Zirtirtu lak belh leh a chhehvel

Mizoram sorkar chuan Primary School leh Middle School-a zirtirtu indaih lohna nasa lutuk phuhruk nan Muster Roll basis (Skill -II)-in zirtirtu 946 zet a la thar dawn a. Zirtirtu indaihlohna school tamzia ngaihtuah chuan a lawmawm a, Mizoramin unemployment problem (hna neih loh vanga harsatna) a neih mek dante ngaihtuah pawhin thil lawmawm tak a ni. Amaherawhchu, ngaihtuah thui ngai tak thil a awm nual mai, i lo thlir kual vel dawn teh ang. 

1. RTE Act/NCTE/MTET: Kum 2010 aṭang khan National Council for Teacher Education (NCTE) chuan RTE Act 2009 in a phut angin Primary School leh Middle School Zirtirtu lak thar tur reng rengah Teacher Eligibility Test (TET) chu qualification pakhatah a dah tawh a, hriattirna hi August 23, 2010 khan tihchhuah a ni. Education hi concurrent list a nih angin heta tang hian central sorkarin TET a buatsaih bakah state hrang hrangin anmahni state tan an buatsaih ta zel a ni.

Mizoramah chuan Mizoram Teacher Eligibility Test (MTET) tih a ni a, MBSE-in exam buatsaihin, Recruitment Rules-ah pawh qualification ngai zingah MTET hi tarlan thlap a ni. Hetiang a nih lai hian tun tuma zirtirtu 946 lak turah hian MTET hi a ngai kher dawn lo niin tarlan a ni thung (Vanglaini 24.4.2019). Muster roll pawh ni sek sek sela, sorkar school a thawk tur an nih chuan MTET hi paltlang ngei ngei ngai a nih avang leh tuna lak kan tum dan hian NCTE guidelines leh Recruitment Rules awmsa a bawhchhiat ringawt dawn avangin harsatna lian tak thleng thei a ni. Zirtirtu nih ngei tuma harsa taka MTET lo paltlang tawhte tan pawh rilru nat thlak tak tur a ni bawk. Hetiang a nih avang hian he zirtirtu lak turah hian High Court thleng rap rap an awm a nih pawhin a mak hauh lo ang. Tripura a zirtirtu 10323-te an qualify tawk lo e tih avanga Court-in ban vek tura a tih, tun thlenga an la buai an la buai ang dinhmun khu kan tawk ve thei reng a ni. 

2. Departmental a hna lak kan ring zo lo: Education Minister-in a hma lama a sawi hmangin zirtirtu 946 lak tur hi MPSC kaltlang lovin, Departmental-a lak a ni dawn niin a lang a. Hei hian a tling apiang ni lo, duhsak zawngte thunna chance zau tak a hawng ngei dawn a, mipuite pawh kan ngaih a ṭha lo hle, sorkarah rinna kan nghat ngam lo hle niin a lang. MR-a lak tur pawh ni se, sorkar hmasa tih ang khan MPSC lak tir zel se sorkar tan pawh a him ber a, Minister leh MLA-te tan pawh inphenna ṭha tak a ni zawk dawn a ni. 

3. A khaw mi ngei: Tun ṭuma zirtirtu lak turah hian a khaw mi ngei lak tur (duhsak bik tur) anga sawi a awm a, hei hi rawtna ṭha tak anga a lan laiin ngaihtuah ngai tak a ni. Zirtirtu 946 hi post by post (post ruahna mil) a hnawh khah tur nge, Mizoram puma zirtirtu indaihlohna phuhruk nana a hlawma lak tur tih hi tihchian hmasak a ngai a. Tin, post ruak awm lohna Aizawl leh District capital danga trained teacher awmte hian an dil ve thei dawn lo tawp tihna a ni thei em tihte thlenga ngaihtuah a ngai ang. 

4. Zirtirtu indaih lo?: Mizorama zirtirtu indaih lo kan tih fo hi zirchian ngai tak a ni. Mizoramah State sorkar enkawl, Govt. school leh SSA school bikah hian Primary School-ah zirtirtu pakhatin zirlai 14 (14:1) an enkawl mek a. Middle School bikah phei chuan zirtirtu pakhatin zirlai 7 (7:1) chauh an enkawl bawk (source : Annual Publication, Directorate of School Education, 2017-2018). Heta ṭanga lang chiang em em chu zirlai awm zat aṭanga chhut chuan Mizoramah hian Primary & Middle School-ah zirtirtu kan lo la ngah tawk hle tih hi a ni. RTE 2009-ah chuan PTR hi Primary school-ah 30:1, Middle school-ah 35:1 tih a ni a, national norms aiin Pupil Teacher Ratio (PTR) a sang fal nalh a, India rama zirtirtu ngah ber kan la ni hial maithei. 

Hetih rual chiah hian, zirlai awm zat aṭanga teha zirtirtu ngah reng si, kan indaih thei reng reng si lo hian chhan engemawzat a nei ngei dawn a. Hengte hi a ni thei em? 

1)    Khawpui lama zirtirtu inhnawh­khawm, zirtirtu semrual theih loh 

2)    Kan mamawh aia tam sorkar school kan nei a ni thei. Kohhran leh private school a tam tawh avangin khaw pakhata sorkar school awm dulte hi tunlai khawvelah chuan thil ṭul lo tak a ni thei. 

3)    Hetiang a nih avang hian zirlai nei tlem school-te sawikhawm (amalgamate) a ngai hle a ni thei.

4)    Heng zawng zawng lo thlen chhan hi administrative failure (transfer chungchang chinfel theih lohna) niin a lang. Administrative system lam siamṭhat a nih ve si loh chuan zirtirtu sang tel pawh lak belh ila, kum reilote-ah harsatna ngai tho hi kan tawk leh thei. 

5. Management system: Elementary section a Mizoram zirna siam ṭha tur hian zirtirtu lak belh ringawt piah lam kan thlen a ngai. Management system thlak a, PPP mode ang deuha kalpui a, deficit school (khawtlang/ society/ kohhrana innghat, sorkarin sum leh pai tam zawk a tum) dinhmunah kan inleh chhoh leh hret hrette pawh a ngai dawn niin a lang. Hetiang system hnuaiah hi chuan school tin management lamin anmahni school a thawk tur mithiam an la mai ang a, hei hian zirtirtute transfer vanga kan buaina tam zawk pawh a sukiang ang a, sorkar sum senso pawh nasa takin a tlahniam ngei ang. 

Mizoram zirna ti hmasawn tur hian politics rilru dah ṭha a, hmalam pan tura ke pen a hun. Zirtirtu lak dan fimkhur a ngai a, transfer policy felfai tak kan neih a hun takzet. Tunah hian Education Minister viak ṭha tak, chak tak kan nei a, hmasawn tura midangte dai ngam loh dai ngai tlat ṭhin hi a dai ngam i beisei phawt teh ang.