Serchhip bial mipuite u...

Serchhip bial mipui­te u, tun aṭanga thla hnih chhungin Mizo­ram rorelna sang bera ṭhu tur in thlang dawn niin a lang a, uluk taka ngaihtuahna sêngin, in bial aiawh tur lo thlang mawlh teh u.

State sawrkara rorel lai MNF chuan an party hotu lawkte zinga mi Pu Vanlalzawma an vawrh chhuak a. Ani mi pa ṭha tak, dam thluam mai a ni a; Mizoram aiawha Parliament hiala hun rei tak ṭhu tawh a nih bakah, Mizoram Legislative Assembly-ah pawh kum 5 chhung ṭhu tawh a ni a; ram rorelnaah chuan tawnhriat nei ṭha tak a ni ngei ang. Rorel lai party candidate a nih piah lamah, party-ah pawh hotu lawk tak a nih avangin, ani hi in bial MLA ni ta se, a thawh hlâwk viau mai thei. 

Lok Sabha MP leh Mizoram MLA a lo ni tawhna te, a awmna party te, amah mimalte thlir chungin, in tana ṭha tura in ngai a nih chuan lo thlang u la; in tana ṭhatna bik a nei lo tura in ngai a nih loh chuan thlan kher erawh in ba lo. 

Congress party can­didate Pu PC Lal­tlansanga hi in khaw­pui ber Serchhip pa a ni thung a; khawi hmunah pawh awm se, khaw mala a hmangaih leh duhsak ber tur chu Serchhip a ni ngei ang. A mizia te, an chhungkua te, an pi leh pute thlenga hre chiang bertu tur in ni. Ani pawh hi a awmna party leh amah mimal nihnate ngun taka ngaihtuah chungin, amah in thlan leh thlan loh turah thutlukna lo siam hrâm ang che u. 

ZPM candidate Pu Lalduhoma chung changah pawh in ngaih­tuahna uluk takin lo sêng ang che u. An party hotu lawk berte zinga mi a nih bakah, kum 2018 inthlanpuia an party-in CM ni tura an tawktarh kha a ni a; in bial aiawh tura in lo thlan tlin tawh a nih avangin in hre chiang ang. Kum 2 pumhlûm lo deuh in bial aiawh MLA a lo ni tawh a, chu kum 2 chhung chuan thil tam tak tihna hun a awm a, in bial tana a hmalaknate thlirin ngaihtuah ula, in bial enkawl turin a tlak nia in ngai a nih chuan, lo thlang ula, bialtu MLA ni tlâk lo khawpa hmalakna a nei chhiaa in ngai a nih erawh chuan thlan ngei in ba lo. 

Hei hi ka chah duh bawk che u: Kum tam tak chhung ruling MLA emaw, minister emaw bial ni satliah miah loin, chief minister bial in lo ni tawh a. CM bial in nih avangin bial dang zawng aiin in bialah hmasawnna a chak zawk em? Kum hnih vel chhung oppo­sition MLA bial in nih khan hmasawnna a ṭhuanawp ta tlat bik em? Tunah hian ruling leh opposition MLA eng emaw zat an awm a; an bial ṭheuh thlir ula, ruling MLA bialin hma an sawn uak uak bik em, opposition MLA bialte an bet tlawk tlawk a, hmasawnna tura hmalakna a awm thei lo bik em, tihte lo chîk teh u. Heng aṭang hian thutlukna dik in siam thei ngeiin a rinawm. Heng zawng zawng bakah hian, in can­didate-te ṭheuh kha an awmna party ngaih­tuah tel ula, candidate mal in thlan rual khan, an awmna party in thlang tel a ni tih lo hre mawlh ang che u.