Mau/raw chi supply leh monu damlo

Tun ṭum Mizoram Budget Session-a thil thleng tam tak zinga sawi zui hlawh ber chu kan Chief Minister Pu Zoramthanga'n mau chi ṭha supply theitu tur nia a sawi te monu lo damlo hlauh leh khami avanga mau chi supply tur khawtlai ta mai kha a ni a! Fiamthu thawhna hawi zawnga sawi zui duh ni ila chu ṭawngkam chhe tinreng nen beih zui a remchang khawp mai. Chief Minister meuhin Assembly House lama sawi atana mak a nih lam hi sawi tur tam tak a awm ka ring a, sawi zawm ka duh lam zawk chu indawr dan kalhmang mak tak kha a ni. 

Congress MLA Pu Zodin­tluanga khan a hriat duh tak tak vang emaw, sawi buai tir a tum vang hrim hrim emaw, Chief Minister meuh buaipui ber a nih vanga zawh buai ve a chak vang pawh ni se a zawhna kha, "Tun kum chhungin engzat nge an rawn thawn theih kan beisei, hei fur a phun hun hi kan zo mai dawn si a," a ti kha a ni a, "Kumin chhungin nuai engzat nge phun kan beisei," a ti kha kumin chhunga phun hman a beisei loh vanga zawh mualphona pawh a ni thei a, mahse kha kha kan chai ber tur a ni lovang, a chhan chu kan CM chhanna lam kha a mak em zawk chu a ni. 

Chief Minister khan, "E, kumin chuan phun hman lo ang, a chhan chu hardening a ngai a, kuminah kan tih hman chin chu hardening a ni a, kum khatah chuan mihring chen vel a lo ni ang a, nakkumah tan a, pawh ṭheha hetia multiply a ngai a, chuvangin a bulṭanna tur a nia. Tukin pawh khan ka zuk phone-a a titupa kha, a monu damloh avangin damdawi inah a lo awm lehnghal a... ngawi ru, a tirah chuan sing khat chu kar lehah chuan rawn thawn hram ka tum ang, engpawhnise thla tin nuai khat chu rawn thawn hram hram ka tum ang," tiin a chhang ta a ni. 

Sorkar thil a ni a, sorkar flagshop programme ang hialin an sawi tawh si a, hetah hian mipuite hian hriat duh kan nei a, zawhna ang zawngin point 10 lek han tarlang ila a ṭha ang: 

1. Tunge a supply-tu tur hi?

2. An monu damloh vang mai maia Mizoram state flagship programme a thil pawimawh tihkhawtlai hi sawifiah theih a ni em? 

3. Supplier hi eng tia thlan nge? Tender an chhuah em? Sorkar dan anga tih a ni em?

4. Supply-tu tur address kimchang, sorkar kaltlang lovin mimalin zuk dawr ve duh dawn ta ila min hrilh thei em?

5. Mizoram Chief Minister hian a hnuaia Department-a officer te pawh a biak tir thei lo em ni aw? Kan CM berin a supply-tu direct-a a be ta mai hi he supplier hian Mizoram leh kan CM hi engtin nge min ngaih ang? 

6. Mau leh rua hi expert (a zira zir chhuak) kan nei em le Mizoram state hian? CM thusawi hi kan pawmin kan ring zel dawn em ni ang? Rintlak leh rintlak lo min hrilhfiah sak thei tur an awm em?

7. Chuti taka ṭha duh mau/ raw chi chu khawi state-in nge hlawhtlin pui tawh le? State pum angin hausak puina atan hman kan tum si a. 

8. Mau chi ṭha hi kan Horticulture lam mi thiamte leh Forest official-te hian Mizoram san zawng, ruah tui tlak dan, a sik leh sa mil leh mil loh research an ti tawh a, a ṭhat ringin kan order ta nge ni Chief Minister-in ṭha a tih vangin? 

9. "Engpawhnise thla tin nuai nuai khat chu rawn thawn hram kan tum ang," a tih hi inremna awm sa angin em ni ang? Sorkar leh supplier MoU emaw, ziaka thil dah hrim hrim hi a copy hmu tawh kan awm em? 

10. MNF Minister leh MLA dangte hian an pu ber tui pui leh an flagship programme mau/raw chin hi an sawi ngai mang lo hi enge a chhan ni ang? 

State pakhat flagship programme kalpui mup mup tur, pawisa tam tham tak dahna ni bawk si mau/raw chin kan Chief Minister berin uar taka a sawi laia a supply tupa monu damlo kher kher hi a zialova. Kan ramin a hausak pui loh palh chuan a chi supply tura indawrna aṭang hian a bilhah a tho lo tia kan puh let leh lohna turin tun aṭang hian sorkar hian mau/ raw chi supply dan hi official-in chiang takin ziakin chhianchhiah se. 

A kalphung (procedure) pawh hi tu emaw monu damloh vang mai maia khaihlak mai lo tura an tih a ṭul a ni.