MTET pass lo lak tumna hi

College zirtirtu ni thei turin tehkhawng a awm a, chu teh­khawngah chuan NET neih a ngai. Hmanah MNF sorkar lai khan mi langsar tak takte fa pawh telin NET nei lo kha college zirtirtu atan an la nual a, NET nei dangte lungawi lovin an khing ta a, an tla ta phak phak ni tain ka hria. Chutihlaiin khang NET nei lo ṭhenkhatte kha NET Exam na hun an pe leh tho a, ṭhenkhat chuan hun tiam chhungin NET an nei hman a, college zirtirtu nghet atan an awm zui ta niin ka hria. 

Tuna primary school leh middle school zirtirtu ni turin tehfung, paltlang ngei ngei ngai a awm a, chu chu MTET a ni. Mizoramah hna a vang bawk a, MTET exam-a paltlang tawh hi 4,000 chuang zet an awm tawh niin an sawi bawk. Tichuan, sorkarin a hlawmin zirtirtu a la dâwn a, mi 1,000 dawn zirtirtu a lakna turah zirtirtu ni tura paltlang ngai ber MTET chu a paih bo ta tawp mai. Eng rorelna dan nge ni ngai? 

Kan Education Minister leh a thawhpuite hian Mizo ṭhalai MTET nei tawh 4,000 chuangte hi an ring zo lo em ni? Dan naranin hna lak dawna relaxation hi an siam hiam a diltu lamin an tlin theihna turin a ni ṭhin. Tuna zirtirtu lak thar turah hi chuan a dil thei (dan ang thlapa qualified) 4,000 chuang an awm avangin hna lakna tur dan (Recruitment Rules) hi tihhniam/ tihdanglam (relax) a ṭulna a awm lo. 

'MTET nei si, zirtirtua lak thar turte hi thingtlangah an awm duh an ring lo,' tihte chu mahni mawng hlimna a ni. Sorkar ve riang ruang, Education Minister pawh MZP President hlui niin zirtirtu sorkarin a duhna hmuna awm duh lote hrem duhtu a nih ka ring. MTET nei chauh la se, an post-a awm duh lo chu ban nghal se (muster roll an nia ban a harsa lo), tichuan mahni post-a awm duh lo zirtirtu lak thar zingah an awm lo ang. Chuti lo lam zawngin kan ram hruaitute hian, "Inthlan dawna hna pek kan tiamte dah luhna remchang," an lo ti vel mai mai a nih chuan ka ram vei hi ka titawp nghal ang, ka vei buai peih tawh lo ang.