Zo ṭawng humhalh leh dik zawka hman (CKṬP)

Ka hmingah hian hnam dang ṭawng a tel lo a, ka lawm hle. Ka hming satuten hnam dang hming lo sa tel pawh ni se ka paih leh daih mai thei. Pathian hian nupui leh fa min pe ta se, ka fate hmingah hnam dang hming a tel ka phal lo ve hial ang. Chu chu Mizo ṭawng uarna leh hnam tana thil pawimawh a ni. Mahni kohhrana naupang baptisma chang te hi lo chik ṭhin ila, Mizo ṭawng hlang ni lo hnam dang hming nena inpawlh an rawn pu leh fur ang. Ṭhalai nih lai aṭangin kan fate hming tur hi i lo ngaihtuah lawk ang u. 

Fb leh Whatsapp vel hi en ila, sapṭawnga lunglen kan tum fur. Go, sin & no more, strong enough, why not me, thy kingdom come, tih ang reng. Hnam bozia a ni chu ka ti khawl ngam chiah lo. Hnam dang ngaihsanna a ni. Hnam dang ṭawngin a chiang zawk, a fiah zawka ngaih tlatna thinlung aṭanga lo chhuak a ni thei. Intih changkan nana hnam dang ṭawng thiam ang chhun chhun hman ve duh tlatna vang a ni thei. 

Sapṭawng thiam tak tak hi chuan mahni hnam ṭawng an hmangaih let tawh zawk tlat. 

KṬP ziaktute hi an pawimawh lawrlak. Rel tur (agenda) chhawp chhuah, rorel thu ziah leh thupuan ang ang hi ṭhalaite ṭawng hman a ni nghal zel a. Ziaktute hian mawh an phur lian ber. KṬP ziaktute hian zo ṭawng hi inzir ngun lehzual rawh se. 

Zo ṭawng uar kan tih vangin sapṭawng hi khaw dang sial ang maia lo en mihran viau tur tihna a ni chuang lo. Zo ṭawng hlang hi hman duh pawh ni ila hmasawnna leh science thilah hian Mizo ṭawnga lo sawi zel duh pawh ni ila, tihngaihna awm lo hi a lo chhuak thar zel. Chuvangin, kan zirna in sanga an zirlai leh Baibul lehlin thar hi en ila, hnam dang ṭawng hi kan ṭawng puan mawi takin an lo khuh than mai a, kan huan leilunga a chi kuiṭiah ang maiin inneitu takin an lo chawm lian a ni. 

Eng tin? Sapṭawng chu an lo ti-mizo. Heng hnam dang ṭawng hi kan tapchhak saum lo tat ila, kan mautheiah lo vaipaden hmak bawk ila, hnam dang ṭawng chu kan lo ei ral zawk tihna a lo ni ang. 

Baibul lehlin thar hi en ila, Ephesi tih aia Efesi a ti mai a, Philipi ti loin Filipi a inti ang. Pharoa ti lovin Farawa tia ziah a ni ta. Hnam dang ṭawng chu an lo ti-mizo mai. Committee lovin Komiti, Kawmiti te lo ti ve mai zel ila. Hruaitu tih mai aia chairman ni ta daih ai chuan kan ṭawng huan pal a nek lo zawk ang. Sapṭawng tam tak hi Latin, Grik tih vel an tih-sap a tam. Zo ṭawng humhalh dan tur pakhat chu tih-mizo hi a ni.

Kawngah kan kal a, kan tlu palh a, kan tlukna piahah kan tho ngai lo. Kan tluknaah tak kan tho leh ṭhin. KṬP hi (kohhran dang ṭhalai pawl pawh) mizo ṭawng hnualsuattu pawl a ang dawn tlat. Sapṭawng titlangneltu ber pakhat chu a ni tawh sa a. Chuvangin, kan tluknaah tak kan thawh leh a ngai. A chhan chu;

l    Ei leh in sub komiti tih mai aia refreshment sub committee tiha tuihnai zawka ngai tlat kan ni. 

l    Inkhawmpui, intawhkhawm aia conference, meet changkang bika ngaihna rilru kan siam tlat. 

l    Khualchhawnna tih aia recep­tion counter tih duh tlat kan ni. 

l    Fak leh chawimawi emaw, Fakzai emaw hun aia praise and worship rau bik riaua ngai kan ni.

l    Malzai aia Solo chawilartu leh ṭhalaite thisena tuhtu a ni.

l    Thu leh hla zan aiin Literature Night ril riauin kan ngai a. 

l    Pehhel leh luhchilh tih mai aia Direct leh Indirect chiang zawka ngai kan tam.

l    Intuaitharna aia retreat hlawk­pui tum tlat kan ni.

l    Rel tur tih mai aia agenda hmu kohhran tlat nih loh a ṭha.

l    Thusawi tawi aiah short sermon tawi zawkin kan ngai tlat.

l    Rinnain 200 emaw, Mi 200+ zan emaw tih mai aia Project 200 tih vel ngaisang zawk kan la tam hle.

l    Lemchan tawi aia drama emaw, skit emaw hmuhnawm titlat KṬP kan ni. 

l    Zaipawl intawhkhawm, zaipawl inkhawm ho aia Unity choir tiduh tlat kan ni a.

l    Faklam aia worship dance tuipui zawk kan la awm cheu em?

l    Rimawi kutpui aia Musical Meet ngaina ni tawh lo hram ila. 

Advent Christmas tih tur nge, Advanced Christmas nge, ‘ed’ belh tur nge belh loh tur tih tih ai chuan KṬP Krismas Urlawk tih mai hian Mizo pa thinlungah krismas a tinghahhlelhawm daih zawk. 

Sawi tur a va tam em! Heng kan han chhawp chhuah ringawt pawh hi ṭawng ralna tham chu a ni hrim hrim. Kan la insiam ṭha duh lo fo a nih chuan mi ang lo kawlawm (pen) pai ṭeuh ang chauh kan ni mai.

Ṭawng humhalh chungchangah kan harhchhuak mek. CKṬP thupui zir hian a tak takin rah chhuah zel rawh se. Eng tin? Nakkum aṭang chuan KṬP fellowship aiah KṬP inpawlhona tih ni tawh se. KṬP General Conference hi KṬP Inkhawm­pui Lian ti mai ila, Bial KṬP Conference hi Bial KṬP Inkhawmpui ti tawh ang u. 

KṬP hi sapho nena din a ni. Conference leh Meet min lo hmanpui ṭhin kha dem tur an ni lo. Amaherawhchu, ṭawng thi mai thei dinhmuna kan awm tawh hnu pawha kan la conference reng te hi a mak hle. Hmasawn tur chuan danglam a ngai. Kan bial (Lunglei bazar pastor bial) chuan Bial chairman valedictory sermon tia lam puam ṭelh ṭelh loin Bial chairman kalchhuak tur thuchah tiin kan thlak mai a. Ṭawng humhalh a nih piah lamah a va fiahin a va han chiang zawk si em. Hmasawnna a ni. 

Ṭawng hi thil nung a ni a, a che reng a, a thi thei bawk. Ṭhalai pawlten mahni hnam ṭawng humhalh duhna kan nei a, hma kan la zel hi a ropui a ni. Kan thupui zir hian ram leh hnam hnuk a khawih pha tlat. Kohhran a ni emaw, tlawmngai pawl a ni emaw Mizo hnam leh Mizo ṭawng hmangaihtu tan chuan tun hi harh hun a ni si a.