MIZORAM STATE CANCER INSTITUTE STAFF LEH COVID VACCINE

Covid-19 venna, Covishield vaccine, Serum Institute of India (Pune) siam chu India ramah ni 16, January, 2021 aṭang khan pêk ṭan a ni a. Mizoramah pawh India state dang ang bawkin healthcare worker-te chu dawng hmasa tura tih kan ni. 

Mizoram State Cancer Institute, Zemabawk, Aizawl pawhin a dose 1-na chu 22nd January, 2021 khan pêk kan ni a. Group hnihah min ṭhenin, a hnuhnung te hian ni 25, January, 2021 ah an dawng thung. Dose hnihna hi ni 23, February, 2021 ah pek leh kan ni bawk. Vaccine dawngte a vaccine thawhdan tlangpui kan han târlang ang e. 

Vaccine dawng tura tihte hi mi 143 kan ni a, chhan hrang hrang vangin mi 23 in vaccine an la lova, vaccine late hi 120 kan ni. A naupang ber kum 22, a upa ber kum 59 inkar kan ni. Hmeichhia 78 leh mipa 42 in vaccine hi kan la a ni. 

Vaccine la lo mi 24 te hi nau pai, nau hnute pe lai, hrisellohna benvawn neih vanga la ngam lo leh a ṭhen Aizawl pâwna awm rih (out of station) vanga la lo an ni hlawm.

Khawvel ram hrang hranga Covid vaccine dawngte  insawisel dan tlangpui chu: inchiuna lai na, khawsik, tlun, chau, taksa na ṭhem ṭhum tih te a ni. Chumi zulzui chuan kan damdawiina thawk vaccine late hi zawhna zawh an ni a, an insawisel dan tlângpui chu hetiang hi a ni.

Table 3: Vaccine dose khatna hnu a insawiseldan tlangpui

 

Table 3 a kan tarlan bâkah khian staff zinga vaccine la pakhat, allergy nei nasa ṭhin chu vaccine a lak hnuah allergy insawiselna a nei a, vaccine lama hotute hnenah pawh report a ni. Amaherawhchu, dose 2na a lak lehin, heng insawiselna hi a neih tak loh avangin vaccine vanga allergy chhuak a nih hmel ta lo. 

Table 3 a kan hmuh ang hian vaccine late insawiselna tam ber chu bana inchiuna na a ni (mi 91, 75%). Chiu lai chuan a na lutuk lova, a zânah leh a tûkah a na deuh ber. Midangin min tauh palh emaw in a na a, mi tam zawkin hna pangngai kan thawhpui thei. 

Vaccine la zinga mi 60 (50%) in khawsik kan nei. Khawsik hi a tlangpuiin vaccine lak zan aṭanga in ṭham chhovin a tuk zingah pawh khawsik kan nei zawm hlawm. Nachhawkna pangngai (paracetamol) in min chhawk tlangpui. Mi 31 (25%) hian a sik er er an ti a, mi 60 (50%) in khawsik an nei lo thung. A tlangpuiin khawsik hi a tuk thleng kan nei a, mi tlemte ah ni hnih/ ni thumna thlenga khawsik an awm thung. Ni 5 na thlenga la chauhpui hi mi pathum (3) an awm bawk. 

Tlun nei hi mi 24 (20%) in an report a, vaccine lak zan leh a tuka tlun vek an ni. Taksa rawl leh na nei in report mi 61 (50.8%) an ni - ruhchuktuah na leh taksa sil, chet vel nuam lo kan sawi deuh ber. Mi 25 (20.8%) in vaccine lak tuka chau leh thothang ṭha lo kan nei a. Hnathawh leh chetvel kan thatho lo a, mut hahdam kan thlahlel tlâng. 

Covid-19 vei zingah kam tuina hloh (loss of taste) an awm nual. Covid vaccine la zingah mi 20 (16%) in kam tui lo kan sawi. Lu na hi mi 5 (4%) in an sawi tel bawk. Luakchhuak hi mi 4 (3%) in an sawi a. Chutiangin, mi 4 (3%) in hritlang, hnaptui, hrawkza an sawi bawk. 

Insawiselna neuh neuh kan nei nual nain mi 110 (91.6%) chuan a tukah damdawiin leh in lam hna pangngai kan thawk chhunzawm thei a. Mi 10 (9.4%) erawh chu ni hnih/thum hnuah pawh hna pangngai thawh an harsat. 

Mi 120 zingah hian inchiuna tlem a na ti deuh bak insawiselna dang nei lo mi 58 an awm a (48.3%). Khawsik pawh an nei lo. Heng zinga mi 5 hi natna benvawn - thisen sang, zunthlum emaw lung ṭha lo nei sa an ni hlawm. Vaccine la na leh na lo zingah blood group leh taksa rihna (thau emaw cher) in inzawmna a nei lo bawk. 

Covishield second dose hi ni 23, February, 2021 khan pek leh kan ni. Mi 116 la tur zingah 118 in kan la a, mi pakhat hi dose khatna a lak hnuah nau a pai tih a hriat avanga la ta lo a ni. Pakhat hi natna benvawn vanga la chhunzawm ta lo a ni. Pahnih dang hi dose hnihna pek laia an zin avangin nakina pek leh tur an ni. 

Dose hnihna lak hnu hian mi 11 (9%) in bana inchiuna na deuh bak insawiselna kan nei ta lo. Mi panga (4%) in khawsik leh, mi 2 (1.7%) in tlun an nei a. Taksa rawl mi panga (4%) leh mi 4 (3%) in chau kan nei a. Vaccine lak tuka hna pangngai thawk thei lo mi pahnih (1.7%) an awm bawk a ni. Dose khatna aiin dose hnihna chu kan la na lo ta viau hlawm a ni.