Chapchar kûtah thu sawi ve ta ila ka sawi tur te:

1. Chapchar kût hian kan pi leh pute'n intodelhna kawnga ṭhahnem an ngaihzia leh thawhrimzia a lantir a.

 

2. An eizawnna 'Lo neih' thua hna hmasa ber chu Lo vah hi a ni a. Hna hautak ber leh hlauhawm ber a ni bawk a. In sât palh, inchék palh, an thing kihin a vuak leh thinga tla, zâwn haw tur an awm fo ṭhin. 

3. An lo neih tur chin an vah zawh tak chu 'chap' an ti a. Chap chu hal fai theih tura nghah ro a ngai a, an nghah ro chhung chu chapchar an tih chu a ni. An hna hautak ber leh hlauhawm ber an zawh hnu chuan kût hmanga chawlh chu a phu hliah hliah mai. Hlim takin kût an hmang ṭhin a ni. 

4. Vawiina Chapchar kût hmangtute hian kan pi leh pute chapchar kût hmanna chhan hre rengin, taima takin ei leh bara intodelh tura bei turin thuthlung i la teh ang u.

Ei leh bara intodelh kawnga kan dinhmun chhiatzia hi ngaihtuah ila, chapchar kût hian mizote hi taima turin, intodelh turin min cho a ni tih hriain hlimhlawp nan i hmang liam mai mai lo teh ang u. 

5. Ram hruai­tute pawh hian Mizo mipuite retheihna khurah min hruai lut mek a ni tih hriain. Budget-ah pawh, awm lo ata awma siamtu, ei leh bar thawk chhuaktu, Lo neitute buh leh bal leh thlai thar chhuah tam theihna atana ṭanpuina tur ngaipawimawh ber rawh se.

6. Lo neitute pawh hian Central lama farmer-te'n an hamṭhatna tur sawrkarin a siam loh avanga huaisen taka an dodal ngam angin, puihna kan dawn loh chuan lungawi lohna i lanchhuahtir ngam ve teh ang u.

Ka lawm e.