Matric Passed Ṭheuh Ṭheuh

A chhuah hun tura nî an tuk nî takah chuan HSLC result chu a chhuak a. Thiami leh Lâwmi : Thiami hmingpum chu Lalthiamtaki a ni. A hming hi a mak hlê; mite pawn an ti ve tho; mahse, a zak ngai lo! Lalthiamtaki chu lehkha thiam thei lo tak a ni; puan ṭhui erawh a thiam hle - Thiami chuan. 

Chumi nî, Matric result chhuah nî chuan Thiami chu MBSE office kawtah a ṭhiannu, Lâwmi nen chawhma dâr 11 nghakin an ṭhu dûn ve rân a; an huphurh dûn hle. Lâwmi chuan exam zawh hlim hlawl kha chuan Distinction-a passed a inring a; mahse, nizan kha chuan, ‘IInd-a ka passed chuan ka lâwm ngawt ang,’ a ti tawh - a rilru-in! Thiami erawh chuan a thiam theih loh êm avangin passed a inbeisei lo bur! Le! Results chu a chhuak ta. Result bû chu an lei ve a - an passed ve ve. Thiami chu IIIrd Division-ah a passed! Làwm avangin a zuang tawr tawr mai - a ṭhiannu Lâwmi result pawh chu eng nge a ni tih lam a ngaihtuah tawh lo - lâwm tak a nih avang chuan Lâwmi chu a kuah chung mai a nih chu! 

Lâwmi chu Ist Division-ah a passed a; lehkha thiam thei tak a nih avangin. SS-ah chauh letter mark a hmu thung - chu chuan a làwm a tikim tlat lo! IIIrd Division-a passed, lehkha thiam thei lo Thiami ai chuan Ist Division-a passed

Lâwmi chu a lãwm lo zâwk! Thiami chuan a phone la chhuakin a chhûngte hnenah a result a hrilh nghal var a. A nû nen an inbia a, a nu chu a ṭap hial, a lâwm êm avang chuan! Lâwmi erawh chuan a chhûngte a phone ve ngam lo - a tûm bûr!

Chu chu tun hmaa thil thleng tawh a ni. Lehkha thiam thei lo tak Thiami chuan a kalna âwm kawng a hria a - chu chu fashion designing lam. Lehkha zir chhunzawm chu a kalna âwm kawng a ni lo tih hriain loan a lâ a; pûk chawpin phaiah fashion designing a zir a. Tunah chuan Mizoramah amah aia designer lâr an awm lo hial ang! Tin, ram pâwn thleng pawn Thiami thiam thil chuan hriat a hlawh ta. A zir (kal)na lamah a tui êm a, a taima êm alawm! 

Lâwmi erawh thung chu Ist Division-a a passed avangin a chhûngten a tui lohna ber subject Science an lâk luih chhunzawm tir a; tunah chuan phone-a games khelh leh eirawngbâwl bâk hna a nei ta lo! Class XII Science pawh a passed lo! A zirnaa a tui loh êm avangin a thatchhe tlat alawm! 

Sânga & Nûtê-i : Sanga hming pum chu Sângtakthlenga a ni. A hming hi a mak hlê; mite pawn an ti ve tho; amah pawn a hming hi a zahpui fo! A mit a chhìn apiangin a ‘indo’ ziah! A nih loh leh, kutzungpui lem hlir a hmu ṭhin! Chu chu a smartphone aṭanga IG leh FB te, computer-a online games a khelh nasat luat vang a nih ka ring - kei chuan. A zirlai a mitthlà ngai lo hrim hrim ve thung. Sânga chu mi rilru chak tak a ni; mahse, chû a rilru chakna chu a zirna lama hmang loin internet lama games leh social media lamah a hmang zawk thung a - ṭhian pawh a ngah narawh e! Hetia internet-in rún tin mai min rùn hmate kha chuan an pâwlah pakhatna a ni ziah ṭhin. Mahse, matric result chhuah nî chuan le... 

Chu mi nî, Matric result chhuah nî chuan Sânga chu MBSE office kawtah a ṭhiannu, (a ṭhianpa a ni mah zâwk âwm e; mipa inkawm dan hlîrin inkâwm ṭhin hek) Nûtê-i nen chawhma dâr 11 nghakin an ṭhu dûn ve rân a; an huphurh dûn hle. Result chu a chhuak a. Result bû chu an lei ve a - an passed ve ve - Ist-ah ve ve lehnghal... nghalin a! 

Lungphûr phùra phûrin an chhûngte chu an phone ve ve ta chûk chûk a - an lâwm êm alawm! An pahnih chuan subject hnihah letter mark an hmu ve ve lehnghal a. Sânga chuan subject har an tih ber ṭhin Mathematics leh Science-ah letter mark a hmu a; pâ thêng thâwng tak mai Lalnûberi (Nûtê-i) chuan English-ah leh Mizo-ah letter mark a hmu thung. Chutiang chu an ni, an result chu - an va’n tiṭha tehlul ve ve êm! A bîkin pûk chawpa hostel-a a chhungten an awmtir, miten ‘Pâtil’ an tih khawpa pâ, mahse a kawppui ngáizáwng duh chuang miah lo, pianphungah pawh Sânga aia sâng Nûtê-i total mark chu Sânga total mark aiin a la sâng zâwk zui! 

A nu chu a lâwm em em a; tin, a ṭap ta hial a... 

Chu chu tun hma thil thleng a ni. Games âtchilh Sânga chuan bye-heart system-a a bye-heart ṭhin, letter mark a hmuhna Science chu Class XI-ah a la chhunzawm a; a tuina ber Computer Science ni loin! An nu leh pa ten PU Science harzia leh bye-heart ringawta passed a harsatzia an sawi ṭhin hre reng chung siin. Mahse, Class X-ah a tiṭha êm a, a la lui ta zel a. ‘Ma-’rawhchu, computer games leh online game khel reng chung leh exam dawna ṭan vaka bye-heart vaka Class XI Science passed chu a lo har na-ngiang mai; tin a kum khatnaah a failed ta a. A kum hnihnaah Simple Passed-in Class XII a zawm a. Tin, a failed leh a. A failed zel avang chuan a Bi-e-si-si (B.Sc) thleng loin Sângtakthlenga chu inah a awm ta mai mai a. A zirnaah a tui lo a, a thatchhe miau alawm! 

Rora chhu fanu, mitena an hmuhsit, ‘patil’ tih thana thang, pa thêng thâwng Nûtê-i chuan a tuina tak literature la chho zelin lehkha chhiar leh ziah a tui chho chhunzawm zel a. Ni tin leh kar tin, thla tin chhuak chanchinbu-ah miten a hming an hmu fo a. MZU-a MA Mizo zir chhunzawm tura thuràwn lah a dawng tam narawh. Chu sikul sâng aṭang chuan MA - ‘Kan ṭawng’ (MA Mizo) chu zir zoin, PhD a zir zo a. M.Phil te tiin tunah chuan a Proffesor luah ta mai. Tin, a lehkhabu ziah apiang ram puma hralh tla ber a ni ziah bawk. A zirnaah a tui a, a taima miau alawm! 

Kan tuinaah chuan kan taima vek! Kan tui lohnaa ‘taimak luih tum’ hi a harsa. Hma lam hun ṭan tur ‘Matric Passed ṭheuh ṭheuh’ tan tun hi ‘duhthlanna’ siam hun pawimawh lai ber a ni. Nu leh pate an pawimawh em em mai; mahse, a pawimawh bera chu ‘Matric Passed’ hi kan ni. 

Heng mi palite chanchin aṭang ringawt pawh hian Matric passed ṭheuh ṭheuh hian zir tur kan nei lo maw ... lo inchîk ve la. I inchîk peih lo a, he article hi i chhiar peih lo a nih tal pawn i nu leh pate kha chhiartir ve nachang hre khawpin ‘Matric Passed’ ni teh ... ka ti che!