh ang, mah se kan tlawmngai pawlte leh Mizo mipui chakna beh chhana nawhreh rem lai a ni e. A lin laia kan den loh chuan a dai hman ang a, a daih mai dawn. 

Kan politician-te hian Takam vote ita in la in tlawn siak cheu a nih chuan, naktuk maiah ṭhangtharte hian vote duh vanga mahni hnam dahkhamtu tiin kan la sawi fo dawn che u. A theih chin chin­ah dan ang zelin kan kal ang a, a ṭul a nih tak leh kan ram leh hnam him nan chuan dan hungna pal pawh kan nek puar pawp pawp mai a ni ang chu.