Hetiang Zo Lanu an lo awm thei ngai a ni maw? (Alinery Lianhlawng)

Zonet lamah nula pakhat, hmel ṭha vak bik lo, a pian phei chu Zonu buh lak chawn ang ping peng tak ve mai a ni. Mahse, sakeibaknei vanglai ang maia kâ a han âng chiah mai chu! 

A sawi tam tulh tulh a, amah kha a hmuhnawm tulh tulh ta mai a. A pian te lah a nalh tial tial hian a hriat ta mai nia! A tarmit style lo ve tak phena a mitmeng de sawr sawr mai te chu khawvelah hian a mawi ta ber emaw tih mai tur a ni! 

Tu a nih ka hriat ngai loh, Zoram ṭhalai mipa 90% pawhin an tluk ngai loh tur khawpa khaw­vel daidarh a, hlawh­tlin tuma mahni maia thawk chhuak, eng­kim in zir chawpa champion pui zel thei nula hi Zofate rohlu a va ni chiang êm! 

Amah vekin, eng tin nge Alinery Lalngaihawmi Lian­hlawng hi miin hria se i tih tih zawhna a chhanna chu, ‘Pathian ringtu (Pathian mi hriat) tih zuk nia!

Europe khu hmei­chhe pahnihin an awp mek a, anni aiin kan Zo lanu hi a ropui zawk! A va han hmu fuh ngai êm! Mihring te mawina ber chu chhûng lam mawina a ni zuk ti a! Zoram ṭhalai, thawh chhuah pawh nei mang lo, branded awmzia pawh hre bawk hek lo va Bakroho khan inchei hlur hi mihring mawina thurûk a ni lo tih hriat chhuah nân hmang mawlh teh u! 

He nula han mak­zia hi a rothap nu hnâp a ni ber awm e! International politik a han hriatzia te kha pui tak niin a chiah chiah khan a sawi mawlh mawlh mai a ni ber. Pathian a hriat chianzia leh a awmna hmuna a chawr chhuahna a zah pui lohzia te kha a va chhuanawm êm! 

Amah ang tak hi tunah hian Zoram chhûngah nula sexy leh duhawm an awm mekte hi tam lehzual se ka va ti êm! Vanneihthlak takin chung zinga pakhat chuk a zui fuh ve hlauh mai a. Ka rei! Mipate hian a hnungah ke kan chhep hnawk hnawk nia maw le! 

Mipa dik tak mita nula duhawm leh hmuhnawm ber mai te chu mahni inring tawk tak maia an tuina zawng hnehsawh fahrana lantirtute hi an ni. Hetiang mite hi a ni telin an duhawm tial tial mai nia! Tu emaw ta ni lo ila chuan England-a zuk rim mai a châkawm a nih kha. 

Khawilai dawh­sana in thehno taka kal hlawng hlawng, nalh ta bera inngaite hi in hmuhnawmin in sexy fahran lo. Pawisa nei deuh nupui nih satliah tum mai mai hi nulate hmuhnawmna thurûk a ni mawlh lo. Zo nula duhawmte u, mipa dik tak mita in hmuhnawmna thurûk hi zir chiang ula, zir chhuak rawh u! Politik hre map lo, hnam veina pawh nei bawk hek lo, fashion thil hre hlur ringawt mai, thluaka rohlu pakhat mah nei lo hmeichhia hian mawina reng a nei lo ve. 

Mizo nulate an hmuhnawm ta takzet a lo ni.