Home Minister chu ni ve ila...

Ka dam chhunga ka nih ve ngai reng reng loh tur chu Home Minister hi a ni. 

Mizoram Home Minister hi ni ve ngai dawn lo mah ila, he dinhmuna awm phakte tana ka duhthusam thil ropui tak tak leh thil tenau tak takte thlengin point 10 lek hi chhiartute lo ngaihtuah zui ve atan leh kan Home Minister leh a thawhpui Minister leh MLA-te pawhin an hriat atan ziah lan ka duh tlat a ni.

Tuna kan Home Minister hi mi dik leh eiru duh ngai reng reng lo, party chhunga mite leh eptu lam pawhin an zah em em niin an sawi. Chuvangin, Home Minister ni ve ta ila, tiin thil awlsam taka tihhlawhtlin theih hlira ka ngaih ka ziak dawn a ni. 

1.    Zokhawthar aṭanga motor lo lut reng reng hi uluk takin Champhai daiah ka dap tir vek ang. Passenger-in a rei an tih deuh pawhin Mizoram damna tur a nih avangin uluk takin kan dap vek tur a ni.

2.    Lawngtlai, Mamit leh Lunglei District lamah bul ṭanin dan lova khaw din hi ka Police te ka zawn chhuah tir ang a, an dap chhuah hnuah LAD Minister-ah ka thlen ang. Hei hi foreigner dap chhuahna atan pawh a 

ṭha dawn. District pathum kan zawh hnuah District dangah kan ti leh ang. 

3.    Police hi punctual turin order ka chhuah ang. Mizoram sorkar hnathawk office timing dika thleng thei lo hi Home Department aṭangin ka siam ṭha ṭan ang a, MPS officer tlai tak taka Aizawl traffic jam a tang ṭhin awm tawh lo turin a hunah office-ah an awm leh awm loh DGP aṭangin ka control ang. 

4.    Vairengte checkgate, Bai­rabi checkgate-ah police ka thuam chak ang a, sum thianghlim lo (thamna) an la nge la lo enna turin an indawrna hmunah CCTV ka vuah tir vek ang. 

5.    Police officer-in mimal hna atana police an chhawr hi ka titawp ang. Police lal deuh aṭangin bul ka ṭan ang. IPS ho zawng endik hmasa se, MPS chu endik ngai tawh mang lovin an lo insiam ṭha sawk sawk ang. IPS 10 bawr velin police an chhawr dan en dik hi a harsa lovang.

6.    Aizawl khawpuia kawng­pui sira lirthei riah hi ka titawp ang. Veng ṭhen­khatin Local council chakna hmangin an titawp thei. Dan tlawh chhanin Home Minister chuan a titawp thei ngei ngei ang. Veng tam takin tunah hian kawng sira lirthei riah an phal lova an hlawhtling a ni. 

7.    Home Minister nihna tizahawm lo tur thilah ka inhnamhnawih ve lovang (mahni department hnuaia contractor motor thar tlangzarh tih ang chi), Home Minister dawhkan (office) zahawmna ka humhim ang. 

8.    Police recruitment awm leh hmasa berah ‘City Police’ an tih ang khan pa lian leh sang ka la leh ang. Crowd/ mob control tura an ṭangkai dan hi a double ang vel a ni. Tin, advertisement awm lova police lak ruk ṭhin hi ka titawp ang a, kan ṭhenawmte Police consta­ble an ni ve fer fur lovang. 

9.    Police-in civilian life an hmang nasa lutuk hi ka ti tawp ang. Police ni si a ṭhen chu YMA hruaitu, a ṭhen kohhrana a kula taia inhmang, a ṭhen NGO hrang hrang hruaitu nih hi thil kal kawp thei lo tura ngaih a ni; a chhan chu an eizawnna Police nihna nen a kal kawp thei lo. Tunah chuan engkim mai hi kan tih pawlh nuai nuai a, Police ni sia police nihna ni awm lo pui puia inhmang hi an tam tawh hle. 

10.    Armed Police Battalion tinah discipline khauh tak ka ken kawh tir ang. Army angin zing exercise (PT) regular taka lak, a khat tawka medical fitness check (anmahni pual doctor an nei reng a ni), operation ti thei lo tur khawpa police fit lote vaukhana improvement a awm loh chuan a ṭul anga an chunga discipline khauh taka lek kawh ni se - Mizoram police hmel hi ala danglam theih ka ring.