SRS ṭang fan fan

Central YMA hnuaia ruihhlo dotu pawl Supply Reduction Service (SRS) an zuai lai chuan kan khawpui chu ruihhlo zawrhna khawpui ang maiin ruihhlo chi hrang hrang a leng nuaih nuaih a, naupang te te pawh kawng sirah drugs rui tih hriat reng reng hmuh tur an tam em em a, a zuar lah ngampa tak taka zuar hmuh tur an kat nuk mai. 

Heng hi hriain Central YMA chuan ruihhlo do tura din SRS tihchak a ngai tih a hria a, tun hnaiah theihtawp chhuahin hma a han la leh tak tak a, zia pawh a ziaawm tih a hmuh theih a ni. Chutihlai chuan SRS zingah lo pawr deuh emaw, lo che firfiak deuh pawh an awm ngei ang, hengte hian SRS zawng zawng hnathawh a ti ṭhuanawp vek lo tih hriat a ṭha. 

Tun hnaiah SRS chetna a chhe lam social media hrang hrangah hmuh tur a awm leh ta nawk mai. Dik lo taka SRS chetna hi engemawchen a awm ngei ang, mah se duh vang renga va che nasa an ni bik lo ang; ruihhlo do kawngah chet nat deuh a ngaiah ka ngai mai. Ṭhahnem an ngaih luatah lo che firfiak deuh pawh nise a awm lohna a awm lo ang. 

Dan kalha ruihhlo zuarte hi dan anga an chunga hmalak a har ve viau a ni, dan bawhchhiaa dan loa ruihhlo zuarte hi dan ang diak diaka deal theih an nih bik lohna chen a awm tlat a ni. Tlema firfiak deuhin an chunga action lak a ngai a, SRS an lo che na deuh a nih pawhin dem ngawt lo ila, engtin nge kan puih theih ang, tih ngaihtuah zawk ta ila a dik awm e. 

Tlema chet firfiak deuh chang an han nei a, social media leh news pangngaiah demna lam ringawt kan phuhchhuak a, kan dem luih luih ringawt a. Mizo leh Mizoram chhan tura penchhuak SRS-te hi dik takin an thawk reng thei bik lo tih hriatsak fo a ṭha ang. Dan loa chete chungah dan lo bawka kutthlak chang a awm pawhin i dem luai luai lo teh ang u. Ṭanpui theihna kan neihna zawng ila, i ṭanpui zawk ang u. 

SRS hnathawh hi a chuai mai tur a ni lo a, chak zawkin a kal zel tur a ni. Sum leh tha-a pui thei kan awm phei chuan i pui zel ang u. "SRS ṭang fan fan le" kan ti tur a ni.