UT chhe mi hrin state chhe mi kan nei

Vanglaini April ni 27 a chhuak, “Mizoram Assem­bly-in India Danpui hnuaiah thuneihna sang bik a nei,” tih Pu Robert Romawia ziak kha, inbumna anga lo ngaitute tan chuan a mak lo. Khatiang ngaihdan neitute an lo la awm cheu hi erawh a maksak deuh lo maw? 

Pu Keihawla Sailo lehkhabu, ‘Thliarkar Dang Ngaihdan Dek Che Tham,’ ah hi chuan, U.T. chhemi hrin chhuah, state chhemi kan rochung zel a ang viau si lo maw? Pu Robert Romawia ngaihdan hi kei pawhin ka ngaihdan a lo ni thlap mai ṭhin a. Mahsela kei chuan, he lehkhabu ka chhiar aṭang chuan, inbumna mai a lo nihzia ka man chiang ta. 

A chhan chu, kha state ṭha mi ni awm taka inziak piahah khan, inbumna inzep a awm tlat alawm! “Mizoram state siam a nih hmaa Dan lo siam tawhte kha chu tiam lovin,” tih kha a lo inzep tlat alawm. 

State hnuaia min dahna Dan tak hi, Dan Sakei a lo ni ta a nih chu! U.T. Dan khan, Tribal Area kan nihna a hlip a, Chakma District Council a piantir a. Tribal Area kan nihna hlu tak a bo ta a. Nagaland, Meghalaya leh Arunachal te’n an chhawm nun zel chu kan chang pha ta lo a ni. 

British hun lai kha chuan, Tribal Area te chu, “British - India hnuaia pawha awm lo, Burma hnuaia pawha awm lo, Baluchistan hnuaia pawha awm lo leh khawvel ram khawii hnuai maha pawha awm lo,” a lo ti thlap asin maw le! 

Nagaland te chuan an ram leilung hausakna zawng zawng, a chhungril amite chenin an chanvo a ni. Keini chu a ni ve map lo. Chu lo rengah pawh, Mizoram hi India ram bung khata pawmtu hmasa ber kan lo nih phah ta. 

Hetianga daisual neite hi alawm, politik ṭawngkama, “Zawlbuka e tang,” an lo tih chu. A chhuah lehna i hriat duh chuan, ‘Thliarkar Dang Ngaihdan Dek Che Tham,’ tih bu en ve teh.