Aizawl traffic jam chungchanga rawtna

1.    Aizawl City Bus rawng inang hi ti tawpin, a neituten anmahni duh dan rawng hmang mai se, ‘CITY BUS’ tih lian taka ziak hi a hnung leh hma bakah a pang tawnah ziah nise. Hei hian kan khawpui a chei mawi ang. Tuna rawng hi chu a ṭhing tawh lutuk. 

2.    City Bus-ah hian kan nula nalh tak tak leh kan officer zahawm tak takte an chuan duhna turin ṭhutna leh a chhung hi changkang taka siam ṭhat tir vek nise. Hetianga ti thei lo chu permit cancel thlenga action lak nise. 

3.    City Bus hi tun aia mi­puiin kan chhawr theihna turin stand-ah decond 30 chauh ding ṭhin se, stand a an din rei ṭhin avangin mahni lirthei kan hawl chhuah a ngaih phah a ni. 

4.    City Bus hi nitin Bus 30/40 vel service lovin an in din chhawk ṭhin nia hriat a ni. Nitin in din chhawk lovin Bus hi tun aia tam service se, mipuiin kan hmang ṭangkai zawk ang. 

5.    Sawrkarin Department mal bus neih hi khap se, tuna Department bus zawng zawng hi Transport Department-ah vawm khawmin, heng sawrkar bus te hi Ramrikawn, Luangmual, Zuangtui, Sihphir, Zemabawk, Melthum, Mualpui etc. aṭanga New Capital leh office kal/ office dawr ṭhinte hruai leh thlahna atan hman nise; heta kal duh turte tan season ticket/ thlakhat atan lak zel nise. Hei hi office kal/ dawrtuten mahni lirthei an ken buai a ngaih lohna tur a ni. 

6.    Taxi stand welfare invuah a stand member ni lote taxi stand a din an phal loh hi thu neituten ti tawp rawh se. Hei hi taxi fare ti tamtu mai a ni. 

7.    West Bengal a an tih angin taxi leh 2wheeler taxi-ah ‘No Refusal’ (passenger duhnaa tlan loh awi loh) tih ziah tir ni se. Taxi/ 2wheeler taxi te hian passenger te duhna hmuna an tlan duh loh chuan a chungah action lak nise. 

8.    Taxi leh 2wheeler taxi tinte’n sawrkar bithliah ang taxi fare/ rate bu (chhun leh zan) hi passenger te en theih tura taxi a an tar bakah lak sawn a en theih tur kawl vek bawk se. A rate dik lova pawisa diltute complaint na tur mobile number te pawh taxi fare/ rate book-ah ziah lan ni bawk se. Taxi fare tar lo leh a bu kawl lo chu traffic police-in check ṭhin se/ passenger te pawhin report-in pawisa chawi tir ṭhin rawh se. 

Hetianga hmalak a nih chuan bus chuan a nawm bakah rei tak tak stand a ding lovin bus-in kan duhna hmun kan thleng zung zung thei ang a, taxi/ 2wheeler taxi chuan man a tlem ang a, mahni lirthei hawl chhuak kan tam lo ang a, traffic jam a zia awm ka beisei. 

He thil hi nang eng nge i ngaih ve dan le? Kei chu kan sawrkar hotu hetianga hma la ngam leh hma la thei kan mamawh niin ka hria.