Rangvamual versus Serchhip

Tun hnaia Serchhup biala by election an neih tur campaign naah MNF President mai ni lo Mizoram Chief Minister meuhin Serchhip mipuite vote a dil dan ṭawngkham khan mipui rilru a ni lo zawngin a khawih na hle tih social media-ah a hmuh theih. Kan state pum hotupa hian Serchhip mipui a dah dan leh Mizo­ram chunga mi tho Rangvamual a dah dan hi a puitling lo hle a ni. 

Democracy rama cheng kan nih angin a bial mipuite hian an duh duh an thlang tling thei a, an bial enkawltu atana an duh ber an thlang tling thei a ni. An duh an thlan tlin chu bial dangin an nuihzat ngawt tur a ni lova, Mizoramah khawi bial mah hi an bialtu MLA an thlan tlin aṭanga teha an nuihzat pawh kan la ngai lova, in nuih zatna tur pawh a ni lo. 

Mahse kan hotupa ber chuan Serchhip mipuite chu MNF an thlan tlin loh chuan bial dangin an nuih dawn angin a sawi tlat hi a pawi ngawt mai. State khat hotupa a nih angin state chhunga khawi lai pawh hi inang khatin a en tur a nih laiin opposition bial chu kan state hotupa hian a dah hrang tih a thusawiah kan hmu. 

Serchhip-ah phei hi chuan MNF an vote tlin loh chuan Rangvamual pawh tluk lo, midang nuihzat tur bial an nih thu a sawi ta siah siah mai a, hei hi chu ani kan state CM leh kan pa ber tura kan ngaih ṭawngkam han ni lo thei hlauh se aw.... tiin kan sawi zui vawng vawng mai a ni. 

Kan state hotupa hi Pu Vanlalzawma a tlin loh a hlauh luatah a ṭang sual ve palh a nih a rinawm a, Serchhip bial mipuite hi MNF an vote tlin loh chuan Rangvamual pawh tluk lo tur angin a ngai tlat a, mi nuihzat tur angin a ngai bawk a ni. 

Hetah hian thil lo lang chu Rangvamual a sawi lang hi a ni. Zep thu a cheng lova Rangvamual hi zu leh ruihhlo tamna hmun a ni a, hei pawh hi MNF mualphona bawk a la ni cheu a, zu zawrh phal lova khap bur siin Aizawl daiah zu hmun anga ngaih theih an la awm tir thova, chu hmun ngei chu Chief Minister pawhin a sawi chhuak a, hmun zahpuiawm angah ngaiin, "Rangvamual pawh in tluk lovang, miin an nuihzat ang che u," tiin Serchhip mipuite a vaukhan ta mai a. Hei hi CM thusawi ni loin, MNF party worker te sawi pawh ni ta se Serchhip mipui thin a ur dawn vei nen kan hotupa berin hetiang maia a sawi hi chu pai dam a harsa an ti ve ang. 

Sap hovin 'slip of tongue' an tih ang­ah ngai ila, MNF President a nih anga vote a zawnaah a ṭawng sual palhah ngai ta ila, chutianga ngaihdamna thinlung nena thlir a nih loh chuan Serchhip bial mipui tan chuan a bial pum hmusit anga ṭawngtu hi vote a harsa dawn a ni.