Nula Hmeltha

Kan thupui,nula hmeltha han tih ngawt mai chu eng nge maw ni le,kan ti thei ang.Nia,hmeltha chungchangah hian Mizote pawh kan mikhual lo hle a,thawnthuah te kan pipute hun lai pawn kan lo nei ve fo tawh a ni.Hnam changkang apiang an lian in an hmeltha a,keini pawh tun hnu hi chuan kan nalh ve tawh ang reng viau mai.Mizo nula feet 5.6,tih vel bawr te hi chu an hleitling ve viau a ni.Hetih lai hian hnam dang,vai,khawchhak,etc.te rin aiin an sang duh viau mai.Khawchhak lam hote ngat phei chu an ngo, eng pheng tih kan hria ang.Mizote pawh hi hetiang ang ni ve thei reng tur hi kan nia,mahse,kan in uluk peih lo,zuk leh hmuam te kan ti nasa,ei leh in pawh a dik tak chuan kan fimkhur lo hle.Mizo hmeichhia hmeltha,chhungkaw dinhmun pawh pangai tak,invawng tak awm pawh hi a tawp ah chuan an hmai a duk leh tlat thin.Hnam dang zingah hian hmai duk te hi a awm ve ngai vak emaw ni chu aw,ka ti,keini erawh duk ve lo chu tlem te chauh an ni.A lang sar si a,mawi lo ve tak chu a ni,mahse,kan hri vei tlanglawn ber a ni tlat mai. 

Mit A In Ang Lo – Mi heti zozai zingah hian hmeichhia avanga inti buai sawi tur hi an tam lo hle.Nupui nei tawh zawng zawng te hian an kawppui theuh te hi an hun laia an lungdumtu ber,tha tih ber an neih theuh a ni.Chutiang bawk in tlangval hote pawn duh zawng kan nei theuh a,mahse,a in ang lo hlawm vek a ni.Eng tin nge tha tih ber theuh chi hrang hrang kan neih theih mai le,lo in ang ta hlawm se chuan buaina nasa tak kan tawk thin dawn a ni.Siamtu hian alo ruat thiam iti mai ang,kan intih buai loh nan,duh zawng,tha tih zawng hran theuh turin min lo siam alo ni reng mai.Heta pakhat in a hmeltha a tih kha,heta mi chuan alo ti ve lem lo a,chutiang zelin.Kan thlir dan leh hmuh dan a in an loh thin avangin hmeltha ber e,fuh ber e,han tih em em tur kha alo awm thei ta lo a ni.Miss Mizoram kan tih te,Miss India kan tih te pawh hi a dik tak chuan kei ngei pawh hian tha tih lem loh ka nei fo mai.Chuvang chuan a tha ber e han tih tur hi an awm meuh lo,kan mit a in an loh hlawm miau avangin. 

Khaw Khat Nula Hmeltha – Hmeltha ber an awm chuang thei love kan ti zo chauh a,khaw khat nula hmeltha kan han ti leh si dawn a ni.Tun hma atang tawh khan,khaw tin,veng tin mai hian nula hmeltha,kan khaw nula hmeltha,kan veng nula hmeltha anih hi,han tih tur kan nei thin.Heng mite hi tam an ni ngai lova,pahnih khat bak an ni ngai lo.Nia,mi zawng zawng zinga tha han tih rawn deuh bik,lo tha fal bik hi chu an lo awm ve thin a ni.Heng mite hi a fel pawh an fel duh phian a,an zau a,fiam te an dawl hle thin.In leng te pawh an ngah thin a,an ti lawm thiam riau thin bawk.An bula awm a nuam a,in ngaih bel an awl hle bawk.Mi rel leh sawi te pawh an hlawh duh phian a,mahse,heng te hi chu tluk lo tute tih a ni duh bawk.Khawi lo kal chhuahnaah te pawh mi mit a fu duh hle a,khua/veng ti hmingthatu an ni ve reng a ni.Pasal pawh awmthei tak chhungkua a mi emaw tlangval changkang tak emaw an nei thin.Khaw khat nula hmelthate hi an lo awm ve reng a,nu leh pa leh chhung khat laina ten an chhuang hle thin. 

Hmelthat Ve Theih Dan – Hmelthate an hlu kan awt,an tih dan te pawh kan entawn thin anih hi.Hetih lai hian hmethate chu tlem te,a dang zawng chu kan hmeltha ve lem lo tih kan in hria ang.Hmel a siam that theih loh nungchang erawh a siam that theih tih thufing kan hria ang.Nia,hmeltha lem lo mahse,fel tak mai te hi chu kan han bel chiang deuh deuh a,tha kan ti chhawm mai thin.Hetih lai hian hmeltha tak mahse,fel lem lo te hi chu a rei deuh a ngaih khat ah kan ngai mai thin bawk.Then khat chuan make-up te kan hmang nasa,thawmhnaw manto tak tak te kan in bel thin,mahse,kan hmelthat phah tak tak thei chuang lo.Nu pakhat chuan a fate ti hian a zirtira-hmelthat in duh chuan inchei vak vak lam a ni lo,hlim hmel pu mai rawh u,a ti.Hei hi a dik viau mai.i hmeltha tih hote kha han en chiang mah teh,nui deuh hmel,hlim hmel pu an lo ni duh khawp mai.Nang mah ngei pawh kha han in en mah la,thla te han in lak teh,i nui hmel kha chu a dang riau ang.Awle,hmeltha ve lote kan lo hmelthat ve theih dan ber chu hlim hmel kan put hian alo ni ve reng mai. 

Fiamthuah chuan pitar hote pawh hi an vanglai chuan khaw khat nula hmeltha anni duh khawp mai,an ti.Tute pawh mai hian hmelthat hi kan chak a,kan tum bawk thin.Chuvang chu nge ni dawn,miin  i hmel ava tha ve,an tih chuan kan lawm viau thin.Hmeltha intih hi chu lawm lo pawh kan kan awm love,an ti hial thin,a lawmawm viau reng a ni.Nula hmeltha thlanna-Miss contest-te pawh kan nei thin a,mahse,tun hma kha chuan an tel tha duh lutuk lo thin,an ti.Heng a kan han thlan chhuah ngat hote hi chu tling ve tak an ni,tehna chi hrang hrang hmang a uluk taka thlan an nih thin vang in.Tun hnu hian Kut Miss-te pawh kan thlang thin a,an tha thei hle bawk.Hmm,..tlangval hote pawn kawppui tur/bialnu tur,hmel duh zawng kan melh thin.Tha tih zawng ni lo,kawp ve mai mai hi chu kan ti ngai mang lo khawp mai.Chuvang chuan kan han thlan meuh hi chu kan phu tawk ah an tha ve viau thin a ni.Tun hma ngaihtuah chuan Mizote pawh kan nalh ve sawt tawh khawp mai,thangthar no nalh tak tak,hleitling deuh deuh an kat ve ta nuk mai.A tawp ber atan chuan kan lo that ve theih nan,hmelthat ve theih nan,kawng tawite-hlim hmel put mai a ni e. 

Lalchhandama Colney