Serchhip boruak A ngaihnawm dawn e

AMC Election kan zo chauh a, AMC election tluk zeta ngaihnawm tur leh mipui ngaihven Serchhip bial kan hmabak a. Hun kal tawha  Serchhip bial dinhmun leh tuna mipui sukthlek dan tur lo thlir lawk ila. 

Bye Election dang ang lo takin party hrang hrangten ngaihdan  mak tak leh tum dan mak deuh an nei hlawm a. Bye Election dangah chuan Opposition party-te an ṭangrual ṭhin a ningai a. Tun ṭum hi party hrang2 ten engemaw tak hmuh an nei a niang chu, thawhpui neih an tum lo vek a. Mal din an cho em em vek hi a mak dangdaina tak a ni. Party hrang hrang dinhmun lo en ila. 

Congress party: 

Serchhip hi Congress bial hlun tak a nih kan hre vek ang a, UT kan nih hnu, 1972 ah Mizo Union tlingin, 1978 leh 1979 ah PC tling ve leh a, hemi hnu 1984 aṭanga term 7 zet chu Congress bial hum a ni. [Kum 1984-1987-1989-1993-2003-2008-2013 ah te.] Heti khawpa Congress bial hum ni ṭhin hi MLA election hnugnung berah Pu Duhawma'n a chhuhsak hlauh a. Pu Hawla leh Pu Duha inthlauhna hi vote 410 chauh a ni. 

Tun hi Bye Election nimahse Congress hian an bulum luah tir tura ZPM support pek ngawt chu politics kal zel atan a him loh zia an hmuchiang hle a, Serchhip tlangval, politics a tawn hriat ngah tak din tir tur an lo nei bawk nen, Congress hian an tifuh viau chuan tlin theihna chance an nei a. A tlinglo palh a nih pawn Serchhip tlangval hian next atan kawng a sat kaw tho tho tihna a ni. A huaisenna hrim2 leh Congress vote bank a nihna hian advantage tam tak a neih tir bawk awm e.

Serchhip bial hi MNF tan bial ṭha tia sawi tur a ni ngai lova. 1998 a Er K.Thangzuala (MNF) bak kha  MLA an nei tawh lo. Bial ruak alo nih takah chuan state-ah an sorkar lai ni a, MLA neih belhna hun remchang tak a nih theih bakah Bye Election hi ruling chanpual a nih ṭhin angin MNF hian thapui thawha beihpui thlak an tum hle ang a. An rawng huai Pu Zawma, Vice President meuh an thawh chhuak a. Party feeling an chawhchhuah thiam a, campaign resum an thlak fuh phawt chuan opposition party ai ngawt chuan tlinna chance an nei sang hle tih alang. Kan sawi hawnna ang hian Opposition party  ṭangruallo hian ruling chakna chance a titam zual a, beihrawn sela ruling tan pawh tawhkhirh tak an nih dawn nen.  Opposition-te hi engemaw takin a mawlh a ni maithei e. 

2018 MLA election dawna party hrang hrang inhlawm­khawm, MLA 8 nei thei ZPM hian Aizawl pawna MLA 2 an neih zinga 1, Pu Duhoma chu Speaker-in "dan a bawhchhia e" tiin MLA aṭangin a ban a. Amah vanga Bye Election neih ngai ta Serchhip bial hi Congress bial hlun a nih kan hre vek a. Pu Hawla, term 4 zet a zawna alo tling tawh chu MNF in 1998 ah an hneh a. Chumi hnuah term 2 sorkar leh in, 2018 ah an kum 10 sorkar chu a tla leh a. He hun nang chiah hian Pu Duhawma chu a han ding a, CM chu a khing tla a.

Congress President leh Chief Minister meuh khing tlatu Pu Duhawma MLA aṭanga ban alo nih takah chuan Bye election neih alo ngai a, ZPM chuan ihe lovin Pu Duha bawk chu ding leh turin anti a. MLA aṭanga ban a nihin dan bawhchhelo leh thiamlohna neilo angin a in sawi a. Ban a nih hnu lawk aṭangin a campaign nghal a, lainattu pawh  a nei ngei ang tih a rinawm. ZPM hi party naupang tak angin alang a, party awmlo ata indin a nilo tih kan hre vek a. ZNP, MPC, ZEM etc. ten an din a nih kha. ZPM din hnu lawka Chief Minister meuh khing a, hneh theitu Pu Duha hi ZPM rau rauah a buk a rit hle tih alang a. Ban a nih hnua a campaign dan leh mi lainat a hlawh dan hre kilhkelh lo mah ila, a ṭawngkam thiamna te, party leader a nihna hmangte hian beiseina sang tak, tlin mai theihna an nei awm e.

MLA Gen Election-ah khan ZPM  hian neutral support a hmu ṭha hle a, Kohhran thlenga sawi zawm an ni. Kha kha an chakna hmanraw pawimawh tak a ni a, tunah hian kha boruak ang kha an chawk tho leh thei angem tih chu hriatthiam harsa tak a ni. 2018 anga neutral leh Kohhran support an hmuh ṭhat viau chuan Pu Duha hian tlin lehna chance ṭha tak a nei. 2018 ah party ni lo, movement anga an kal kha neutral support an hmuh ṭhatna chhan a ni e an ti bawk a. Political Party an nih hnu hian mipuiin engtin tak ngai zel ang maw!? 

Thil mak tak chu opposi­tion party Congress, MPC leh BJP te thlawpna an hmulo hi a mak hle a, an dinna tlang a sang lutuk nge, a malin tlin an inring tih hi zawhna awm thei a ni. Nge an sawm lo hrim2 tih kan hre lova, Bye Election-ah opposition aṭanga ruling hneh theihna thuruk an hria pawh a ni mahna. Political party tan ECI pawmpui (Recognized) party nih angai a. ZPM hian MLA election hma khan Recognition an tifel hman lo a ni maithei. Independent ticket-in MLA chuh angai a. An MLA neihte pawh Independent MLA nih reng a ngai tihna a ni. 

Election hnuah ECI-in a pawmpui ta a, ECI in ZPM Party a pawmpuina hi an MLA te tan hian "Thang" a ni  ta ringawt a. Pu Duha hian he thang hi hre rengin a dai per lui a, a awk ta a ni ber a. Mipuiin dan siam tura kan thlante leh rorel tura kan thlante'n dan pawisa lek lova an bawhchhia leh an palzut nia lang hi a pawi hle a. A bantute'n "dan a bawhchhia a ni" antih laiin lehlamin "dan ka bawhchhe lo, Court-ah ka kal ang" an ti a. A dik chiah, dan chu dan hmang veka khingletin, Pu Duha leh mipui pawn thudik zawk chiang leh zualin kan hre vek tur a ni a.  Thiam inti ve ve karah mipuiin atawp thlengin rinthu kan insawi siak kumkhua tawh dawn tihna a ni. Mipui court-a chinfel chu election zawhah lo chuan kan hre dawn si lova. Hriat a nghahhlelhawm tawh mang e.

H.Laldingliana