HETI ZÂWK HIAN TI TA ILA…

Mizo ṭawng chungchâng ka ziak khât ta viau mai a. Rempuia Lutmâng te kuta ka dah rualin, mahni vei zawng zawng ka’n tlângaupui ve leh teh ang—rawtna ang deuh ni pahfâwmin.

‘Programme tih aiah Hun ruat ti thên mai ila… Preach-ing programme tih aiah Kohhran hun ruat ti bawk ta ila…’ ti ta ngawt ila; mi ṭhenkhat chuan, ‘A! Programme tiin kan hmang ṭhang tawh si a, a chiang mai a lâwm. Thlâk kher chu eng nge a ṭûlna? Tin, Hun ruat han tih chu a ṭhing e!’ ti tâwk kan awm mai thei. Kan ṭawng humhalhna kawnga inthlâk kan hlauhna emaw kan tîmna emaw hi kan ṭhanmawh bâwk lian tak a ni tih hi, Zoṭawng humhalh duhtu thinlung a nih ngei ka ring. Hmasâwn tûra inthlâk hrehtu apiang chu an sûkna ngaiah an su tlut tlut reng ṭhin. Chutiang ni chu, Mizo Kohhrante hi i ni ve lo teh ang u.

Kan ṭawng ral tûr leh da mêk hian vêng himtu a mamawh tak zet ta! Chumi vênhim hnâ thawktu atâna ka ngaih pawimawh hmasak fo chu Kohhran hi a ni. Dik chiah chuan inhmuam ûp kan tumna lamah kan Kohhrana chanvo chang pha chinte hian Mizo ṭawng hi kan hmang dik lo nasa êm êm a; chu chuan mipui bengah dik nia hriatna tuhin kan hmang khawlo zui ta vek mai niin ka hre ṭhin. Chuvang chuan kan ṭawng hman dân dik hi Kohhran huang aṭanga kan siam ṭhat hmasak hi a ṭûl tak zet zet ta niin a lang.

Dik tak chuan kan sakhaw pûte hian ‘Vawiin’ pawh an ti thiam ta meuh lo a nih tâk hi—an tih ‘Vawiin nì’ tâk zêl mai hi! Zêp thû a chêng lo a, Mizorama kan Kohhran lian ber Mizoram Synod ngei pawn ‘Nilaini zân’ lam pum peih tawh loin vawiin thlengin ‘Nilai Thupui’ an la nei ta reng a ni a! (A Kohhran mal ka en hniamna lamah min ngaihsak lul suh ang che u!) Inpâwlhona aiin Fellowship hi nuam kan la ti ta zêl nge maw ni aw?

Heti hian i ti dâwn teh ang; entîrna hmangin ka’n sawi ṭan ang a… Ka lawina Kohhran, Baptist Church of Mizoram hmunpui (headquarters kan ti tawh lo) chuan inkhâwm kaihruaitu Chairman hi Hruaitu tia a thlâkna a rei tawh a; Kohhran mite'n ngaia kan neihna pawh a rei ta. Kohhran ṭhutkhâwm (Committee meeting) ni-khua chuan ‘Chairman’ chu a awm loh theih loh a; chumi-ah lo chuan ‘Chairman’ tih hi kan leklam ta meuh lo.

Chutiang chuan hmun ṭhenkhatah chuan Fellowship pawh Inpâwlkhâwmna/inpâwlhona kan ti zui ta zêl a, a ṭha fû. Mahse, ‘lei kohhran’ kan ni miau a; famkim hi a harsa khawp a. Mizoram Ṭhalai Kristian Pawl-in ‘Mizo ṭawng hman uar inzirtir ni rawh se,’ a tih laiin Unit ṬKP ṭhenkhat chu Pathianni chawhnuah an la Fellowship reng tho!

Sapṭawnga kan hman ṭhan, a tlukpui Mizo ṭawnga kan neih reng thumal kan nei nual a. Ka hriat theih ang ang ka’n chhawp chhuak ang e:

Chairman    : Hruaitu

Secretary    : Ziaktu

Programme    : Hun ruat

Sermon    : Thu chah

Headquarter    : Hmunpui

Committee    : Rorêl

Meeting    : Ṭhutkhâwm

Agenda    : Thu rêl tûrte

Minute    : Thu rêl (te)

AOB    : Thu rêl tûr ṭûl dang(te)

(Any Other Business)

Faith Promise : Rinna thutiam

Sharing    : Rilru sawi

Praise and    : Pathian fak leh chawimawi

Worship

Refreshment    : Ei leh in

Item    : Chanvo

Solo    : Mal zai

Duet    : Ṭhiang zai

Recitation    : Hla chham

Usher    : Khual chhawn

Home Mission    : Ram chhûng

        rawngbâwlna

Hêng ka’n ngaihtuah chhuah mai theih zawng pawh hi hmang zui ta ila, kan Zoṭawng humhalh kawngah hmâ kan va’n sâwn dâwn êm! UNO-in kan ṭawng hi, ṭawng thi mai tûra zîngah an telh tiin kan iak kan iak a. Hlau lo leh tîm loa, zak miah loa kan ṭawng kan hman uar hi a ṭûl tak zet zet a ni.

Hetih lai hian kan ṭawnga lehlin theih miah loh thu mal chu a awm ve—kan ṭawnga a tlukpui kan neih ve miah loh, kan ṭawnga kan seng luh tâk ang chi—hêng bike, motor, member, adt. (Bike = chehpuah; pendrive = vihlâwr tia leh tum hrâm ang kha chu a pawm lo zînga mi ka ni ve tlat!) Chutihrualin, Vanneihtluanga’n online shopping kan tih, râl chah dâwr tia an chher (create) hi chu fuh hi ka’n ti veng veng thung khawp a!

Engpawhnise, Mizo mi nâwlpui kan punkhâwm zinna ber leh kan punkhâwm tam berna chu Kohhran huang chhûng, Biak in hi a ni. Kan Kohhran hruaiatute hian mawhphurhna sâng tak an nei a; ṭawng hman dik an zir a ngai hle. Sapṭawng chelek sek loa Mizo ṭawnga a tlukpui kan neih, kan han târ lan ang angte hi an hman ṭan ngam pawh a ngai tel a, hmang uar tûra Kohhran mite an sâwm tam pawh a ṭûl tel zêl ang.

Ni e, Mizo kan nih chhûng chu Mizo ṭawng hi kan ṭawng, kan tâ a ni reng dâwn a. Tû hnam dang ṭawng mah a ni dâwn lo a; zahpui loa hman uar kan zir hi a ngai tak meuh meuh a ni. Mizo ṭawng hman dik leh hman uar … i tlin e!