HE LEHKHA HI DIGEST TUM CHHIN ANG AW...

Central sawrkar hnuaia Ministry of Home Affairs enkawl department 1, Department of Border Management a, BM-1 Division (India Nort East lam International Border bik enkawltu) Commandant in ni 13 November 2019 daih tawha Manipur leh Mizoram State a sawrkar hnathawk lu ber, hotu ber ve ve , Chief Secretary te a rawn thawn lehkha mawi (red letter) chu a ni. 

He lehkha sawi tum ber, main subject chu kan ṭhenawm ram aṭanga Kuhva (arecanut) dan lova tawlh luh (smuggling of/ illegally Imported) chungchang a ni. Dan anga tawlhluh mek lo en fimkhur lehzual tura tih lam ni lovin, Dan lova tawlh luh (smuggling of arecanut) chungchang ngawr ngawr zawk a ni. 

He lehkha hi Karnataka State a Kuhva zuarho Association, Shimoga khua hovin Central sawrkara hemi chung chang chiangkuang taka an report behchhana ziah a ni.  He central sawrkar lehkha mawiah hi chuan dan lova kuhva tawlh luh kawnga Mizo sumdawng (local traders) te'n tawlailir (carts) leh motor te (pick-up) hmanga Zokhawthar leh Champhai bawr vela an lo phurh  tlang pui (conduits) thu a chuang a. He lehkhaah hi chuan Kuhva phur ru tute'n kuhva bag kara ralthuam (arms) emaw ruihtheih thil (drugs) emaw thil dang phal loh (contraband) an phur ru tel tih ang chi puhna erawh chu a chuang lo hlauh thung. 

Pawi ta ber mai zawk erawh chu, MAMCO kan tih mai, Mizoram State sawrkar PSU (Public Sector Undertaking) lar ber pawl, Mizoram Agricultural Marketing Corporation chuan chung Kuhva dan lova Mizoram/ India a lakluh (illegally imported/ smuggled) chu... India ram ril zawka tluang taka  thawn lehzel theih turin chu 'tawlh ruk thil' ngei mai chu MAMCO hian Mizoram aṭanga tharchhuah angin an lo ziah sak (legalised) leh tak ṭhin avangin phurh chhuah lehzel phalna (transit pass/ permit) an lo pe leh ṭhin tih te zu han chuang a! 

Keini mi naran chu sawi loh a bikin Pathian leh kan ram tan ti tute, MNF party MLA/ Minister leh Party hruaitute thinlung hi hetiang taka inpuhna level sang lutuk tak hian 'ti na' pha ve tak maw...? Zak ve det tak ang maw? 

Heng Kuhva tawlhluh ruk (smuggled) aṭanga GST emaw ni kan lo lak vel ve ngawt chhan pawh a chiang lehzual ta. Lal Isua Krista chu ka Lal leh Chhandamtu a ni, thih thlenga Amah zui (entawn) zel tur Mizo Kristian ngei mai... inti tute'n dan lo (black) chu rapbet a hneh ngei tum zawk lova dan anga thil tih (white) ni zawk awm fahrana kawisuruta chantir zawk zel kan lo tum ṭhin dan formula tenawm lutuk tak te lah chu min chawmtu (Delhi thuneitute) te'n keini ai zawk mahin an rawn hre khiu khiau tawh mai sia le. 

Chutiang taka smuggling kual vel dan (modus operandi of Smuggling) lah chu chiang kuang takin Delhi tlanga awmte'n Aizawla state sawrkar hotu ber chu an rawn hrilh ta siah siah mai si chu a nih hi.

Tuna kan ram leh hnam hruaitute hian thil dik lo tih (tih dik loh palh ni lovin) te, eng level-ah pawh dan lo/ nih phung ni lo baksak anga tih/ chet bawrh bawrh zel mai te hi nitin nunphung (daily life style) ah an ngai tawh tlat niin a lang. A hahthlak lam deuh chu a ni. 

Tuna Sawrkar hi bang fel et ngam se. President's Rule-ah awm zawk ila, kum 1 vel tal chutah an lo piangthar hman a nih tak leh thudang nise... Nih loh chuan hetianga kan state sawrkar ber zawk hi a chet bawrhban chhoh zel chuan.... Zo fate future hi a bon mawlh lo.