Municipality chu le...

Municipality hi khawpui enkawltu tur sorkar niin kum 1992 khan India danpui siamṭhat vawi 74 naah dah luh niin Article 243P aṭanga 243ZG chhungah a awm a. India danpui chuan khawpui tin hi khawpui enkawltu tur (urban local body) nei turin min beisei nain keini state-ah chuan khawpui 26 zingah kan khawpui, Aizawlah chiah kan la nei. 

Tun dinhmunah hian Mizoram bikah hian municipality  neih chungchang te a ri ta a, municipality kan mamawh viau nge kan mamawh viau lem lo, kan hlawkpui ang nge kan sawt pui viau lem lo ang tih hi hriatthiam har tak a chu a ni.

Municipality hi hlawkna nge channa?:  Mi tam tak chuan municipality kan thlir dan hi a in ang lo hlawm hle a, municipality kan neih a hlawk pui ta viau tura inngai te, municipality neih a chan ta duai tura inngai te pawh kan awm. A neih duhlam hian municipality a awm chuan khawpuia kan harsatna te hi municipality kan neih chuan a kiang duak turah  an beisei a, khawpui enkawl kawngah thuneitu bik an awm ang a, khawpui tan chuan a ṭhatna tam tak a awm an beisei a ni. 

Sorkar department hmalakna ah pawh municipality hnuaiah chuan awmze nei zawkin an thawhho theih an beisei a. Municipality hian hna tam tak a siam ngei turah ngai bawk ila, ṭhenkhat tan local level chauh a politics khel ṭhin tan chuan councillor nihna chance a awm ve bawk dawn a ni. Municipality hian tun ai hian sum hmuhna tur an dap nasa zawk ang a, chhiah leh license fee mumal zawkin an la thei ang a, ram chungchangah pawh VC te thu hnuaia  pass in pek leh chhiah chawi mumal lo pawh hi sorkar in mumal zawkin a kal pui thei ang an ti. Building regulation mumal zawk a awm ang a, in sak kawngah pawh mumal zawk in kal pui a ni ang. 

Khawpui hmasawnna tur tam tak te duan niin tun ai hian state sorkar lamah pawh ngaipawimawh leh ngaisak an hlawh zawk an beisei a ni. Municipality hi khawpui hmasawnna kawngah chuan rahbi pawimawh tak zawng a ni ngei dawn in a lang. A nih leh municipality chu hlawkna vek tur em ni ang? A hmasa berah chuan  thingtlang lam leh  Aizawl khaw pawnte innghahna pawimawh tak mai ni za inhlawhna (NREGS) hi a bo ngei a ngai  dawn a. A tel lova kan awm ngam leh  ngam loh a ni mai.  Khawpui enkawltu tih te chu VC thuhnuaiah khawpui enkawl hna tak tak a awm ngai lova, khawpui lian chinah hian DC leh SDO (Civil) ten an ṭhutchilh avang hian khawpui enkawl, dan leh thupekah hian khawpui enkawltu bik an ngai hranin a lang lo. 

Chhiah leh license fee pek thar a ngai hian  mi tam tak tan chuan phurrit a siam ngei dawn a, ram chungchang pawh tunah chuan khawpui lian chinah  land revenue department ten house pass mumal leh LSC te an buaipui ve zel a VC thuneihna a tawp chho ve zel tawh bawk nen, building regulation te lah nise municipality tel kher lo pawh hian a tih theih a ni. Khawpui tan ṭanpuina  lah chu municipality nih vanga dawn aiin khawpui nihna hrim hrim avanga dawn a nih hmel bawk nen (Aizawlah pawh AMC a kal tur hi UD&PA in an buaipui zel tho an ti). Chuvang chuan enge maw municipality hi a tul kherna le ti tawk an awm ve bawk a ni. 

Chawm bawka hawp bawk nun ?: Mi tam tak chuan Mizoram khawpui te hian khawpui tana ṭanpuina leh hmasawnna an dawng bawk a, thingtlang te hmasawnna tur NREGS an la bawk a, an chawm bawk a, an hawp bawk a ni ber a lawm mawle ti tawk an awm. Thlirna tlang khat aṭang chuan a dik hmel viau mai. Khawpuite tan hian hmasawnna tam tak hi Mizoram khawpui te hian an dawng  ve a, chutih rual chuan khawpuiah pawh hian ni za inhlawhna hi mipui ten an dawng  tho bawk reng a ni.

Amaherawchu, Mizorama khawpui lam hmasawnna hi a khairual lo hle a. Tunah khawpui lama hmasawnna kalpui dan a insem rual dan en hian Aizawl leh district khawpuiah hmasawnna a luan luh nasat viau lai hian khawpui hming pu ve tam tak ah hi chuan khawpui hmasawnna hi an dawng ve mang tlat lo thung a ni. Chuvangin, mi tam tak tan chuan municipality hi a hminga ropui ai hian neih hi a chakawm lem lo. Mi tam tak chuan Aizawl khawpui  aṭang hian thil kan teh sak vek  zel a, NREGS tel  lo pawh hian Aizawl khawpuiah chuan eizawnna a awm thei mai zel a. Amaherawchu, thingtlang lamah chuan eizawnna a harsa em em a, municipality  nih ai hian khawpui nihna chan duh ṭhak pawh hi a awm nual awm e. Mi tam tak chuan khawpui dinhmuna din te hi an lawm vak lo ni awm tak a nia. A hming khawpui ni ve si a, a taka thingtlang vek ni si an tam viau mai. VCP pakhat min hrilh dan chuan Food Security Act hnuaia buhfai man tlawma lei thei te quota te hi khawpuiah 50% a nih laiin thingtlang lamah 75% a ni a, rethei an tam angin a lei thei an tlem si a niawm tak a nia. Chuvangin chawm bawka hawp bawk ang a in chhuah ai hian chawp tawp  emaw hawp tawp emaw (hlawkna pakhat zawk zawk)duh hi kan tam viau mai awm a sin.

 A mutan chu state sorkar bawk hi a ni: Municipality  hi han sawi vawng viau ṭhin mah ila tuna kan kal dan en chuan municipality neih hi thil chakawm tak a ni ang em aw tih tur ni. Aizawlah pawh hian state sorkarin thuneihna hupbeh sak char char a ni a. Sorkar hnuaia ṭanpuina awm thei buaipui kawngah pawh AMC chan tur awm tak te UD&PA hmang in a ti ṭhin an ti leh zel a. State sokar hian municipality din a duh a nih chuan thuneihna zau leh awmze nei zawk a pek phal ngei a ngai  ang. Tun hnaiah sorkar laipui in municipality thuneihna a ti pung dawn te an ti a, eng ang pawh in ti pung sa-teh mahse, Mizoramah chuan an thuneihna tur, twelve schedule a mi, a awmsa pawh an pe kim phal lo  nia, a dang pawh din se  beisei san a har viau mei lo ang maw. 

Mi state municipality te: India rama municipality tam zawk hi chu khawpui lian leh intodelh zawk te an ni a. Thuneihna pawh state sorkar in a pek ṭhat zawk te an ni a. Hetiang karah hian chhiah leh chawi neuh neuh tur, dawn leh pek chhuah tur pawhin awmzia nei thei zawk a. Mizorama kan khawpui ṭhenkhat te hi chu veng khat ngawr ngawr an ni a, a ṭhen lah chu veng hnih thum awrh mai te an ni a. Aizawl veng lian pakhat pawh tluk lo te an ni fur a. A khawpui lian ve te lah hi Aizawl municipality ward zatve pawh tluk lo an ni a. Mahni ke a ding tur pawh in mipui leh khawpui in a la tlin loh tur a ni. Chuvangin  mi tih thika  municipality lo din chiam hi district thar din nen hian a sum heksak lam a in ang reng mai lo ang maw.   Tun dinhmunah district thar din hi hmasawnna  ropui tak aiin  sorkar sum ti hek tu lian tak a ni ngawt mai a. Buaipui ngai leh sum heksak tura thil din chiam hi hmasawnna  atan a pawimawh viau in a lang lem lo. District  ṭhenkhat, kum 20 chuang ding tawhah pawh sorkar department office pawh in dah kim theih hma a, office awm tawhnaah pawh district officer tak ngial pawh in dah kim theih loh laia municipality vel a beiseina lo neih san viau hi a har viau chuan ka hre ṭhin.

Tin, tuna kan hmuh leh kan hriat chin aṭang ngawt pawh hian heti hi kan ni a, khawpui dang te chuan tuna mi zatve pawh hi an phak dawn lo nasa mai si a. Hmanhmawh viau hi a tul in ka hre lem lo. Kum 15 vel liam ta khan kan ṭhianpa hian Mizoramah municipality awm se tih thlawp zawng hian thu a ziak a, mahse a besei ang kha chu kan nei ta lem lo ni awm tak a nia. Tuna beisei tu te pawh hian municipality-ah hian  an beisei ang tak hi an hmu kher ang emaw ni le ka ti.

India ram insingsak dan en hi chuan khawpui tin hian enkawltu bik neih hi a dah pawimawh viau zel dawn tih chu a lang a, ṭanpuina leh hmalakna pawh hi khawpui enkawltute behchhan zela kal pui a tum tawh chuan a lang. Finance commission lam pawh hian sum min pek kan nghauh nghauh rih angin an sawi mek bawk a. Amaherawchu, tuna kan kalpui chin tawh en hian, mipui ten kan hlawk pui dan tur leh kan chan tur en hian  barhluh luia municipality system a kan luh a ṭul hma chu lo hmanhmawh chiam pawh hi a tul emaw ni le ka la ti fan.