A CHI TUR

Tun ṭum kan Budget sesion report a ka mit la tak chu, a chunga ka ziah, "a chi tur" tih hi a ni. Kan Finnance minister leh CM thusawi a nih vang a ni ang e. 

Kan in bul maiah hian hmunawl zimte kan nei a, thlai chi kan tuh ve ṭhin a. Ei tlak tur hian an puitling thei reng reng lo mai a, engnge a chhan ni ang ti hian kan buai ru fo mai. A chi chu leiah kan tuh ve ngei mai a, tui leh lei ṭha nia kan hriatte pawh kan pe ve ṭhin tho a. Nu fing zawk deuhte chuan, concrete building-in a hualvel vang a nia nge, an ti a. A dik hmel fu mai a, tunah chuan kan sim tawh. 

Thlai chi kan tuhte hi a rah kan beisei vang a ni a, mahse a rah lawh theiha awm tur hian kawng a thuiin, harsatna paltlang tur a tamzia chu kan hre vek awm e. Buhhum neiha lungawi mai a sawt lohzia hretu vek kan ni. Kan budget neihte chu, kumdang anga hmasawn nana hmang loa sawrkar laipui aṭanga sum hai chhuahna tur a ni ta chauh mai hi ram leh mipuite tan a mangan thlak hle dawnin a lang tlat a ni. 

Sawrkar a lo pian reng reng hian, ram chhung mipuite hian beisei kan nei ṭhin a, beisei kan neih vanga vote pawh thlak ṭhin kan ni. Zep thu a cheng lo, Rulling party worker-te ngat phei chu, "...kan sawrkar ve ta a, khawnge..." ti an ni tlangpui. An thiamawm nalai a awm, mahni in leh lo pawh ngaihtuah hlei thei loa ram tana ngaihtuahna leh hun tam zawk sengtu, sawrkar thar siam tura thawktute an ni tlat. 

Heng mite hi khaw­puiah leh thingtlang khaw tinah an awm a. Democracy-ah chuan ram tana thawktu, a sapṭawng takin, Frontline worker-te an ni. Anniho hi an lungawi loh chuan eng sawrkar mah a ding rei thei lo. Tuna MNF Sawrkar pawh hian mipuite chu sawi loh, heng frontline  worker beiseina an pekte hian a tak an pek an beisei tawh ang. 

Chutih laia kan budget ber, a chi tur, a ni ta tlat hian a tuh dan tur a ṭo ṭha dawn em? a rah ngut ang em? lawh tlak leh chhung tlai seng tur a thar ang em? A kawng bumboh na lai ngaihtuah chuan beisei a sang har khawp dawn mai. 

Arpui sente thawn­thu ang khan, ...buh hi tuin nge tuh ang, tuin nge seng ang, tuin nge buh deng ang, tuin nge chaw chhum ang? Zawhna a tam dawn khawp mai.