BPL LIST TAM LUTUK HI

Hman ni chu hmun pakhata Health Care Card siam ka kal pel a, BPL chhungkaw tan Card siam nan Rs. 100/- pek tur a ni a, BPL ni lo chhungkaw pakhat tan Rs. 1000/- a ni tih a ni. BPL chhungkaw list a awm mai loh avangin Supply Department-in Ration card an siam a, ration buhfai a man tlawma lei thei chin te, BPL a an dah anga form pawh filled up tir an ni. 

Hetiang tur chuan BPL chhungkua chu an lo tam khawp mai. 

Hun a lokal leh deuh a, Health Department chuan BPL list an lo nei hrang leh si a, chu an BPL list ang chuan an lo tlem fut mai si a, chuvangin an lo filled up tir tawh pawh chu sut lehin, health department BPL ang chuan an tih tir leh ta a, a buaithlak mai bakah BPL a lo inziaklut tawh tam tak chu paih an ni leh ta a. 

Hetiang bawk hian kawng dangah pawh BPL hamṭhatna dawng thei tur an han tih reng reng hian khawi BPL list nge hman tur hriat thiam a har duh khawp mai a! Food and Civil Supply lamin BPL list an nei hrang a, an ni list ang hi chuan BPL an 

ṭhahnem viau. Tihlaiin DRDA lamin BPL list an nei hrang leh bawk a, an ni pawh hian BPL chu an la ngah fut a. Health department lamin BPL list an nei hrang leh bawk a, an ni list ang hi chuan mi an lo tlem leh viau ang lawi a. Tunlai hunah chuan thil eng emaw han tih dawn hian BPL chhungkaw tana tih tur hi a awm fova, mahse chungah chuan khawi BPL list nge hman tur hriat a har duh hle mai. Hetiang hi ram dangahte hian a ni ve ang em? 

Enga pawh chu ni se khua leh veng tam takah hi chuan BPL a awm hi kan la zak lo hle a, BPL ham-ṭhatna dawn ang dawn kan la chak viau zel mai a, hei hi chu kan rilru piansualna a ni mai awm mange pawh a tih theih. A nihna takah chuan BPL hi chu mi hnuaihnung tak, TV pawh nei pha lo, mobile phone pawh nei lo, in pawh rap ina khawsa, vantlang nunphung pawh pha lova khawsate nihna ni awm tak a ni. Chutiang mi chu khaw chhungah hian mi an tam vak chuan a rinawm lo. 

Mahse hetiang ni chung si hian BPL nih hi kan la chakin, BPL a ziah luh nih loh chuan rilru na ta tlat hi kan tam fut awm e. 

Hmun tam takah chuan retailer tur pawhin ruling party-in a recommend a ngai a, chutiang recommend turah pawh BPL a inziak lutte pawh supply department lama lo inpaih tir a, retailera ṭang ta mai tawkte pawh zuk awm fur a maw le! Village Council inthlanahte pawh hian Supply BPL a awm ngeite pawh zuk in candidate mai ngam zel a maw le! Kan taksa leh kan chhungkaw khawsakah BPL awm lo tak takte pawh hian BPL hamṭhatna dawn ang dawn duh avanga BPL a inthun luh duh ta tlat lah hi kan awm fur awm e. Heng thilahte hian kan Pathian rinna hi a tak lovin, hmai kawrah kan hmang mai mai a nih hmel hle mai. 

Champhai District a khaw ṭhenkhat kha chu hman kum deuh aṭang khan BPL awm lohna khua a puante kha a awm fur a, an ngaihsanawm. Kan Mizo khaw tam berah hi chuan TV nei lo emaw, phone nei lo emaw hi an tam vak chuan a rinawm lo. 

Khatiang nei reng si a BPL a awm duh ta tlatte kha chu an rilru a BPL a, an neih leh sum chu a BPL si lo a ni. Kan Pathian rinna mil hian nung ila, kan nihna tak tak hi nun pui ngam ang u.